តុលាការក្រុងភ្នំពេញចាប់ផ្តើមសាកសួរជនជាតិចិនចំនួន ៣៣នាក់ពាក់ព័ន្ធ នឹងសំណុំរឿងចាប់ជំរិតទារប្រាក់ និងធ្វើឲ្យស្ត្រីជនជាតិវៀតណាមម្នាក់បង្ខំចិត្តរត់ចេញពីអគារកម្ពស់ ៥ជាន់បណ្ដាលឲ្យធ្លាក់ចុះមកក្រោម រហូតដល់រងរបួសជាទម្ងន់។ មន្ត្រីជាន់ខ្ពស់ប៉ូលិស និយាយថា សមត្ថកិច្ចកំពុងស្វែងរកចាប់ខ្លួនជនជាតិចិន ៣នាក់បន្ថែមទៀតនៅក្នុងសំណុំរឿងនេះ។
អ្នកនាំពាក្យតុលាការក្រុងភ្នំពេញលោក គុជ គឹមឡុង បញ្ជាក់ថា តុលាការត្រូវការពេលវេលាជាច្រើនថ្ងៃដើម្បីសាកសួរជនជាតិចិនចំនួន ៣៣នាក់ នៅក្នុងសំណុំរឿងពីរដាច់ដោយឡែកៗ ពីគ្នា។ ប៉ុន្តែលោកមិនបានបញ្ជាក់ថា តើតុលាការនឹងបញ្ចប់នីតិវិធីសាកសួររបស់ខ្លួន នៅពេលណាទេ៖ « រឿងទាំងពីរបានបញ្ជូនមកដល់តុលាការយើងហើយ ខាងព្រះរាជអាជ្ញាកាន់សំណុំរឿងកំពុង ពិនិត្យ នឹងសាកសួរតាមនីតិវិធីនៅឡើយ។ បើមានការសម្រេចយ៉ាងណាខ្ញុំនឹងជូនព័ត៌មានទៀត » ។
កងរាជអាវុធហត្ថលើផ្ទៃប្រទេសកាលពីថ្ងៃទី១២ សីហា កន្លងទៅនេះបានឆ្មក់ចូលក្នុងសណ្ឋាគារមួយក្នុងសង្កាត់ចតុមុខ ហើយចាប់ខ្លួនជនជាតិចិនចំនួន ២៩នាក់ ក្រោយពីសង្ស័យថា ពួកគេបានធ្វើសកម្មភាពចាប់ជំរិតទារប្រាក់ជនជាតិចិនដូចគ្នាមិនបានសម្រេច។
សមត្ថកិច្ចបានឲ្យដឹងថា ដើម្បីហេតុដែលនាំទៅរកការចាប់ខ្លួននេះដោយសារតែមានពាក្យបណ្ដឹងពីក្រុមគ្រួសារជនរងគ្រោះ រស់នៅក្នុងប្រទេសចិនដែលបានប្ដឹងមកសមត្ថកិច្ចកម្ពុជាឲ្យស្វែងរកចាប់ខ្លួនជនសង្ស័យយកមកផ្ដន្ទាទោសតាមច្បាប់។
ដោយឡែកនៅក្នុងសំណុំរឿងជនជាតិចិនដូចគ្នានេះដែរ អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន ប្រាប់អាស៊ីសេរីថា សមត្ថកិច្ចកំពុងស្វែងរកចាប់ខ្លួនជនសង្ស័យជនជាតិចិន ៣នាក់ផ្សេងទៀត ក្រោយពីបានចាប់ស្ត្រីជនជាតិវៀតណាមម្នាក់យកទៅបង្ខាំងទុកដើម្បីជំរិតទារប្រាក់ និងរំលោភសេពសន្ថវៈ។ លោកនិយាយថា ជនជាតិចិនទាំងអស់មានគ្នាចំនួន ៦នាក់ជាប់ទាក់ទិន នឹងការបង្ខាំងស្ត្រីជនជាតិវៀតណាមជំរិតទារប្រាក់ និងរំលោភសេពសន្ថវៈ។ ប៉ុន្តែសមត្ថកិច្ចចាប់ខ្លួនបាន ៣នាក់ នៅសល់ ៣នាក់ទៀតកំពុងរត់គេចខ្លួន៖ « បញ្ជូនទៅតុលាការ ហើយនៅប៉ុន្មាននាក់ទៀតយើងកំពុងស្វែងរកចាប់ខ្លួន » ។
ការចាប់ខ្លួនជនជាតិចិនទាំង ៣នាក់នេះបានកើតឡើងក្រោយពីស្ត្រីជនជាតិវៀតណាមម្នាក់ដែលសង្ស័យថា ជាស្ត្រីកំណាន់របស់ជនជាតិចិន បានសម្រេច សម្រូតចុះតាមបង្អួចពីលើអគារ មានកម្ពស់ ៥ជាន់មានទីតាំងនៅ ផ្សារថ្មីទី៣ ខណ្ឌដូនពេញ ដើម្បីគេចចេញពីការធ្វើបាប និងកេងប្រវ័ញ្ច ផ្លូវភេទពីជនជាតិចិនទាំងនោះ។
លោក ឆាយ គឹមឃឿន បានដឹងថា ជនរងគ្រោះបានយកភួយ និងកន្សែង មកចងប្រទាក់គ្នាធ្វើជាខ្សែ ចងតាមបង្អួចដើម្បីគេចចេញពីអគារស្នាក់នៅ ប៉ុន្តែនៅពេលដែលកន្សែងនោះដាច់បណ្ដាលឲ្យធ្លាក់មកក្រោមរហូតដល់មានរបួសធ្ងន់ ហើយបច្ចុប្បន្នកំពុងសម្រាកព្យាបាលនៅក្នុងមន្ទីរពេទ្យកាល់ម៉ែត្រ។
ជនជាតិចិនក្នុងរយៈពេលដើមខែសីហា នេះបានប្រព្រឹត្តបទល្មើសជាប់ៗ គ្នា ទាំងនៅក្នុងទីក្រុងភ្នំពេញ ខេត្តបន្ទាយមានជ័យ និងខេត្តព្រះសីហនុ ដោយមិនខ្លាចញញើតច្បាប់ក្នុងប្រទេសកម្ពុជា។សមត្ថកិច្ចខេត្តព្រះសីហនុ កាលពីថ្ងៃទី១០ សីហាកន្លងទៅ ចាប់ខ្លួនជនជាតិចិនចំនួន ៤នាក់នៅក្នុងសណ្ឋាគារមួយកន្លែង មានទីតាំងនៅក្នុងសង្កាត់លេខ៣ ក្រុងព្រះសីហនុ ក្រោយពីលោកបានទទួលពាក្យបណ្ដឹងថា មានរងគ្រោះម្នាក់ត្រូវជនសង្ស័យដាក់ថ្នាំសណ្ដំដើម្បីជំរិតទារប្រាក់។
សមត្ថកិច្ចនិយាយថា ជនសង្ស័យបានដាក់ថ្នាំសណ្តំ ក្នុងស្រាបៀដើម្បីឱ្យជនរងគ្រោះផឹក រួចហើយនៅពេលដែលបាត់បង់ស្មារតីចងចាំ។ ជនសង្ស័យបានបង្ខំឲ្យជនរងគ្រោះវេរលុយចូលក្នុងគណនីសង្ស័យ តាមបណ្ដាញសង្គម វីឆាត (wechat) ដែលមានទឹកប្រាក់ជាង ៦ម៉ឺនដុល្លារ។
ព្រះរាជអាជ្ញារងខេត្តព្រះសីហនុលោក ហួត វិចិត្រ ប្រាប់អាស៊ីសេរីថា តុលាការកាលពីថ្ងៃទី១៣ សីហា បានសម្រេចឃុំខ្លួនជនជាតិចិនចំនួន ៤នាក់ពីបទ «លួច» តាមមាត្រា ៣៥៣ និង ៣៥៦ នៃក្រមព្រហ្មទណ្ឌ។ ការចោទប្រកាន់នេះធ្វើឡើងក្រោយពេលតុលាការបានប្រើពេលវេលាចំនួនពីរថ្ងៃដើម្បីសាកសួរជនជាតិចិន ៤នាក់ក្រោយពីបានដាក់ថ្នាំ សណ្តំ ទៅលើជនជាតិចិនដូចគ្នាដើម្បីជំរិតទារ ប្រាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។