អ្នក​ឃ្លាំមើល​ស្នើ​របប​លោក ហ៊ុន សែន ឲ្យ​ទប់ស្កាត់​ការ​ហូរ​ចូល​ដ៏​គំហុក​នៃ​ជនជាតិ​ចិន

ដោយ មួង ណារ៉េត
2018.12.26
Share on WhatsApp
Share on WhatsApp
ចិន​ចែក​ចាយ​រូប​អាសអាភាស ៦២២ ជនជាតិ​ចិន​៤​នាក់​ដែល​ត្រូវ​សមត្ថកិច្ច​ខេត្ត​ព្រះសីហនុ ឃាត់​ខ្លួន​ករណី​ចែក​ខិត្តប័ណ្ណ​ផ្សព្វផ្សាយ​អាជីវកម្ម​មាន​អាសអាភាស កាល​ពី​ថ្ងៃ​ទី២៤ ខែ​សីហា ឆ្នាំ​២០១៨។
រូបភាព​អគ្គស្នងការ​នគរបាល​ជាតិ

មន្ត្រី​ឃ្លាំមើល​កម្ពុជា សម្ដែង​ក្តី​ព្រួយបារម្ភ​កាន់តែ​ខ្លាំង ចំពោះ​វត្តមាន​ជនអន្តោប្រវេសន៍​ចិន​នៅ​កម្ពុជា។ មន្ត្រី​ដដែល​លើកឡើង​ថា ក្តី​បារម្ភ​នេះ គឺ​ដោយសារ​រយៈពេល​ពីរ​ឆ្នាំ​ចុង​ក្រោយនេះ អាជ្ញាធរ​កម្ពុជា ឲ្យ​ជន​ចិន​ហូរ​ចូល​មក​ប្រទេស​កម្ពុជា​យ៉ាង​គំហុក ដែល​បង្ក​បញ្ហា​សង្គម​ជាច្រើន។

តំណាង​ក្រុមប្រឹក្សា​ឃ្លាំមើល​កម្ពុជា និង​ជា​ប្រធាន​សហភាព​សហជីព​កម្ពុ​ជា​លោក រ៉ុង ឈុន ថ្លែង​នៅ​ក្នុង​សេចក្ដីថ្លែងការណ៍​របស់​ក្រុមប្រឹក្សា​ឃ្លាំមើល​កម្ពុជា កាលពី​ថ្ងៃទី២៦ ខែធ្នូ ថា កំណើន​ជនជាតិ​ចិន កាន់តែ​ច្រើន​ឡើង​ពី​មួយ​ថ្ងៃ​ទៅមួយ​ថ្ងៃ ធ្វើ​ឲ្យ​ខេត្ត​ក្រុង​មួយ​ចំនួន គ្មាន​សណ្ដាប់ធ្នាប់ និង​បង្ក​អសន្តិសុខ នាំ​ឲ្យ​ប៉ះពាល់​ដល់​ភ្ញៀវ​ទេសចរ​បរទេស និង​ក្នុងស្រុក នាំគ្នា​ភ័យខ្លាច​មិន​ទៅលេង​កម្សាន្ត ករណី​ដូចជា​ខេត្ត​ព្រះសីហនុ​ជាដើម។ លោក​បន្ថែម​ថា ជនជាតិ​ចិន នៅ​កម្ពុជា ក៏​ធ្វើ​ឲ្យ​ប៉ះពាល់​ដល់​មុខរបរ និង ការងារ​របស់​ប្រជាពលរដ្ឋ​ខ្មែរ​ដែរ ហើយ​បើ​របប​លោក ហ៊ុន សែន នៅ​តែ​មាន​ភាព​ធូរ​លុង ពុំ​មាន​ការទប់ស្កាត់​បែបនេះ មិន​យូរ​ទេ​ប្រជាពលរដ្ឋ​ខ្មែរ នឹង​ក្លាយទៅជា​ជនជាតិភាគតិច នៅ​លើ​ទឹកដី​កំណើត​របស់​ខ្លួន ជាក់​ជាមិនខាន៖ «បើសិនជា​មិន​មាន​វិធានការ​ច្បាស់លាស់ ជុំវិញ​បញ្ហា​អន្តោប្រវេសន៍​នេះ​ទេ វា​អាច​ធ្វើ​ឲ្យ​ប៉ះពាល់​កាន់តែ​ធ្ងន់ធ្ងរ​ឡើង។ ប្រទេស​កម្ពុជា​យើង​នឹង​អាច មាន​ហានិភ័យ​នៅ​ថ្ងៃ​ណាមួយ​ជាមិនខាន»

តំណាង​ក្រុមប្រឹក្សា​ឃ្លាំមើល​កម្ពុជា​ដដែល​ស្នើ​ឲ្យ​របប​លោក ហ៊ុន សែន ត្រូវ​មាន​វិធានការ​ទប់ស្កាត់ ចំពោះ​លំហូរ​ជនអន្តោប្រវេសន៍​ចិន​មក​កម្ពុជា ដើម្បី​រក្សា​សណ្ដាប់ធ្នាប់ សន្តិសុខ​សង្គម និង រក្សា​សុវត្ថិភាព​ដល់​ភ្ញៀវ​ទេសចរ​បរទេស និង​ទេសចរ​ក្នុងស្រុក រួម​ទាំង​រក្សា​មុខរបរ និង ការងារ​ជូន​ពលរដ្ឋ​ខ្មែរ។

អាស៊ីសេរី មិនទាន់​អាច​សុំ​ការ​ឆ្លើយតប​ពី​មន្ត្រី​នាំ​ពាក្យ​របប​លោក ហ៊ុន សែន បាន​នៅឡើយ​ទេ កាលពី​ថ្ងៃទី២៦ ខែ​ធ្នូ។

កន្លងមក​អាជ្ញាធរ​ខេត្ត​ព្រះសីហនុ ក៏​ធ្លាប់​បាន​រាយការណ៍​ទៅ​ក្រសួងមហាផ្ទៃ​ថា វត្តមាន​ជនជាតិ​ចិន​នៅ​ខេត្ត​នេះ បាន​បង្ក​បញ្ហា​សន្តិសុខ​ជាច្រើន​ករណី ដល់​ខេត្ត​ទេសចរណ៍​មួយ​នេះ​។ បច្ចុប្បន្ន​ភ្ញៀវ​ទេសចរ​ក្នុងស្រុក បាន​ចៀសវាង​ទៅលេង នៅ​ខេត្ត​ព្រះសីហនុ ដោយសារតែ​ក្តី​បារម្ភ​ពី​បញ្ហា​សន្តិសុខ និង​បញ្ហា​តម្លៃ​បន្ទប់​ស្នាក់នៅ ដែល​ឡើងថ្លៃ​ខ្លាំង​ជាដើម។

ប៉ុន្តែ ចំពោះ​មេដឹកនាំ​របប​សព្វថ្ងៃ​នេះ​វិញ មិន​ឈឺក្បាល​នឹង​ការ​ព្រួយបារម្ភ​ទាំងនេះ​ទេ។ មិន​តែ​ប៉ុណ្ណោះ លោក​ថែមទាំង​អួត​សរសើរ​ចិន មិន​ដាច់​ពី​មាត់។ លោក ហ៊ុន សែន បាន​សារភាព​ថា លោក​ដឹកនាំ​ប្រទេស​បច្ចុប្បន្ន​ខិត​ទៅ​រក​ចិន​កុម្មុយនិស្ត ព្រោះ​ងាយស្រួល​ធ្វើការ​ជាមួយ។ កាលពី​ខែ​ឧសភា កន្លង​ទៅ លោក ហ៊ុន សែន ថែមទាំង​ចំអក ដល់​អ្នក​ដែល​រិះគន់ វត្តមាន​ជនជាតិ​ចិន​នៅ​លើ​ទឹកដី​កម្ពុជា​ទៀត​ផង។ លោក​អះអាង​ថា ជនជាតិ​ចិន​មាន​វត្តមាន​ច្រើន​នៅ​កម្ពុជា គឺ​ដោយសារ​ការ​វិនិយោគ​របស់​ចិន​កើន​ឡើង​តែប៉ុណ្ណោះ៖ «បើ​បូក​ទាំង​វិនិយោគ​ស្អី​ផង ការដ្ឋាន​ដល់​រយ អ៊ីចឹង​មិន​ឲ្យ​ចិន​ច្រើន​យ៉ាងម៉េច? ដល់​តែ​ឃើញ​ចិន​មក​ច្រើន មក​ច្រណែន​ចិន​ឯណេះ​ទៅវិញ វា​សុទ្ធតែ​ថា​កម្ពុជា​ដឹកនាំ​ប្រទេស​ទៅ​ជិត​ចិន។ ចុះបើ​ចិន​គេ​ស្រួល​ជាមួយ​ខ្ញុំ មិន​ឲ្យ​ទៅ​ជិត​ជាមួយគ្នា​ឬ​យ៉ាងម៉េច?»

ចិន​ស្រួល​ជាមួយ​លោក ហ៊ុន សែន មែន ប៉ុន្តែ អ្នក​ដែល​ចំណេញ​ច្រើន គឺ​ភាគី​ចិន​ឯណោះ​ទៅវិញ​ទេ ព្រោះ​ពួកគេ​បាន​នាំ​អ្នក​ជំនាញ និង​វិស្វករ​ចិន មក​អនុវត្ត​គម្រោង​ជាច្រើន​របស់​ចិន​នៅ​កម្ពុជា។ ក្នុង​ស្ថានភាព​បែបនេះ ធនធានមនុស្ស ជាពិសេស​យុវជន​ខ្មែរ នៅតែ​មិនបាន​ផល​ច្រើន ពី​ការ​កសាង​សមត្ថភាព​ផ្នែក​គម្រោង​ទាំង​នោះ​ទេ។ ក្រោម​ការដឹកនាំ​របស់​លោក ហ៊ុន សែន រយៈពេល​ជាង ៣៤ ឆ្នាំ​កន្លង​មក​នេះ លោក ហ៊ុន សែន ខ្លួនឯង ក៏​ទទួលស្គាល់​ថា កម្ពុជា​នៅតែ​ខ្វះ​ធនធានមនុស្ស៖ «គឺ​យើង​ខ្វះ​នូវ​មូលធន​បញ្ញា។ ក្រុមហ៊ុន​មកពី​ក្រៅ​ប្រទេស ត្រូវ​បង្ខំចិត្ត​យក​បុគ្គលិក​មកពី​ក្រៅ​ប្រទេស មក​បម្រើការ​នៅ​ក្នុង​ប្រទេស​របស់​យើង គឺ​ចំណាយ​ខ្ពស់​ជាង ប៉ុន្តែ​គេ​សុខចិត្ត​យក ព្រោះ​ធនធាន​ខួរក្បាល​របស់​គេ​ខ្លាំង»

លោក រ៉ុង ឈុន ជំទាស់​យ៉ាង​ខ្លាំង ទៅ​នឹង​ការណ៍​ដែល​កម្ពុជា នៅតែ​ត្រូវ​យក​ជនបរទេស មក​ដណ្ដើម​ទីផ្សារ​ការងារ​យុវជន និង​ពលរដ្ឋ​ខ្មែរ។ លោក​ថា រាល់​ទំនាក់ទំនង​ជាមួយ​បរទេស​ដូចជា​ចិន​នេះ កម្ពុជា​ត្រូវ​ឈរ​លើ​គោលជំហរ​ច្បាស់លាស់ ឈរ​លើ​គោលការណ៍ ដែល​គិត​ប្រយោជន៍​ជាតិ​ជាធំ​។ មន្ត្រី​ឃ្លាំមើល​កម្ពុជា​រូប​នេះ បន្ថែម​ថា​ទំនាក់ទំនង​ជាមួយ​ចិន មើល​ទៅ​បាន​ចំណេញ​ប្រយោជន៍​តែ​បក្សពួក ក្រុម​របស់​លោក ហ៊ុន សែន ច្រើនជាង​ប្រយោជន៍​ពលរដ្ឋ​ទូទៅ៖ «បើ​យើង​និយាយ​ពី​ច្បាប់​វិនិយោគទុន​វិញ អ្នកវិនិយោគទុន​ក៏​មិន​អាច​យក​កម្មករ​របស់​ខ្លួន​មក​តាម​ដូច្នេះ​ទេ ភាគច្រើន​គេ​យក​តែ​អ្នក​ជំនាញ ចំណែក​កម្លាំង​ពលកម្ម គេ​ប្រើ​កម្លាំង​ពលកម្ម​របស់​ខ្មែរ​យើង​។ យើង​ឃើញ​វត្តមាន​អន្តោប្រវេសន៍​ចិន​មួយ​ចំនួន មិនមែន​ជា​កម្មករ​ជំនាញ ហើយក៏​មិនមែន​មក​ធ្វើជា​កម្មករ​ដែរ ប៉ុន្តែ​មកលេង​ល្បែង និង​បង្ក​ភាព​អនាធិបតេយ្យ បង្ក​ភាព​អសន្តិសុខ និង​បង្ក​បញ្ហា​អ​សណ្ដាប់ធ្នាប់​ជាដើម»

ក្នុង​រយៈពេល​ពីរ​ឆ្នាំ​ចុងក្រោយ​នេះ បញ្ហា​អសន្តិសុខ ការ​ឆក់ប្លន់ ដេញ​កាប់​ចាក់​គ្នា ជួញដូរ​គ្រឿងញៀន ភាព​អនាធិបតេយ្យ ការ​ឆបោក​តាម​បណ្ដាញ​អ៊ីនធឺណិត ការ​បើក​មុខរបរ​អនាចារ ការ​ឡើងថ្លៃ​ផ្ទះសំណាក់ និង​ការ​បាត់​មុខរបរ​រកស៊ី​ជាដើម ដែល​ពាក់ព័ន្ធ​នឹង​ជនអន្តោប្រវេសន៍​ចិន កើត​មាន​ពេញបន្ទុក។ បញ្ហា​ទាំងនេះ កើតមាន​ច្រើន​ជាងគេ នៅ​ខេត្ត​ព្រះសីហនុ។ លោក រ៉ុង ឈុន ថា​បញ្ហា​ទាំងអស់​នេះ នឹង​នៅតែ​បន្ត​កើតមានឡើង បើ​មិន​ផ្លាស់ប្ដូរ​របៀប​ដឹកនាំ​ដូច​បច្ចុប្បន្ន​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ធនាគារ​ABA មិន​ព្រម​បើកប្រាក់​ជាង​១​ម៉ឺន ៥​ពាន់​ដុល្លារ ដែល​ឧបត្ថម្ភ​ដល់​បុគ្គលិក​ណាហ្គាវើលដ៍
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។