លោកនាយករដ្ឋមន្ត្រី ហ៊ុន សែន អំពាវនាវឱ្យប្រជាប្រជាពលរដ្ឋគោរពច្បាប់ចរាចរណ៍ និងការពារខ្លួនប្រយ័ត្នឆ្លងជំងឺកូវីដ-១៩ ក្នុងពិសេសក្នុងដំណើរកម្សាន្ត ទៅកាន់ទីរមណីយដ្ឋាននានា ក្នុងឱកាសឈប់សម្រាកប្រាំថ្ងៃចាប់ពីថ្ងៃទី១៧ ដល់ថ្ងៃទី២១ ខែសីហា ជាថ្ងៃឈប់សម្រាកជំនួសថ្ងៃបុណ្យចូលឆ្នាំប្រពៃណីជាតិនោះ។ ទន្ទឹមគ្នានេះ គណៈកម្មាធិការសុវត្ថិភាពចរាចរណ៍ផ្លូវគោក ក៏បានចេញសេចក្តីអំពាវនាវដល់ប្រជាពលរដ្ឋដែលធ្វើដំណើរជិតឆ្ងាយត្រូវពាក់មួកសុវត្ថិភាពឲ្យបានត្រឹមត្រូវ មិនត្រូវបើកបរហួលល្បឿនកំណត់ មិនត្រូវបើកបរក្នុងពេលស្រវឹង ត្រូវគោរពសិទ្ធិអាទិភាពក្នុងការបើកបរ និងត្រូវពាក់ខ្សែក្រវាត់ជានិច្ចក្នុងការធ្វើដំណើរតាមយានយន្ត ដើម្បីកាត់បន្ថយគ្រោះថ្នាក់ចរាចរណ៍តាមដងផ្លូវ និងផាកពិន័យធ្ងន់ធ្ងរតាមច្បាប់។
នៅថ្ងៃដំបូងនៃថ្ងៃឈប់សម្រាកនេះ គេសង្កេតឃើញថា ប្រជាពលរដ្ឋមិនសូវធ្វើដំណើរកម្សាន្តទៅកាន់តំបន់ទេសន៍នានា ច្រើនកុះករដូចឆ្នាំកន្លងមកនោះទេ ដោយអ្នកខ្លះ អះអាងថា បារម្ភខ្លាចឆ្លងជំងឺកូវីដ-១៩ និងខ្លះខ្វះខាតជីវភាពក្នុងពេលវិបត្តិជំងឺកូវីដ។ ចំណែកប្រជាពលរដ្ឋដែលធ្វើដំណើរកម្សាន្តក្នុងតំបន់ទេសចរណ៍មួយចំនួន ហាក់មិនសូវមានការប្រុងប្រយ័ត្នពីជំងឺកូវីដ និងរក្សាគម្លាតឲ្យបានត្រឹមត្រូវនោះទេ។
ប្រធានសមាគមមគ្គុទ្ទេសក៍អង្គរ ខៀវ ធី បានឲ្យដឹងថា សម្រាប់ការឈប់សម្រាករយៈពេល ៥ថ្ងៃនេះអាជ្ញាធរក្រុងសៀមរាប បានរៀបសណ្ដាប់ធ្នាប់ និងរៀបចំឲ្យមានសំភារៈការពារជំងឺកូវីដ-១៩ គ្រប់ទីកន្លែងកម្សាន្តទូទៅក្នុងក្រុង និងភោជនីយដ្ឋាននានាផងដែរ លើកលែងតែទីកន្លែងកម្សាន្តឯកជន និងអាហារដ្ឋានឯកជនតូចៗមួយចំនួន មិនមានការរៀបចំ ការពារជំងឺកូវីដ-១៩ឲ្យបានសមរម្យនោះទេ៖ «ពិធីឈប់សម្រាកបុណ្យសងចូលឆ្នាំនេះ មានរក្សាដាក់គម្លាតសុវត្ថិភាព ពាក់ម៉ាស់ ពាក់របាំងមុខការពារ ហើយដាក់ថ្នាំបាញ់សម្អាតជាសាធារណៈដែរ។ ប៉ុន្តែវាស៊ីសងលើបុគ្គលទេ បុគ្គលខ្លះអត់ចង់ប្រើ ប៉ុន្តែបើចូលក្នុងហ្សូន (zone) ដូចថា ផ្សារ ជិះទូកកម្សាន្តតាមមាត់ស្ទឹង គឺត្រូវតែអនុវត្តវិធានការពារហ្នឹង»។
គិតត្រឹមថ្ងៃទី១៧ ខែសីហា អ្នកផ្ទុកជំងឺកូវីដនៅកម្ពុជា មានចំនួនសរុប ២៧៣នាក់ ក្នុងនោះមានអ្នកជាសះស្បើយមានចំនួន ២៣៨ ចំណែក អ្នកសម្រាកព្យាបាលមានចំនួន ៣៥នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។