ប្រធាន​សមាគម​គ្រូបង្រៀនកម្ពុជា​ឯករាជ្យថា ​អាជ្ញាធរ​ចុះ​ស្រង់ស្ថិតិ​នៅ​ទីស្នាក់ការ​ ជាការគំរាមកំហែង

ដោយ អាស៊ីសេរី
2020-09-03
អ៊ីម៉ែល
មតិ
Share
បោះពុម្ព
គ្រូបង្រៀន​ប្រារព្ធ​ទិវា​គ្រូបង្រៀន​ពិភពលោក​លើក​ទី​៥០ និង​ទាមទារ​ដំឡើង​ប្រាក់​ខែ នា​ទីលាន​ប្រជាធិបតេយ្យ​ កាល​ពី​ថ្ងៃ​ទី​៥ ខែ​តុលា ឆ្នាំ​២០១៦។
គ្រូបង្រៀន​ប្រារព្ធ​ទិវា​គ្រូបង្រៀន​ពិភពលោក​លើក​ទី​៥០ និង​ទាមទារ​ដំឡើង​ប្រាក់​ខែ នា​ទីលាន​ប្រជាធិបតេយ្យ​ កាល​ពី​ថ្ងៃ​ទី​៥ ខែ​តុលា ឆ្នាំ​២០១៦។
RFA

ប៉ូលិស​មូលដ្ឋាន​នៅ​រាជធានី​ភ្នំពេញ​ជា​ច្រើន​នាក់ បាន​ចុះ​ទៅជំរឿន​ស្រង់​ស្ថិតិ​នៅទីស្នាក់ការ​កណ្ដាល​របស់​សមាគម​គ្រូបង្រៀន​​កម្ពុជាឯករាជ្យ​នៅ​ព្រឹក​ថ្ងៃ​ទី៣ កញ្ញា។ ប្រធាន​សមាគម​គ្រូបង្រៀន​កម្ពុជា​ឯករាជ្យ អ្នកស្រី អ៊ុក ឆាយ៉ាវី ចាត់​ទុក​រឿង​នេះ​ថាជា​ការគំរាមកំហែង​បំភិតបំភ័យ​ដល់​អង្គការ​សង្គម​ស៊ីវិល ដើម្បី​ទប់ស្កាត់​កុំ​ឱ្យ​ចូល​រួម​តស៊ូ​មតិ​​ស្វែងរក​យុត្តិធម៌​សង្គម​បន្ត​ទៀត។

អ្នកស្រី អ៊ុក ឆាយ៉ាវី ថ្លែងថា​ប៉ូលិស​សង្កាត់​ចាក់អង្រែ និង​អាជ្ញាធរ​មូលដ្ឋាន​ចំនួន​៥នាក់ បាន​ចុះ​ដល់​ទីស្នាក់ការ​កណ្ដាល​សមាគម​គ្រូបង្រៀន​របស់​អ្នកស្រី​នៅ​រាជធានី​ភ្នំពេញ សួរ​រក​ឯកសារ​ចុះ​បញ្ជិកា​បើក​សមាគម និង​សួរពីធ្វើ​ការងារ​អ្វីខ្លះ​ជាដើម។ អ្នកស្រី​និយាយថា នេះ​ជា​ការគំរាមកំហែង​បំបាក់​ស្មារតី​អ្នកស្រី ធ្វើ​ឱ្យ​ភ័យខ្លាច ដើម្បី​កុំឱ្យ​នាំគ្នា​ចូលរួម​ធ្វើ​បាតុកម្ម​តវ៉ា​ទាមទារ​ឱ្យ​តុលាការ​ដោះលែង​ប្រធាន​សហភាព​សហជីព​កម្ពុជា លោក រ៉ុង ឈុន និង​អ្នកទោស​មនសិការ​ដ៏ទៃ​ទៀត។ អ្នកស្រី​ បញ្ជាក់​ថា អ្នកស្រី​នៅ​តែ​ប្រកាន់​ជំហរ​ចូល​រួម​សម្ដែង​មតិ​រក​យុត្តិធម៌​សង្គម​ដោយ​មិនមាន​ការរាថយ​ឡើយ«ខ្ញុំ​សុំ​អំពាវនាវ​ដល់​សហការី​ខ្ញុំ​ទាំង​អស់ ក៏​ដូច​ជា​លោកគ្រូ អ្នកគ្រូ​ ជា​ពិសេស​ពលរដ្ឋ​ទាំង​អស់ សូម​កុំ​មាន​ការ​ព្រួយបារម្ភ​គ្រាន់​តែ​យើង​ធ្វើ​អំពើ​ល្អ។ សូម​ឱ្យ​យើង​នាំ​គ្នា​ក្រោក​ឈរ​ឡើង​ដើម្បី​អំពើ​ល្អ​ទាំង​អស់​គ្នា កុំ​ឱ្យ​យើង​ផ្ដេកផ្ដួល​ទៅ​តាម​អ្វី​​ដែល​ជា​ការ​គំរាមកំហែង​តាម​រូប​ភាព​ណា​មួយ​ដល់​ពួក​យើង​ទាំង​អស់​គ្នា​ឱ្យ​សោះ។ ការ​តស៊ូ​គឺ​គង់​តែ​បាន​សម្រេច​ទេ។»

អ្នកស្រី​ឱ្យ​ដឹងថា អាជ្ញាធរ​បាន​ត្រឡប់​ទៅ​វិញ​នៅ​ព្រឹក​ថ្ងៃទី៣ កញ្ញា បន្ទាប់​ពី​បុគ្គលិក​របស់​អ្នកស្រី​បាន​ប្រគល់​ឯកសារ​ចុះ​បញ្ជិការ​បើក​សមាគម​ជូន​មន្ត្រី​ទាំង​នោះ។

ទាក់ទង​នឹងបញ្ហា​នេះ​ អ្នកនាំពាក្យ​ស្នងការដ្ឋាន​នគរបាល​រាជធានី​ភ្នំពេញ លោក សាន សុខសីហា ប្រាប់​អាស៊ីសេរី​យ៉ាងខ្លី​ថា លោក​ពុំទាន់​ទទួល​ព័ត៌មាន​ជុំវិញ​ពី​ការចុះ​ជំរឿន​នៅ​ការិយាល័យ​សមាគម​គ្រូបង្រៀន​កម្ពុជាឯករាជ្យ​នេះ​នៅ​ឡើយ​ទេ «បាទ​ករណី​ហ្នឹង​ខ្ញុំ​អត់​បាន​ទទួល​ព័ត៌មាន​ផង​ព្រោះ​អ្វី​ដែល​ខ្ញុំ​ទទួល គឺ​មាន​តែ​ព័ត៌មាន​២​គឺ​ខាង​មន្ទីរ​ព័ត៌មាន​ចុះ​ត្រួតពិនិត្យ​ទីតាំង​ដែល​អត់​មាន​ច្បាប់​អនុញ្ញាត​ហ្នឹង។ ទី២​​ទាក់​ទង​ទៅ​ហ្នឹង​យុវជន​២នាក់​ដែល​គាត់​បង្ហោះ​សារ​​នៅ​ក្នុង​ហ្វេសប៊ុក​របស់​អង្គការ​មាតា​ធម្មជាតិ មាន​តែ​ប៉ុណ្ណឹង​ទេ»

ពាក់ព័ន្ធបញ្ហា​បំបាក់ស្មារតី​សមាគម​គ្រូបង្រៀននេះ ប្រធាន​ផ្នែក​សិទ្ធិមនុស្ស​នៃ​សមាគម​ការពារ​សិទ្ធិមនុស្ស​អាដហុក (Adhoc) លោក នី សុខា មាន​ប្រសាសន៍​ថា ​ប្រសិន​បើ​ពុំ​មាន​ដីកា​ពី​តុលាការ​ទេ​អាជ្ញាធរ​មិន​អាច​ចុះ​ឆែកឆេរ ឬ​ធ្វើ​ជំរឿន​នៅ​ការិយាល័យ​អង្គការ​សង្គម​ស៊ីវិល​ណាមួយ​បាន​ឡើយ​ ពីព្រោះ​អង្គការ​សង្គម​ស៊ីវិល​បាន​ចុះ​បញ្ជិកា​នៅ​ក្រសួង​មហាផ្ទៃ​បំពេញ​ការងារ​ដោយ​ស្របច្បាប់។ លោក​ចាត់​ទុក​រឿង​នេះ​ថា ជា​ការគំរាមកំហែង​ដល់​អង្គការ​សង្គម​ស៊ីវិល​មិន​អាច​បំពេញ​ការងារ​ប្រកប​ដោយ​វិជ្ជាជីវៈ «ពីព្រោះ​ថា​អត់​មាន​មាត្រា​ណា​មួយ​នៃ​ច្បាប់​អង្គការ​សមាគម ដែល​តម្រូវ​ឱ្យ​ប៉ូលិស​ចុះ​ធ្វើ​ការ​ជំរឿន​ឬ​ចុះ​ឆែកឆេរ​រក​ឯកសារ​ឬ​ក៏​តម្រូវ​​ឱ្យ​ធ្វើ​អី​ផ្សេង​ទៀត​គឺ​អត់​មាន​ទេ។ នៅ​ក្នុង​ច្បាប់​អង្គការ​សមាគម​យើង​ដឹង​ទាំង​អស់​គ្នា​ហើយ​គ្រាន់​តែ អង្គការ​សមាគម​ហ្នឹង​ទៅ​ចុះ​បញ្ជី​ហើយ​ហ្នឹង​​ធ្វើ​របាយការណ៍​ប្រចាំ​ឆ្នាំ​ទៅ​ឱ្យ​ក្រសួង​មហាផ្ទៃ​តែ​ប៉ុណ្ណឹង​ទេ​អត់​មាន​អី​​ឱ្យ​សមត្ថកិច្ច​នៅ​ក្នុង​មូលដ្ឋាន​ទៅ​ធ្វើ​ជំរឿន​​ធ្វើ​អី​គឺ​អត់​ទាន់​មាន​ទេ​។ អីចឹង​គឺ​ជា​ការ​រំលោភ​គោលការណ៍​ច្បាប់​ហើយ​ធ្វើ​បែប​ហ្នឹង។»

កន្លង​ទៅ​ប្រធាន​សមាគម​គ្រូបង្រៀន​កម្ពុជា​ឯករាជ្យ អ្នកស្រី អ៊ុក ឆាយ៉ាវី បាន​ដឹកនាំ​ក្រុម​គ្រូបង្រៀន​យុវជន​ខ្មែរថាវរៈ និង​កម្មករ​ជាច្រើននាក់​តវ៉ា​ទាមទារ​ឱ្យ​តុលាការ​ដោះលែង​លោក រ៉ុង ឈុន និង​អ្នក​ទោស​មនសិការ​ចំនួន​៦នាក់​ជា​បន្តបន្ទាប់ ។ អ្នកស្រី​ត្រូវ​ជនសង្ស័យ​ធាក់​ម៉ូតូ​ឲ្យ​ដួល​បណ្តាលឲ្យ​អ្នកស្រី របួស​ធ្ងន់ធ្ងរ ក្រោយ​ពេលដែល​អ្នកស្រី​ដឹកនាំ​ការតវ៉ា​ឲ្យដោះលែង លោក រ៉ុង ឈុន។តុលាការ​បាន​ចោទ​ប្រកាន់ លោក រ៉ុង ឈុន និង​អ្នក​ទាំង៦នាក់ ពី​បទ«ញុះញង់​បង្ក​ឲ្យ​មាន​ភាពវឹកវរ​ធ្ងន់ធ្ងរ​ដល់​សន្តិសុខ​សង្គម»។ អ្នកស្រី អ៊ុក ឆាយ៉ាវី ចាត់​ទុក​ការចោទ​ប្រកាន់​នេះ​ថា ជា​រឿង​អយុត្តធម៌​មិន​អាច​ទទួល​យក​បាន​ឡើយ​ ហើយ​អ្នកស្រី​គ្រោង​ប្រមូល​គ្នា​សម្ដែង​មតិ​ស្វែង​រកយុត្តិធម៌​ជូន​អ្នក​ទាំង​នោះ​នាពេលខាងមុខ​បន្តទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល