ក្រុម​យុវជន ចូល​ជួប​សួរ​សុខទុក្ខ​លោក ហ៊ុន វណ្ណៈ អ្នកនាង ឈឿន ដារ៉ាវី និង​កញ្ញា ស កណិកា ក្នុង​ពន្ធនាគារ​ព្រៃ​ស

ដោយ ខែ សុណង
2020.08.25
ហ៊ុន វណ្ណ: ម្ដាយ​លោក ហ៊ុន វណ្ណ: និង​ក្រុម​យុវជន​ខ្មែរ​ថាវរ: បាន​ទៅ​សួរ​សុខ​ទុក្ខ​លោក ហ៊ុន វណ្ណ: នៅ​មណ្ឌល​អប់រំ​កែប្រែ ទី១ ហៅ​កាត់​ថា "ម១" កាល​ពី​ព្រឹក​ថ្ងៃ​ទី២៥ ខែសីហា ឆ្នាំ២០២០។
រូប៖ ពលរដ្ឋ

ក្រុម​យុវជន​ខ្មែរ​ថាវរៈ និង​សាច់​ញាតិ នាំ​គ្នា ចូល​សួរ​សុខ​ទុក្ខ​ លោក ហ៊ុន វណ្ណៈ អ្នក​នាង ឈឿន ដារ៉ាវី និង​សកម្មជន​បក្ស​ប្រឆាំង​ម្នាក់​ទៀត គឺ​ កញ្ញា ស កណិកា នៅ​ក្នុង​ពន្ធនាគារ​ព្រៃ​ស នៅ​ថ្ងៃ​ទី២៥ សីហា។ ក្រុម​យុវជន ប្រាប់​ថា អ្នក​ជាប់​ឃុំ​ទាំង​បី​នាក់ មាន​សុខភាព​ទន់​ខ្សោយ ​ទឹក​មុខ​ស្លេកស្លាំង​ ជាង​មុន​ ហើយ​រង​ការ​ធ្វើ​បាប នៅ​ក្នុង​ពន្ធនាគារ។

ក្រុម​យុវជន​ខ្មែរ​ថាវរៈ​ បាន​ចែក​គ្នា​ជា ២ក្រុម ដើម្បី​ចូល​សួរ​សុខ​ទុក្ខ លោក ហ៊ុន វណ្ណៈ នៅ​ក្នុង​មណ្ឌល​កែប្រែ "ម១" និង​ មួយ​ក្រុម​ទៀត ចូល​សួរ​សុខ​ទុក្ខ​អ្នក​នាង ឈឿន ដារ៉ាវី និង​ កញ្ញា ស កណិកា ក្នុង​មណ្ឌល​កែប្រែ "ម២"

សមាជិក​ក្រុម​ខ្មែរ​ថាវរៈ កញ្ញា សូ មេត្តា ដែល​ចូល​ជួប លោក ហ៊ុន វណ្ណៈ ឲ្យ​ដឹង​ថា លោក ហ៊ុន​ វណ្ណៈ មាន​ស្មារតី​រឹងមាំ​ដដែល ប៉ុន្តែ​ ទឹក​មុខ​លោក ​ស្លេកស្លាំង​ ជាង​នៅ​ក្រៅ​ឃុំ។ កញ្ញា បន្ត​ថា ការ​ចូល​ជួប លោក ហ៊ុន វណ្ណៈ បាន​តែ​មួយ​ភ្លែត​ទេ មិន​ដល់ ១០នាទី​ផង ក៏​ត្រូវ​ឆ្មាំ​ពន្ធនាគារ​ បង្គាប់​ឲ្យ​បញ្ឈប់​ការ​សន្ទនា។

កញ្ញា ថា ​ការ​សន្ទនា​គ្នា​នោះ​ទៀត​សោត ត្រូវ​មាន​ឆ្មាំ ២នាក់ ចាំ​ស្ដាប់ និង​កត់ត្រា រាល់​ពាក្យ​សំដី ដែល​ធ្វើ​ឲ្យ​ពួក​គេ​ទើសទាល់ និង​មិន​អាច​សួរ ឬ​ជជែក​គ្នា​អស់​សេចក្ដី​ឡើយ។ ទោះ​យ៉ាង​ណា លោក ហ៊ុន វណ្ណៈ ផ្ដាំ​ផ្ញើ​ឲ្យ​ក្រុម​យុវជន​ខ្មែរ​ថាវរៈ តស៊ូ​ទៅ​មុខ​ទៀត ​ដើម្បី​ធ្វើ​សកម្មភាព​ទាមទារ​យុត្តិធម៌​សង្គម ហើយ​កុំ​បារម្ភ ខណៈ​​លោក​នៅ​ក្នុង​ពន្ធនាគារ​ បន្ត​ប្ដេជ្ញា​ចិត្ត​ថា នឹង​តស៊ូ​រស់​នៅ​ដោយ​មិន​តក់​ស្លុត​នោះ​ឡើយ​៖ «គ្រាន់​តែ​ប្រាប់​ថា ឲ្យ​ពួក​ខ្ញុំ​រឹង​មាំ បន្ត​ធ្វើ​ការ​បន្ត​ទៀត​ ហើយ​គាត់ ​ក៏​ខំ​តស៊ូ​រើ​បម្រាស់​ នៅ​ខាង​ហ្នុង​ដែរ។ គាត់​អត់​ព្រម​ចុះ​ចាញ់ ហើយ​គាត់​ លើក​ទឹកចិត្ត​ឲ្យ​ពួក​ខ្ញុំ​ហ្នឹង ខិតខំ​បន្ត​ធ្វើ​​ទៀត កុំ​តក់ស្លុត កុំ​ភ័យ​ខ្លាច។ បង្ហាញ​សារ​ បាន​តែ​ប៉ិន​ហ្នឹង ព្រោះ​សន្តិសុខ​គេ​នៅ​ខាង​ក្រោយ​ហ្នឹង ដល់​ពេល​អ៊ីចឹង យើង​និយាយ​សាច់​ការ​អ្វី អត់​បាន​ទេ»

កញ្ញា សូ មេត្តា បន្ត​ទៀត​ថា ឆ្មាំ​ពន្ធនាគារ បាន​បង្ក​ការ​លំបាក​ច្រើន ក្នុង​ការ​ចូល​ទៅ​សួរ​សុខ​ទុក្ខ​ លោក ហ៊ុន វណ្ណៈ។ កញ្ញា​ថា ឆ្មាំ​ពន្ធនាគារ​បាន​ដក​ហូត​សៀវភៅ​ធម៌ និង​សៀវភៅ​ទាក់ទង​នឹង​រឿង​សង្គម​ មិន​ឲ្យ​យក​ចូល​ក្នុង​ពន្ធនាគារ ទុក​ឲ្យ លោក ហ៊ុន វណ្ណៈ​ អាន​នោះ​ទេ។ ចំណែក​ម្ហូប​អាហារ​វិញ ​ក៏​មិន​​អាច​យក​ពី​ខាង​ក្រៅ​ទៅ​ឲ្យ​អ្នក​ជាប់​ឃុំ​បាន​ដែរ គឺ​ត្រូវ​ទិញ​ម្ហូប​ លក់​ក្នុង​បរិវេណ​ពន្ធនាគារ ដែល​មាន​តម្លៃ​ថ្លៃ ទើប​អាច​ផ្ញើ​ចូល​ឲ្យ​លោក ហ៊ុន វណ្ណៈ បាន។

រី€ខាង​ពន្ធនាគារ "ម២" វិញ ឆ្មាំ​ពន្ធនាគារ បាន​អនុញ្ញាត​ឲ្យ​យុវតី​ចំនួន ២នាក់ ចូល​សួរ​សុខ​ទុក្ខ​ អ្នក​ជាប់​ឃុំ​ បាន​យូរ គឺ​ជាង ១ម៉ោង។ ឆ្មាំ​ពន្ធនាគារ បាន​អនុញ្ញាត​ឲ្យ​​​កញ្ញា ស កណិកា បាន​ចេញ​មក​ជួប ក្រុម​យុវជន​ ឯ​អ្នក​នាង ឈឿន ដារ៉ាវី មិន​អនុញ្ញាត​ទេ ក្រោម​ហេតុផល​ថា កំពុង​ស្ថិត​ក្នុង​ស្ថានភាព​ចត្តាឡឺស័ក​ចំនួន ១៤ថ្ងៃ។

តែ​យ៉ាង​ណា សមាជិក​ក្រុម​យុវជន​ខ្មែរ​ថាវរៈ​ម្នាក់​ទៀត កញ្ញា ង៉ឹល ហេន ប្រាប់​ថា អ្នក​នាង ឈឿន ដារ៉ាវី និង កញ្ញា ស កណិការ ឃុំ​ក្នុង​បន្ទប់​ជាមួយ​គ្នា។ កញ្ញា ង៉ឹល ហេន ឲ្យ​ដឹង​ថា កញ្ញា ស កណិការ ក៏​ស្លេកស្លាំង​ជាង​មុន​ដែរ ហើយ​ឧស្សាហ៍​ឈឺ និង​កោស​ខ្យល់ ក្នុង​បន្ទប់​ឃុំឃាំង ដោយ​សារ​ក្នុង​បន្ទប់​នោះ មាន​អ្នក​ជាប់​ឃុំ ជា​ឧក្រិដ្ឋជន និង​អ្នក​​ទោស​គ្រឿងញៀន​ខ្លះ នាំ​គ្នា​ជក់​បារី។

កញ្ញា ង៉ឹល ហេន បន្ត​ទៀត​ថា ប៉ុន្មាន​ថ្ងៃ​នេះ ឆ្មាំ​ពន្ធនាគារ បាន​រឹត​ត្បិត​​​ កញ្ញា ស​ កណិការ និង​ អ្នក​នាង ឈឿន ដារ៉ាវី ខ្លាំង មិន​​អនុញ្ញាត​ឲ្យ​​បាន​ចេញ​ក្រៅ​បន្ទាប់ ធ្វើ​លំហាត់​ប្រាណ​ទេ ម្ល៉ោះ​ហើយ ទើប​ពួក​គេ​ទាំង​ពីរ​នាក់ ឧស្សាហ៍​ឈឺ និង​ស្លេកស្លាំង ជាង​មុន៖ «ហើយ​ប៉ុន្មាន​ថ្ងៃ​នេះ លឺ​គាត់​និយាយ​ថា មាន​ការ​ផ្លាស់ប្ដូរ​អ្នក​យាម។ អ្នក​យាម​ដែល​ចូល​មក​ថ្មី គឺ​បិទ​បាំង​សិទ្ធិ​សេរីភាព​របស់​គាត់​មែនទែន រយៈ​ពេល​៥​ថ្ងៃ​នេះ គឺ​អត់​ឲ្យ​មាន​ការ​ដើរ​ទៅ​ណា​ទាំង​អស់។ អត់​ឲ្យ​ចេញ​ក្រៅ​បន្ទប់​ ទៅ​ហាល​ខោ​អាវ​អ្វី​ក៏​អត់​។ សូម្បី​ដាក់​ជើង​មក​ក្រៅ ក៏​ដេញ​ឲ្យ​ដាក់​ជើង​ចូល​ទៅ​ក្នុង​វិញ​ដែរ។ ធ្វើ​ឲ្យ​គាត់​មាន​ការ​ហត់ ធ្វើ​ឲ្យ​គាត់​ មាន​សុខភាព​​អត់​ស្រួល នៅ​ពេល​ដែល​យើង​​ឃុំឃាំង​នៅ​ក្នុង​បន្ទប់​រយៈ​ពេល​៥​ថ្ងៃ បិទ​ជិត ហើយ​សូម្បី​តែ​បាយ​ញ៉ាំ ក៏​ដាក់​តាម​ប្រឡោះ ហើយ​ប្រៀបធៀប​ជីវិត​ដូច​ទៅ​ហ្នឹង​សត្វ​ណា រយៈ​ពេល​៥​ថ្ងៃ​ហ្នឹង។ ​ក្រោយ​មក​ នៅ​ថ្ងៃ​នេះ គឺ​អ្នក​ដែល​យាម​ចាស់ គេ​ចូល​ត្រលប់​ទៅ​វិញ។ អ៊ីចឹង គាត់​គ្រាន់​តែ​ឃើញ​អ្នក​យាម​ចាស់​ហ្នឹង គាត់​សប្បាយ​រីករាយ ថា​ បាន​សិទ្ធិ​សេរីភាព​វិញ​ ខ្លះ​ហើយ»

ឆ្លើយ​តប ករណី​នេះ អ្នក​នាំ​ពាក្យ​អគ្គនាយកដ្ឋាន​ពន្ធនាគារ លោក នុត សាវនា លើកឡើង​​ថា ជា​គោល​ការណ៍ គឺ​មិន​អនុញ្ញាត ឲ្យ​អ្នក​ជាប់​ឃុំ ជក់​បារី នៅ​ក្នុង​បន្ទប់​ឃុំឃាំង​នោះ​ទេ។ ប៉ុន្តែ លោក​ មិន​ប្រាកដ​ថា នៅ​មណ្ឌល​កែប្រែ "ម២" បាន​អនុវត្ត​បាន​កម្រិត​ណា​ទេ​នោះ​ឡើយ ដោយ​លោក​សន្យា​ថា នឹង​ពិនិត្យ​មើល​ករណី​នេះ។

ចំណែក​ការ​អនុញ្ញាត​ឲ្យ​អ្នក​សួរ​សុខ​ទុក្ខ អាច​ចូល​ជួប​បាន​រយៈ​ពេល​ខ្លី​នោះ មន្ត្រី​នាំ​ពាក្យ​​​ពន្ធនាគារ​រូប​នេះ ពន្យល់​ថា ដោយសារ​​ ការ​បារម្ភ​ពី​ការ​ឆ្លង​ជំងឺ​កូវីដ១៩ (Covid-19) ទើប​ខាង​ពន្ធនាគារ ​កាត់​បន្ថយ​កន្លែង ​​សួរ​សុខ​ទុក្ខ​អ្នក​ជាប់​ឃុំ ​ម្ដង ៤នាក់ មក​ត្រឹម​ម្ដង​ម្នាក់​វិញ ម្ល៉ោះ​ហើយ ​ធ្វើ​ឲ្យ​ចំនួន​អ្នក​មក​សួរ​សុខ​ទុក្ខ​អ្នក​ជាប់​ឃុំ មាន​គ្នា​ច្រើន ហើយ​ត្រូវ​កាត់​បន្ថយ​ពេល​វេលា​ខ្លះ។ ម្យ៉ាង​ទៀត ដោយ​សារ​ការ​សួរ​សុខ​ទុក្ខ​​ខ្លះ ចំ​ថ្ងៃ​​ឈប់​សម្រាក ជាដើម​ «អ៊ីចឹង អា​ការណ៍​រឹតត្បិត​ ក្នុង​ការ​ជួប​ហ្នឹង គឺ​យើង​អនុវត្ត​តាម​គោលការណ៍​របស់​ក្រសួង ដើម្បី​ទប់ស្កាត់​​ជំងឺ​ឆ្លង​ពី​ក្រៅ ពីព្រោះ​យើង​អត់​អាច​ធ្វេស​ប្រហែល​បាន​ទេ ហើយ​ម្យ៉ាង​វា​ចំ​ពេល​ម្នាក់ៗ គេ​ឈប់។ អ៊ីចឹង​ទៅ យើង​បែង​ចែក យើង​លៃ​មន្ត្រី​ប្រចាំ​ការ​ម៉ោង​សូន្យ ម៉ោង​អ្វី​ហ្នឹង​ វា​ខើច ហើយ​សម្រាប់​ថ្ងៃ​ធម្មតា​វិញ​នោះ យើង​​រែង​ឲ្យ​ស្មើ​គ្នា​ឡើងវិញ ហើយ​ឲ្យ​បាន​ជួប​យូរ​ជាង​មុន។ ធ្វើ​ម្ដេច​ទៅ​តាម​គោលការណ៍​ ការ​ទប់​ស្កាត់​កូវីដ​ដែរ»

នាយក​រង​ ទទួល​បន្ទុក​ផ្នែក​សិទ្ធិ​មនុស្ស​ នៃ​អង្គការ​លីកាដូ លោក អំ សំអាត សង្កេត​ឃើញ​ថា ក្នុង​សំណុំ​រឿង​ក្ដី​ទាំង​នេះ មាន​តែ​មេធាវី​ទេ ដែល​ទទួល​បាន​ការ​សន្ទនា ជា​លក្ខណៈ​ឯកជន ជាមួយ​កូន​ក្ដី​ក្នុង​ពន្ធនាគារ ឯ​ក្រុម​គ្រួសារ​ សាច់​ញាតិ និង​អង្គការ​សង្គម​ស៊ីវិល ដែល​ចូល​ទៅ​ប្រឹក្សា​ផ្នែក​ច្បាប់ ក៏​មាន​មន្ត្រី​ពន្ធនាគារ ឃ្លាំមើល និង​ចាំ​ស្ដាប់ ហើយ​កត់ត្រា​ការ​សន្ទនា​ដែរ។ លោក យល់​ថា ខាង​ពន្ធនាគារ​គួរ​តែ​​ផ្ដល់​សិទ្ធិ​ឲ្យ​ពួកគេ អាច​ជជែក​គ្នា ជា​លក្ខណៈ​ឯកជន និង​មាន​ពេលវេលា​ជួប​គ្នា យូរ​​ជាង​នេះ។

លោក អំ សំអាត បន្ត​ថា ទោះ​ជា​ពន្ធនាគារ​មាន​គោលការណ៍​មិន​ជក់​បារី ប៉ុន្តែ​ករណី​ជាក់​ស្ដែង​ តាម​បន្ទប់​ឃុំ​ឃាំង​ពិត​ជា​មាន​ការ​ជក់​បារី​ពិត​មែន។ លោក​ជំរុញ​ឲ្យ​អគ្គនាយកដ្ឋាន​ពន្ធនាគារ​ គួរ​តែ​ពិនិត្យ​​ករណី​ជក់​បារី តាម​បន្ទប់​ឃុំឃាំង​ឲ្យ​មាន​ល្អ​ប្រសើរ​ជាង​នេះ៖ «ជា​ទូទៅ ទោះ​បី​​យើង​ឃើញ​ថា នៅ​ក្នុង​ច្បាប់​លើកលែង​មេធាវី ឬ​ក៏​អ្នក​ដែល​មាន​សិទ្ធិ​ ក្នុង​ការ​ជួយ​ទៅ​លើ​ជន​ជាប់​ចោទ​​ ដែល​អាច​ធ្វើ​ជា​សម្ងាត់​​បាន​ក៏​ដោយ ក៏​ប៉ុន្តែ​​ វា​គួរ​តែ​ផ្ដល់​ឱកាស​សម្រាប់​ក្រុម​គ្រួសារ​ ដែល​គាត់​ជួប​ អ្នក​ដែល​ជាប់​គុក​ហ្នឹង ក្នុង​ការ​គាត់​មាន​ឱកាស​ ក្នុង​ការ​និយាយ​ដោយ​សេរី សួរ​សុខ​ទុក្ខ​គ្នា ដោយ​សេរី។ តែ​ជា​ការ​កត់​សម្គាល់​ ខ្ញុំ​ឃើញ​ថា រយៈ​ពេល​ចុង​ក្រោយ​នេះ មែន មិន​ថា​តែ ​ក្រុម​គ្រួសារ​ទេ សូម្បី​តែ​មន្ត្រី​អង្គការ​សង្គម​ស៊ីវិល​មួយ​ចំនួន​ហ្នឹង ​​ក៏​នៅ​ពេល​ដែល​ជួប​សួរ​សុខ​ទុក្ខ​អ្វី​ហ្នឹង ឬ​ក៏​ប្រឹក្សា​យោបល់​ផ្លូវ​ច្បាប់​អ្វី ក៏​មាន​​មន្ត្រី​អង្គុយ​មើល​ ឬ​ក៏​ស្ដាប់​ នៅ​ហ្នឹង​ដែរ»

សមត្ថកិច្ច​បាន​ចាប់​​ខ្លួន​ កញ្ញា ស កណិកា អ្នក​នាង ឈឿន ដារ៉ាវី និង លោក ហ៊ុន វណ្ណៈ ក្រោយ​ពេល ពួកគេ បាន​ធ្វើ​សកម្មភាព​តវ៉ា​ទាមទារ​ឲ្យ​ដោះលែង តំណាង​ក្រុម​ប្រឹក្សា​ឃ្លាំមើល​កម្ពុជា និង​ជា​ប្រធាន​សហភាព​សហជីព​កម្ពុជា លោក រ៉ុង ឈុន នៅ​មុខ​តុលាការ​ក្រុង​ភ្នំពេញ។ តំណាង​អយ្យការ​ បាន​ចោទ យុវជន​ទាំង ៣នាក់ ពី​បទ​ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សង្គម និង​បទ​រារាំង​សមត្ថកិច្ច​ក្នុង​ការ​ឆែកឆេរ​កន្លែង​ស្នាក់​នៅ។ ប៉ុន្តែ​ក្រុម​យុវជន និង​អង្គការ​សមាគម​ឃ្លាំមើល​សិទ្ធិ​មនុស្ស​នៅ​កម្ពុជា ច្រាន​ចោល​ការ​ចោទ​ប្រកាន់​នេះ ដោយ​អះអាង​ថា ពលរដ្ឋ​ដែល​រង​ការ​ចាប់​ខ្លួន​ គ្រាន់​តែ​បាន​ប្រើប្រាស់​សិទ្ធិ​មនុស្ស​ជា​មូលដ្ឋាន ដែល​ធានា​ដោយ​ច្បាប់​ជាតិ និង​អន្តរជាតិ​ ក្នុង​ការ​សម្ដែង​ឆន្ទៈ តស៊ូ​មតិ​ដោយ​អហិង្សា។

ក្រុម​អង្គការ​ជាតិ និង​អន្តរជាតិ​ ទាមទារ​​ឲ្យ​បញ្ឈប់​ការ​ធ្វើ​ទុក្ខ​បុក​ម្នេញ ហើយ​ទទូច​ ឲ្យ​តុលាការ ដោះ​លែង​ក្រុម​អ្នក​តវ៉ា​ទាំង​អស់ ដោយ​ឥត​លក្ខខណ្ឌ។ ក្រុម​យុវជន​ខ្មែរ​ថាវរៈ ឲ្យ​ដឹង​ថា អាជ្ញាធរ​ នៅ​តែ​បន្ត​ធ្វើ​បាប​ពួក​គេ ទោះ​បី​ជា​អាជ្ញាធរ​ចាប់​ឃុំខ្លួន​សមាជិក​ពួក​គេ ចំនួន​ពីរ​នាក់​ហើយ​ក៏​ដោយ ជាង​នេះ​ទៀត​តុលាការ​បាន​បិទ​ផ្ទះ​ជួល​របស់​ពួក​គេ ​នៅ​ខណ្ឌ​ពោធិ៍​សែន​ជ័យ មិន​អាច​ឲ្យ​ពួកគេ មិន​អាច​យក​ទ្រព្យ​សម្បត្តិ​ចេញ​បាន ហើយ​ត្រូវ​ចំណាយ​លុយ​ជួយ​ផ្ទះ​នៅ​ថ្មី។ បន្ថែម​ពី​នេះ ក្រុម​យុវតី​ទាំង​នោះ​ អះ​អាង​ថា នៅ​តែ​មាន​ជន​ស៊ីវិល មិន​ស្គាល់​មុខ បន្ត​ធ្វើ​សកម្មភាព​ឃ្លាំមើល​ពួក​គេ​ជា​និច្ច៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។