មនុស្ស ៥នាក់ស្លាប់ និង ៤នាក់របួស ក្នុងហេតុការណ៍បាក់រលំដងសន្ទូចសំណង់អាគារ នៅក្រុងប៉ោយប៉ែត ខេត្តបន្ទាយមានជ័យ

ដោយ មួង ណារ៉េត
2020.08.12

ដងសន្ទូចសំណង់អាគារ នៅក្រុងប៉ោយប៉ែត ខេត្តបន្ទាយមានជ័យ ដែលរំលំបាក់សង្កត់អ្នកនៅក្បែរនោះស្លាប់ ៥នាក់ស្លាប់ និងរបួស ៤នាក់ នៅថ្ងៃទី១២ ខែសីហា ឆ្នាំ២០២០។

រូប៖ រដ្ឋបាលខេត្តបន្ទាយមានជ័យ

ស្ដាប់ ឬទាញយកសំឡេង

មនុស្ស ៥នាក់បានស្លាប់ និងរងរបួស ៤នាក់ ក្នុងហេតុការណ៍រលំដងសន្ទូចសំណង់អាគារក្រុមហ៊ុន ដឹ ផាក ស៊ីធី (The park City) នៅភូមិគីឡូ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ នៅរសៀលថ្ងៃទី១២ សីហា។

ចៅសង្កាត់ផ្សារកណ្ដាល លោក ស្រិល អិន ប្រាប់អាស៊ីសេរីនៅមុននេះបន្តិចថា ក្រុមហ៊ុនមួយនេះបានស្ទូចផ្ទាំងថ្មធ្វើសំណង់អាគារ ទម្ងន់ប្រមាណ ៧តោន (៧.០០០) ហើយបានរំលំដងសន្ទូចធ្លាក់ចំប្រជាពលរដ្ឋដែលកំពុងអង្គុយនៅក្នុងផ្ទះរបស់គាត់ នៅជាប់ការដ្ឋានសំណង់នេះ។ លោកបញ្ជាក់ថា បច្ចុប្បន្នអាជ្ញាធរបានដឹកសាកសពទាំងនោះ តម្កល់ទុកនៅវត្តម៉ុងចិន សង្កាត់ផ្សារកណ្ដាល ដើម្បីរង់ចាំសាច់ញាតិនាំយកទៅធ្វើបុណ្យនៅផ្ទះរៀងៗ ខ្លួន។ ចំណែកអ្នករងរបួស អាជ្ញាធរបានបញ្ជូនទៅព្យាបាលនៅមន្ទីរពេទ្យមិត្តភាពកម្ពុជា ជប៉ុន ស្រុកមង្គលបូរី។

លោកឱ្យដឹងថា ក្រុមហ៊ុនដែលបង្កគ្រោះថ្នាក់បណ្ដាលឱ្យពលរដ្ឋស្លាប់នេះ មានម្ចាស់ជាជនជាតិខ្មែរ ប៉ុន្តែលោកមិនស្គាល់ឈ្មោះអ្វីនោះទេ។ លោកបន្ថែមថា ក្រុមហ៊ុនបានសង់បូរីផ្ទះល្វែងសម្រាប់លក់និងជួល ហើយទើបតែសាងសង់បាន ៦បន្ទប់ប៉ុណ្ណោះ។ រហូតមកទល់ព្រលប់ថ្ងៃទី១២ សីហា អាជ្ញាធរមិនទាន់បញ្ជាក់ពីសំណងដល់ជនរងគ្រោះយ៉ាងណានៅឡើយទេ៕