ក្រុមយុវជនថាវរៈនៅតែរក្សាជំហរទាមទារឱ្យមានការដោះលែងសមាជិកក្រុមរបស់ខ្លួន និងលោក រ៉ុង ឈុន ដែលកំពុងជាប់ឃុំក្នុងពន្ធនាគារ។ ការប្រកាសនេះខណៈអាជ្ញាធរ កំពុងតាមដាន ព្រះសង្ឃ និងយុវជននៃថាវរៈដែលធ្វើសកម្មភាពទាមទារកន្លងមក។
ក្រុមយុវជនថវារៈ លើកឡើងថា ទោះពួកគេកំពុងប្រឈមការតាមឃ្លាំមើលពីក្រុមសមត្ថកិច្ចក្ដី ប៉ុន្តែ ពួកគេនៅតែព្យាយាមរកយុទ្ធសាស្ត្រថ្មីនៃទាមទារដើម្បីកុំអាជ្ញាធរយកលេសចាប់ខ្លួន ឬចោទប្រកាន់ពួកគេតាមទំនើងចិត្តបន្តទៀត។ យុទ្ធសាស្ត្រថ្មីដែលក្រុមយុវជនគ្រោងធ្វើនោះគឺធ្វើយ៉ាងណាឱ្យស្របតាមទម្រង់ច្បាប់ និងជាការទាមទារតាមបណ្ដាញសង្គមជាដើម។
សមាជិកក្រុមយុវជនខ្មែរថាវរៈ ព្រះតេជគុណ កើត សារ៉ាយ ឱ្យអាស៊ីសេរីដឹងថ្ងៃទី១៧ ខែសីហា ទោះពេលនេះអាជ្ញាធរ និងមន្រ្តីសង្ឃតាមឃ្លាំមើលព្រះតេជគុណយ៉ាងណាក្ដី ក៏ព្រះអង្គមិនផ្លាស់ប្ដូរឆន្ទៈក្នុងទាមទាររកយុត្តិធម៌ជូនសមាជិកក្រុមយុវជនខ្មែរថាវរៈពីរូបគឺលោក ហ៊ុន វណ្ណៈ និងអ្នកនាង ឈឿន ដារ៉ាវី រួមទាំងតំណាងក្រុមប្រឹក្សាឃ្លាំមើលកម្ពុជា និងជាមេដឹកនាំ សហជីព លោក រ៉ុង ឈុន ដែលបានលះបង់កម្លាំងកាយចិត្តដើម្បីសង្គមជាតិ។ ព្រះតេជគុណបន្តថា ពេលនេះក្រុមយុវជន កំពុងជជែកផ្លាស់ប្ដូរគំនិតពីផែនការនៃទាមទារនេះ៖ «នៅតែទាមទារហ្នឹងឯងមកដល់ពេលនេះ អាត្មាមិនទាន់ហ៊ាននិយាយថា ធ្វើបែបណាខ្លះទេ ដោយសារយើងមិនទាន់បានសិក្សាច្បាស់ថា ស្ថាប័នណាខ្លះទាក់ទងរឿងហ្នឹង ហើយលិខិតបែបណាខ្លះ ដែលយើងត្រូវរៀបចំ ការសម្ដែងមតិយើងគួរធ្វើបែបណាខ្លះនៅទីសាធារណៈ » ។
សមាជិកក្រុមយុវជនខ្មែរថាវរៈម្នាក់ទៀត លោក វាន់ ចាន់ធឿន ឱ្យដឹងដែរថា ពេលនេះលោកកំពុងត្រូវក្រុមអាជ្ញាធរកំពុងតាមដានដែលយល់ថា លោកអាចប្រឈមការចាប់ខ្លួន ប៉ុន្តែលោក អះអាងថា លោកនៅតែប្រកាន់ខ្ជាប់នូវការទាមទារដោយសន្តិវិធីឱ្យមានការដោះលែងយុវជនដែលត្រូវចាប់ខ្លួន រួមទាំងអ្នកស្នេហាជាតិដទៃទៀត៖ ««ដឹងថាគេតាមខ្ញុំ គេតេមកប្រាប់មុនបងតេមកខ្ញុំ ហើយខ្ញុំជំហរខ្ញុំនៅតែចូលរួមតែដូចថាដឹងហើយ យើងឱ្យស្ងាត់តិច ព្រោះពួកខ្ញុំធ្វើឱ្យស្របច្បាប់»។
ទាក់ទងជំហរនៃការទាមទាររបស់ក្រុមយុវជនថាវរៈនេះ អាស៊ីសេរីមិនអាចសុំប្រតិកម្មពី អ្នកនាំពាក្យនគរបាលជាតិលោក ឆាយ គឹមខឿន និងអ្នកនាំពាក្យរដ្ឋាភិបាល លោក ផៃ ស៊ីផាន បានទេនៅថ្ងៃទី១៧ ខែសីហា ដោយទូរស័ព្ទហៅចូលគ្មានអ្នកទទួល។
ទោះយ៉ាងណា អ្នកនាំពាក្យក្រសួងយុត្តិធម៌ លោក ជិន ម៉ាលីន ធ្លាប់ព្រមានថា រដ្ឋាភិបាល នឹងចាត់វិធានការច្បាប់បន្តទៀត ប្រសិនបើក្រុមយុវជន ហ៊ានធ្វើសកម្មភាពតវ៉ាដូចការអះអាងរបស់ពួកគេមែន។
ដោយឡែក ប្រធានកម្មវិធីស្រាវជ្រាវ និងតស៊ូមតិនៃបណ្ដាញយុវជនកម្ពុជា (CYN) លោក ស ម៉ូរី សង្កេតឃើញថា ការទាមទាររបស់យុវជនក្រុមថាវរៈកន្លងមកគឺជាអនុវត្តិសិទ្ធិសេរីជាមូលដ្ឋាន សេរីនៃការជួបប្រជុំ និងសេរីភាពសម្ដែងមតិដោយអហិង្សាដែលត្រូវបានធានារដោយច្បាប់ជាតិ និងច្បាប់អន្តរជាតិ។ អ្នកឃ្លាំមើលរូបនេះ ជំរុញទៅរដ្ឋាភិបាលបង្កភាពងាយស្រួលដល់ក្រុមយុវជននៅពេលពួកគេប្រើប្រាស់សិទ្ធិសេរីនៃការទាមទារជាបន្តបន្ទាប់ទៀត៖ «ការអនុវត្តសិទ្ធិរបស់ពួកគាត់គ្រាន់តែជាការអនុវត្តជាមូលដ្ឋានសាមញ្ញប៉ុណ្ណោះសម្រាប់ខ្ញុំ។ ខ្ញុំមានការសោកស្ដាយ ចំពោះចំណាត់ការរបស់រដ្ឋាភិបាលក្នុងចាប់យុវជនថាវរៈដោយចោទប្រកាន់ពួកគាត់ពីបទញុះញង់ជាដើម ហើយខ្ញុំមើលឃើញថា ការចោទប្រកាន់នេះហាក់ដូចជាមិនសមហេតុផល ហើយមើលទៅផ្ទុយអំពីគោលការណ៍ច្បាប់ ដែលធានាដោយរដ្ឋធម្មនុញ្ញហើយ និងកតិកាសញ្ញាស្ដីអំពីសិទ្ធិពលរដ្ឋ និងសិទ្ធិនយោបាយ » ។
លោក ស មូរី រិះគន់ថា ក្នុងទាមទាររបស់យុវជនក្រុមថាវរៈកន្លង រដ្ឋាភិបាល ឬសមត្ថកិច្ចបានប្រើកម្លាំង និងសិទ្ធិអំណាចហួសហេតុ និងខកខានក្នុងការបំពេញកាតព្វកិច្ចនៃការគោរពសិទ្ធិមនុស្ស។
ក្នុងការទាមទាររបស់យុវជនក្រុមថាវរៈឱ្យមានការដោះលែង លោក រ៉ុង ឈុន សមត្ថកិច្ច បានបង្ក្រាបដោយហិង្សា និងបានចាប់ឃុំខ្លួនយុវជននៃក្រុមនេះចំនួនពីររូប គឺលោក ហ៊ុន វណ្ណៈ និងអ្នកនាង ឈឿន ដារ៉ាវី ដោយចោទប្រកាន់ពីបទ ពីបទញុះញង់ឲ្យមានភាពវឹកវរដល់សង្គម ក្នុងនោះដែរក៏បានចាប់ខ្លួន ប្រធានគណបក្សខ្មែរឈ្នះ លោក សួង សុភ័ណ្ឌ ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។