អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន សាលាដំបូងរាជធានីភ្នំពេញសម្រេចឃុំខ្លួនជនជាតិចិនចំនួន ២៩នាក់ពាក់ព័ន្ធ នឹងសំណុំរឿងចាប់ជំរិតទារប្រាក់ទៅលើជនជាតិចិនដូចគ្នាកាលពីថ្ងៃទី១២ សីហាកន្លងទៅ។ លោកនិយាយថា នៅថ្ងៃទី១៩ សីហា តុលាការក៏សម្រេចឃុំខ្លួន ជនជាតិចិន ៣នាក់ផ្សេងទៀតជាប់ពាក់ព័ន្ធ ធ្វើឲ្យស្ត្រីជនជាតិវៀតណាមម្នាក់បង្ខំចិត្តរត់ចេញពីអគារកម្ពស់៥ជាន់បណ្ដាលឲ្យធ្លាក់ចុះមកក្រោម រហូតដល់រងរបួសជាទម្ងន់។
អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន ប្រាប់អាស៊ីសេរីថា ជនជាតិចិនទាំងអស់សរុបចំនួន ៣២ នាក់ ត្រូវតុលាការចោទប្រកាន់ពីបទ «ចាប់ជំរិត និងគំរាមយកប្រាក់» និងបង្ខាំងមនុស្សខុសច្បាប់ដើម្បីជំរិតទារ ប្រាក់ ហើយតុលាការបានចេញដីកាសម្រេចឃុំខ្លួន ជនជាតិចិនទាំងនោះនៅក្នុងពន្ធនាគារដើម្បីរង់ចាំជំនុំជម្រះទោស៖ « អត់ទាន់ចាប់ខ្លួនបានទេ ជនជាតិចិន ៣នាក់ផ្សេងទៀតនោះ យើងកំពុងស្វែងរកចាប់ខ្លួន។ដោយឡែកអ្នកដែលត្រូវបានចាប់ខ្លួន តុលាការបានសម្រេចឃុំខ្លួនហើយ។ចោទប្រកាន់ពីបទ ចាប់ជំរិត គំរាមយកប្រាក់។ ក៏ប៉ុន្តែការចោទប្រកាន់ជាដីកា ឃុំខ្លួនទេ នៅពេលសវនាការគេចោតប្រកាន់យ៉ាងណានោះ សំខាន់ទៅលើភស្តុតាងដែលយើងប្រមូលបានដែលបញ្ជូនទៅតុលាការ ដើម្បីដាក់បន្ទុកទៅលើបទល្មើស » ។
កងរាជអាវុធហត្ថលើផ្ទៃប្រទេសកាលពីថ្ងៃទី១២ សីហា កន្លងទៅនេះបានឆ្មក់ចូលក្នុងសណ្ឋាគារមួយក្នុងសង្កាត់ចតុមុខ ហើយចាប់ខ្លួនជនជាតិចិនចំនួន២៩នាក់ ក្រោយពីសង្ស័យថា ពួកគេបានធ្វើសកម្មភាពចាប់ជំរិតទារប្រាក់ជនជាតិចិនដូចគ្នាមិនបានសម្រេច។
ដោយឡែកនៅក្នុងសំណុំរឿងជនជាតិចិនដូចគ្នានេះដែរ សមត្ថកិច្ចកំពុងស្វែងរកចាប់ខ្លួនជនសង្ស័យជនជាតិចិន ៣នាក់ផ្សេងទៀតក្រោយពីបានចាប់ស្រ្តីជនជាតិវៀតណាមម្នាក់យកទៅបង្ខាំងទុកដើម្បីជំរិតទារប្រាក់ និងរំលោភសេពសន្ថវៈ។
សមត្ថកិច្ចនិយាយថា ជនជាតិចិនសរុបមានគ្នាចំនួន៦នាក់ជាប់ទាក់ទិន នឹងការបង្ខាំងស្ត្រីជនជាតិវៀតណាមជំរិតទារប្រាក់ និងរំលោភសេពសន្ថវៈ។ប៉ុន្តែសមត្ថកិច្ចចាប់ខ្លួនបាន៣នាក់ នៅសល់៣នាក់ទៀតកំពុងរត់គេចខ្លួន។
ការចាប់ខ្លួនជនជាតិចិនទាំង៣នាក់នេះបានកើតឡើងក្រោយពីស្ត្រីជនជាតិវៀតណាមម្នាក់ដែលសង្ស័យថា ជាស្ត្រីកំណាន់របស់ជនជាតិចិន បានសម្រេច សម្រូតចុះតាមបង្អួចពីលើអគារ មានកម្ពស់៥ ជាន់មានទីតាំងនៅ ផ្សារថ្មីទី៣ ខណ្ឌដូនពេញ ដើម្បីគេចចេញពីការធ្វើបាប និងកេងប្រវ័ញ្ច ផ្លូវភេទពីជនជាតិចិនទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។