ក្រុម​យុវជន ព្រមាន​ពី​ការ​ផ្ទុះ​បាតុកម្ម​ទ្រង់ទ្រាយ​ធំ ក្រោយ​អាជ្ញាធរ​បង្ក្រាប និង​ចាប់​ខ្លួន​អ្នក​តវ៉ា​ដោះ​លែង​លោក រ៉ុង ឈុន

ដោយ សេក បណ្ឌិត
2020-08-14
Share
យុវជន​ខ្មែរ​ថាវរៈ ធ្វើ​យុទ្ធនាការស្រឡាញ់​ជាតិ​ 081220 ក្រុម​យុវជន​ខ្មែរ​ថាវរៈ ប្រមាណ ២០នាក់ ធ្វើ​យុទ្ធនាការ​បំផុស​ប្រជាពលរដ្ឋ ឱ្យ​ចូលរួម​ស្រឡាញ់​ជាតិ ដើម្បី​ការពារ​ទឹកដី នៅ​ថ្ងៃ​ទី១២ ខែសីហា ឆ្នាំ២០២០។
រូប៖ ពលរដ្ឋ

ក្រុម​យុវជន​ទាំង​ក្នុង​ និង​ក្រៅ​ប្រទេស​មួយ​ចំនួន ​បង្ហាញ​ការ​ខឹង​សម្បារ​កាន់​តែ​ខ្លាំង ​និង​ព្រមាន​ពី​ការ​ធ្វើ​បាតុកម្ម​ទ្រង់ទ្រាយ​ធំ​ប្រឆាំង​នឹង​រដ្ឋាភិបាល​លោក ​ហ៊ុន​ សែន​ ដែល​បាន​បង្ក្រាប​ និង​ចាប់​ខ្លួន​យុវជន​ដែល​តវ៉ា​អហិង្សា​ទាមទារ​ឲ្យ​ដោះ​លែង​លោក ​រ៉ុង​ ឈុន។ ទោះ​យ៉ាង​ណា មន្ត្រី​ជាន់​ខ្ពស់​រដ្ឋាភិបាល ​ព្រមាន​ថា ប្រសិនបើ​ក្រុម​យុវជន ហ៊ាន​ធ្វើ​សកម្មភាព​តវ៉ា​ដូច​ការ​អះអាង​ថា ​នឹង​ត្រូវ​ប្រ​ឈម​មុខ​ចំពោះ​មុខ​ផ្លូវ​ច្បាប់។

ក្រុមយុវជន​ទាំង​ក្នុង និង​ក្រៅ​ប្រទេស​មួយ​ចំនួន កំពុងធ្វើ​ចលនា​កៀរគរ​កម្លាំង​ធ្វើ​បាតុកម្ម​ទ្រង់ទ្រាយ​ធំ​ ប្រសិនបើ​រដ្ឋាភិបាល​ មិនព្រម​ដោះលែង​យុវជន​ខ្មែរ​ថាវរៈ ​និង​មេ​ដឹក​នាំ​សហជីព ​លោក​ រ៉ុង​ ឈុន ឲ្យ​មាន​សេរីភាព​ឡើងវិញ​ទេ​នោះ។

សមាជិក​ក្រុម​យុវជន​ខ្មែរ​ថាវរៈ​រស់​នៅ​រាជធានី​ភ្នំពេញ​ លោក វាន់ ចាន់ធឿន ថ្លែង​ទាំង​ឈឺ​ចាប់​ថា​ លោក ​នៅ​តែ​រក្សា​ជំហរ​ធ្វើ​បាតុកម្ម​ដដែល​ដោយ​មិន​បាក់ស្បាត ឬ​រាថយ​នោះ​ទេ ​ទោះបីជា​រដ្ឋាភិបាល​ ប្រើ​កង​កម្លាំង​សមត្ថកិច្ច និង​កង​សន្តិ​សុខ​វាយ​បង្ក្រាប ​និង​ចាប់​ខ្លួន​អ្នក​តវ៉ា​អហិង្សា​ជា​បន្ត​បន្ទាប់​ក៏​ដោយ។ លោក ​អំពាវ​នាវ​ឲ្យ​ពលរដ្ឋ​រង​គ្រោះ​ដីធ្លី​ និង​ពលរដ្ឋ​គ្រប់​និន្នាការ​នយោបាយ​ចូលរួម​ធ្វើ​បាតុកម្ម​ឲ្យ​បាន​ស្រុះគ្នា​ទាមទារ​ឲ្យ​រដ្ឋាភិបាល​ដោះលែង​លោក រ៉ុង ឈុន និង​ក្រុម​យុវជន​ខ្មែរ​ថាវរៈ​ដែល​លោក ​ចាត់ទុកថា ​ជា​អ្នកស្នេហាជាតិ​ពិត​ប្រាកដ៖ «ខ្ញុំ​គិត​ថា វា​ដល់​ពេល​មិន​ត្រូវ​ខ្លាច​ទៀត​ទេ  ហើយ​ខ្ញុំ​គិត​ថា ខ្ញុំ​អត់​ខ្លាច​ទេ។ ខ្ញុំ​រង់ចាំ​មើល​គេ​ដោះ​លែង វណ្ណៈ សិន»

យុវជន​មួយ​រូប​ទៀត​ជាជាង​ជួសជុល​កាមេរ៉ា​សុវត្ថិភាព រស់​នៅ​ខេត្ត​សៀមរាប​ លោក នង ធារ៉ា ​និយាយ​ថា លោក កាន់តែ​ឈឺចាប់ ​និង​សោក​ស្ដាយ​បំផុត​ដែល​អាជ្ញាធរ​រដ្ឋាភិបាល ​ធ្វើបាប​និង​ចាប់ខ្លួន ​ក្រុម​យុវជន​ដែល​គ្រាន់​តែ​ប្រើប្រាស់​សិទ្ធិ​សេរីភាព​ស្របតាម​ច្បាប់​ទាមទារ​ឲ្យ​ដោះលែង​លោក រ៉ុង ឈុន៖ «ខ្ញុំ​មាន​ការ​ឈឺ​ចាប់​ជា​ខ្លាំង​ពន់ពេក ហើយ​ប្រសិន​បើ​មាន​សកម្មភាព​តវ៉ា​ណា​ទៀត ខ្ញុំ​នឹង​ចូលរួម​ឲ្យ​សកម្ម ដើម្បី​ទាមទារ​ឲ្យ​មាន​ការ​ដោះ​លែង​ពួក​គាត់​ទាំង​អស់​គ្នា ទាំង​លោក​គ្រួ រ៉ុង ឈុន ទាំង​លោក ហ៊ុន វណ្ណៈ និង ឈឿន ដារ៉ាវី ហើយ​នឹង​សកម្មជន​ដទៃ​ទៀត ដូច​ជា សកម្មជ​នយោបាយ​ទាំង ១៧នាក់​នោះ​ផង​ដែរ»

រីឯ​ក្រុម​យុវជន​គាំទ្រ​គណបក្ស​សង្គ្រោះ​ជាតិ​នៅ​ក្រៅ​ប្រទេស​មួយ​ចំនួន ក៏​ប្រកាស​វិលត្រឡប់​ចូល​ប្រទេស​កម្ពុជា​​វិញ ​ដើម្បី​ចូលរួម​តវ៉ា​ជាមួយ​យុវជន​នៅ​ក្នុង​ប្រទេស​ផង​ដែរ។

យុវជន ​គង់​ រ៉ៃយ៉ា ​ដែល​កំពុង​ភៀស​ខ្លួន​នៅ​ប្រទេស​ថៃ​ ថ្លែង​ថា ​លោក​មិន​អាច​ទ្រាំ​ឈរ​មើល​អាជ្ញាធរ ​រដ្ឋាភិបាល ​ធ្វើបាប​យុវជន​ដែល​ស្នេហាជាតិ​តទៅទៀត​បាន​ទេ។ លោក ​ប្ដេជ្ញា​ចិត្ត​ថា ​នឹង​វិល​ត្រឡប់​ទៅ​កម្ពុជា​វិញ​យ៉ាង​យូរ ៧ថ្ងៃ​ទៀត ​ទោះបីជា​ត្រូវ​ប្រឈម​ជាប់​ពន្ធនាគារ​ជា​លើក​ទី៣ ក្ដី ​ដើម្បី​ចូលរួម​តវ៉ា​ឲ្យ​អាជ្ញាធរ​ និង​តុលាការ​អនុវត្ត​ច្បាប់​ឲ្យបាន​ត្រឹមត្រូវ ​និង​ឈប់​ធ្វើ​ទុក្ខ​បុក​ម្នេញ​លើ​អ្នក​ដែល​មាន​ទស្សនៈ​ប្រឆាំង​តទៅ​ទៀត៖ «ក្នុង​នាម​ជា​យុវជន​ដូច​គ្នា​ហើយ​ពួក​គាត់​មួយ​ចំនួន​ជា​មិត្តភ័ក្ដិ​របស់​ខ្ញុំ​ផង។ ខ្ញុំ​ឈឺ​ចាប់​មែនទែន​ដែល​ទង្វើអស់​ទាំង​នេះ ធ្លាប់​ប្រព្រឹត្ត​មក​លើ​ខ្ញុំ​ដល់​តែ​ពីរ​ដង។ ខ្ញុំ​គិត​ថា ការ​អនុវត្ត​នេះ​វា​បំពាន​ច្បាប់​ខ្លាំង​មែនទែន ដោយ​មិន​ដឹង​ថា គាត់​យក​ច្បាប់​អី​មក​សូត្រ ហើយ​មិន​ដឹង​ថា វា​មាន​កំហុស​កន្លែង​ណា។ ការ​អនុវត្ត​ច្បាប់​នេះ​វា​បំពាន​ហួសហេតុ ដែល​មិន​អាច ឲ្យ​ខ្ញុំ​ឈរ​មើល​បាន ដូច្នេះ​ដាច់ខាត ត្រូវ​តែ​ទៅ​ចូលរួម»

ជា​មួយ​គ្នា​នេះ ​យុវជន​គណបក្ស​សង្គ្រោះ​ជាតិ​ លោក ​នាង ​សុឃុន ​ថ្លែង​ថា ​លោក ​បាន​ត្រៀម​ខ្លួន​រួច​ជា​ស្រេច​ដូច​យុវជន​ដទៃ​ទៀត​ដែរ ដើម្បី​ងើបឡើង​ប្រឆាំង​នឹង​អំពើ​អយុត្តិធម៌​នៅ​ក្នុង​សង្គ​ម​កម្ពុជា។  លោក​អំពាវនាវ​ឲ្យ​ពលរដ្ឋ​ខ្មែរ​គ្រប់រូប ​ជាពិសេស យុវជន​ ងើប​ឡើង​ឲ្យ​បាន​ស្រុះ​គ្នា ក្នុង​ពេល​តែ​មួយ៖ «យើង​បាន​សម្រេច​ចិត្ត​ជា​យូរ​ណាស់​មក​ហើយ​ពេល​វេលា​នឹង​បង្ហាញ​ឲ្យ​ឃើញ​ក្នុង​ពេល​ឆាប់ៗ ខាង​មុខ​នេះ។ យុវជន​ខាង​ក្នុង​មិន​អាច​ឱប​ដៃ​ឈរ​មើល​យុវជន ខាង​ក្រៅ ហើយ​យុវជន​ខាង​ក្រៅ​មិន​អាច​ឱប​ដៃ​ឈរ​មើល​យុវជន​ខាង​ក្នុង​បាន​ទេ ហើយ​យើង​មិន​អាច​នៅ​ប្រចាំ​គ្នា​បាន​ទេ យើង​ត្រូវ​តែ​ងើប​ព្រមៗ គ្នា​ដើម្បី​បញ្ចប់​របប​ផ្ដាច់ការ បញ្ចប់​អំពើ​និទណ្ឌភាព និង​បញ្ចប់​អំពើ​ចាប់​មនុស្ស​ដោយ​គ្មាន​កំហុស បញ្ចប់​អំពើ​អយុត្តិធម៌​នៅ​ក្នុង​សង្គម​ឲ្យ​ទាន់​ពេល​វេលា​កុំ​ឲ្យ​អំពើ​អយុត្តិធម៌​វា​ធ្លាក់​ដល់​ឈាម​ជ័រ​ខ្មែរ​យើង​បន្ត​ទៀត»

យុវជន​គណបក្ស​សង្គ្រោះ​ជាតិ​មួយ​រូប​ទៀត គឺ​លោក វឿង សំណាង​ លើក​ឡើង​ថា ​ទង្វើ​ឃោរឃៅ​របស់​អាជ្ញាធរ​រដ្ឋាភិបាល​ក្នុង​ពេល​ថ្មីៗ នេះ​ កាន់​តែ​ដុត​កំហឹង ​និង​កាន់​តែ​ធ្វើ​ឲ្យ​លោក​ពុះ​កញ្ជ្រោល​បន្ថែម​ទៀត​ក្នុង​ការ​វិល​ត្រឡប់​ទៅ​កម្ពុជា​វិញ​ ទោះ​បី​ជា​ប្រឈម​ការ​គំរាម​កំហែង និង​ការ​បាត់បង់​សេរីភាព​ក៏​ដោយ៖ «យើង​សម្រេច​ថា​យើង​ទៅ។ គោលដៅ​របស់​យើង គឺ​ប្រទេស​កម្ពុជា ដើម្បី​រំដោះ​សិទ្ធិ​សេរីភាព​ជូន​លោកគ្រួ រ៉ុង ឈុន ដែល​គាត់​ជា​មនុស្ស​ស្អាត​ស្អំ គាត់​បម្រើ​ផលប្រយោជន៍​ឲ្យ​ប្រជាជន​ខ្មែរ និង​កម្មករ​រោងចក្រ។ ខ្ញុំ​ជា​យុវជន​មិន​អាច​ឈរ​ជើង​បាន​ទេ ពេល​ឃើញ​ការ​រំលោភ​សិទ្ធិមនុស្ស​បែប​នេះ»

ចំណែក​យុវជន​ដែល​ជា​ពលករ​នៅ​ប្រទេស​កូរ៉េ​ខាង​ត្បូង ​លោក ​ឃ្លូក ​លៀព ​ប្រាប់​អាស៊ី​សេរី​ថា​ ការ​ចាប់​ខ្លួន​លោក​ រ៉ុង ​ឈុន បាន​ធ្វើ​ឲ្យ​ពួក​លោក​ជា​ពលករ​នៅ​កូរ៉េ​ឈឺ​ចាប់​ខ្លាំង​រួច​ទៅ​ហើយ ដូច្នេះ​ការ​ចាប់ខ្លួន​ក្រុម យុវជន​ដែល​តវ៉ា​ដោយ​សន្តិវិធី ​គឺ​កាន់​តែ​បន្ថែម​ភាព​ឈឺ​ចាប់​ដល់​ពួក​លោក​បន្ថែម​ទៀត។ លោក អះអាង​ថា ពួក​លោក​ មិន​អាច​ឱប​ដៃ​ឈរ​មើល​ទង្វើ​រំលោភ​បំពាន​របស់​អាជ្ញាធរ​បាន​ទៀត​ ហើយ​ពួក​លោក នឹង​ព្យាយាម​ធ្វើ​បាតុកម្ម​តាម​វិធី​ផ្សេងៗ ដើម្បី​បញ្ចេញ​កំហឹង​ឈឺចាប់ ​បើ​ពុំ​នោះ​ទេ ​លោក​អាច​នឹង​ស្ទះ​ទ្រូង​ស្លាប់៖ «របប​លោក ហ៊ុន សែន កាន់​តែ​ឃោរ​ឃៅ​ចាប់​យុវជន ចាប់​យុវតី ដែល​ពួក​គាត់​ចេញ​មុខ​ធ្វើ​បាតុកម្ម​ស្រែក​ទាមទារ​ដោយ​អហិង្សា​ដោយ​សន្តិវិធី បែរ​ជា​ប្រើ​សន្តិសុខ បាតដៃ​ទី៣ វាយ​ដំ​ច្រំ​ធាក់ ហើយ​លួច​កាបូប​លួច​អី​គាត់​ហើយ​បៀតបៀន​កេរ្តិ៍ខ្មាស​របស់​គាត់​ជា​ក្មេង​ស្រីៗ ទៀត គឺ​នេះ​ជា​អំពើ​អសីលធម៌ ដែល​គួរ​ឲ្យ​ស្អប់​ខ្ពើម​បំផុត ដែល​យើង​មិន​អាច​ទទួល​យក​បាន​ទេ។ យើង​នឹង​ធ្វើ​សកម្មភាព​តស៊ូ​មតិ​ទោះ​ជា​ក្នុង​រូបភាព​ណា​ក៏​ដោយ ។ដោយសារ​តែ​នៅ​ក្នុង​ប្រទេស​កូរ៉េ មាន​ជំងឺ​កូរ៉ូណា គេ​ហាម​មិន​ឲ្យ​មាន​ការ​ជួបជុំ​គ្នា​ច្រើន តែ​យើង​នៅ​តែ​គ្រោង​ធ្វើ​មហា បាតុកម្ម​មុខ​ស្ថានទូត​ខ្មែរ ដើម្បី​បង្ហាញ​ការ​ឈឺ​ចាប់ របស់​យុវជន​ខ្មែរ​នៅ​កូរ៉េ មិន​អាច​ឈរ​ឱប​ដៃ​មើល​លោក ហ៊ុន សែន ធ្វើ​អ្វី​តាម​តែ​អំពើ​ចិត្ត​កាន់​តែ​ឃោរឃៅ​ខ្លាំង​ឡើងៗ បាន​ទៀត​នោះ​ទេ»

ឆ្លើយតប​រឿង​នេះ អ្នក​នាំ​ពាក្យ​ក្រសួង​យុត្តិធម៌ ​លោក​ ជិន​ ម៉ាលីន ព្រមាន​ថា ​រដ្ឋាភិបាល ​នឹង​ចាត់​វិធានការ​ច្បាប់​បន្ត​ទៀត ប្រសិនបើ​ក្រុម​យុវជន​ ហ៊ាន​ធ្វើ​សកម្មភាព​តវ៉ា​ដូច​ការ​អះអាង​របស់​ពួក​គេ​មែន៖ «ការ​ខឹង​សម្បារ​ការ​ធ្វើ​បាតុកម្ម​ដោយ​ខុស​ច្បាប់​បង្ក​នៅ​ភាព​ចលាចល វា​មិន​មែន​ជា​មធ្យោបាយ​ស្រប​ច្បាប់ ដែល​ជួយ​ដល់​ជន​ជាប់​ចោទ​នោះ​ទេ។ អ៊ីចឹង​ទេ ការ​ធ្វើ​សកម្មភាព​ទាំង​អស់​នេះ នឹង​បន្ត​ប្រឈម និង​ការ​ទទួល​ខុស​ត្រូវ​តាម​ផ្លូវ​ច្បាប់​ជា​ធរមាន»

ទាក់​ទង​នឹង​ការ​សកម្មភាព​របស់​​ក្រុម​យុវជន​ដែល​តវ៉ា​ឱ្យ​ដោះលែង​លោក រ៉ុង ឈុន នេះ នាយិកា​មជ្ឈមណ្ឌល​សិទ្ធិមនុស្ស​កម្ពុជា ​អ្នកស្រី ​ចក់ ​សុភាព អះអាង​លើ​ហ្វេសប៊ុក (Facebook) ថា តាម​ច្បាប់​ជាតិ និង​អន្តរជាតិ ​អាជ្ញាធរ​មាន​កាតព្វកិច្ច​ធានា​ការពារ​ដល់​សន្តិសុខ និង​សុវត្ថិភាព​របស់​បាតុករ មិន​មែន​បង្ក្រាប​ដោយ​ហិង្សា និង​បៀតបៀន​លើ​រាងកាយ​របស់​យុវតី​ទាំង​នោះ​ឡើយ។ អ្នក​ស្រី​ចាត់​ទុក​ទង្វើ​ទាំងឡាយ​របស់​អាជ្ញាធរ ដូច​ជា ការ​ចាប់​ខ្លួន​ដោយ​ចោទ​ប្រកាន់​ពី​បទ​ញុះញង់ និង​ការ​លាប​ពណ៌​ពួក​គេ​ជា​ក្រុម​ប្រឆាំង ជាដើម​នោះ  គឺ​ជា​ការ​គំរាម​កំហែង​យ៉ាង​ធ្ងន់ធ្ងរ​ដល់​ការ​ចូលរួម​របស់​យុវជន​និង​ផ្ទុយ​ពី​ស្មារតី​នៃ​ច្បាប់​បាតុកម្ម​ដោយ​សន្តិវិធី ​ព្រមទាំង​គោលការណ៍​សិទ្ធិមនុស្ស។ អ្នកស្រី​បន្ថែម​ទៀត​ថា ​ រដ្ឋាភិបាល​កម្ពុជា​មាន​កាតព្វកិច្ច​ធានា​គោរព ​និង​ការពារ​សិទ្ធិមនុស្ស​ និង​ត្រូវ​បង្ក​បរិយាកាស​អំណោយ​ផល​ដល់​ពលរដ្ឋ​គ្រប់រូប​អាច​ប្រើប្រាស់​សិទ្ធិ​សេរីភាព​របស់​ខ្លួន​ដោយ​ពុំ​មាន​ការ​ភ័យខ្លាច​ ស្រប​តាម​រដ្ឋ​ធម្មនុញ្ញ និង​ច្បាប់​អន្តរជាតិ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។