សាលារៀនរដ្ឋ និងឯកជនមួយចំនួនបើកដំណើរការ ដើម្បីអោយសិស្សបានចូលរៀនឡើងវិញ នៅថ្ងៃទី៧ ខែកញ្ញានេះ បន្ទាប់ពីបានបិទទ្វាររយៈពេលប្រមាណ ៦ខែ ដោយសារជំងឺរាតត្បាតសកលកូវីដ-១៩ រួចមក។
សារព័ត៌មានក្នុងស្រុករាយការណ៍ថា សាលារៀនរដ្ឋដែលបើកទ្វារទទួលសិស្សនៅថ្ងៃនេះមាននៅក្នុង ២១រាជធានី-ខេត្ត ហើយបើកសម្រាប់តែសិស្សថ្នាក់ទី៩ និងថ្នាក់ទី១២។ រីឯខេត្ត ៤ផ្សេងទៀត ដែលមានភាពប្រឈមនឹងឆ្លងជំងឺកូវីដ-១៩ទាប ដែលរួមមាន៖ ខេត្តក្រចេះ ស្ទឹងត្រែង រតនគិរី និងមណ្ឌលគិរី ត្រូវក្រសួងអនុញ្ញាតឱ្យដំណើរឡើងវិញគ្រប់ថ្នាក់សិក្សាគឺចាប់ពីថ្នាក់ទី១ ដល់ទី១២។
ជាមួយគ្នានេះសាលារៀនឯកជនចំនួន ៣០០កន្លែង ពីកម្រិតមត្តេយ្យដល់ឧត្ដមសិក្សា ក៏នឹងបើកទ្វារបង្រៀនសិស្សឡើងវិញ បន្ទាប់ពីក្រសួងអប់រំចុះពិនិត្យ និងវាយតម្លៃដោយផ្ទាល់ដល់ទីតាំងសាលាអំពីការអនុវត្តវិធានការសុវត្ថិភាព។
ក្រសួងអប់រំបានចេញសេចក្ដីណែនាំដល់គ្រឹះស្ថានសិក្សាទាំងអស់ឲ្យយកចិត្តទុកដាក់អនុវត្តន៍វិធានអនាម័យ កំណត់ចំនួនសិស្ស និងរក្សាគម្លាតសុវត្ថិភាពនៅក្នុងថ្នាក់រៀន។ លើសពីនេះគ្រឹះស្ថានអប់រំទាំងរដ្ឋ និងឯកជនត្រូវបោសសំអាត និងបាញ់ថ្នាំសម្លាប់មេរោគទាំងបរិវេណសាលា និងនៅក្នុងថ្នាក់រៀន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។