ស្ថានទូត​ខ្មែរ​ប្រចាំ​ប្រទេស​ថៃ​ជូនដំណឹង​ដល់​ពលករ​អោយ​ទៅ​បន្ត​សុពលភាព​ឯកសារ​ស្នាក់​នៅ និង​ធ្វើការ​នៅ​ប្រទេស​ថៃ

ដោយ សុជីវី
2020.08.31
ពលករ​ នៅ​​មុខ​ស្ថានទូត​ខ្មែរ​ នា​ទីក្រុង​បាងកក ៦២២ ពលករ​ខ្មែរ​ធ្វើ​ការ​នៅ​ថៃ​ឈរ​មុខ​ស្ថានទូត​ខ្មែរ​នៅ​ទីក្រុង​បាងកក ថ្ងៃ​ទី២២ ខែ​មីនា ឆ្នាំ២០១៩។
រូបថត៖ ដោយ​ពលករ​ខ្មែរ

ស្ថានទូតខ្មែរប្រចាំនៅប្រទេសថៃជូនដំណឹងថារដ្ឋាភិបាលថៃបានសម្រេច​ឱ្យ​ពលករ ដែលមានឯកសារស្នាក់នៅ និងអស់សុពលភាពអាច​បន្តរហូតដល់ចុងឆ្នាំ២០២០ និងដើមឆ្នាំ២០២១។ សេចក្ដី​ជូន​ដំណឹងរបស់ស្ថានទូតខ្មែរនៅប្រទេសថៃផ្សព្វផ្សាយកាលពីថ្ងៃទី៣១ ខែសីហា​ឱ្យដឹងថា ពលករខ្មែរចំនួន ៤ប្រភេទនឹងទទួលបាន​ការបន្តសុពលភាពនេះ។

ពលករក្រុមទី១ ជាអ្នកទៅធ្វើការមានកិច្ចសន្យាការងាររយៈពេល ៤ឆ្នាំ ហើយចប់កិច្ចសន្យាចាប់តាំងពីខែមីនាដល់ខែតុលាឆ្នាំ២០២០។ ក្រុមទី២ ក្រុមដែលនិយោជក ឬថៅកែចាស់ឈប់ជួល ប៉ុន្តែមិន​ទាន់បានការងារថ្មី។ ក្រុមទី៣ គឺក្រុមដែលធ្លាប់បានបន្តសុពលភាពឯកសាររួចហើយ។ ពលករក្នុងក្រុមទាំង ៣ នេះ ត្រូវអនុញ្ញាតអោយបន្តស្នាក់នៅបណ្ដោះអាសន្នរហូតដល់ខែមករាឆ្នាំ២០២១ ហើយនិយោជកត្រូវនាំពលករទៅបន្តទិដ្ឋាការ និងប័ណ្ណអនុញ្ញាតការងារ​ឱ្យ​បានមុនថ្ងៃទី៣១ ខែតុលា ឆ្នាំ២០២០។ ចំពោះពលករក្រុមទី៤ គឺពលករដែលចូលមកធ្វើការព្រឹកវិលល្ងាច និងតាមរដូវ​ ​តាមបណ្ដាខេត្តជាប់ព្រំដែនកម្ពុជា-ថៃ។ ពួកគេត្រូវបានអនុញ្ញាតឱ្យស្នាក់នៅ និងធ្វើការបណ្ដោះអាសន្នរហូតដល់ថ្ងៃទី៣១ ខែតុលា ឆ្នាំ២០២១។ ប៉ុន្តែក្នុងអំឡុងពេល​នេះ ដើម្បីទទួលបានការអនុញ្ញាតឱ្យស្នាក់នៅ និងធ្វើ​ការរហូត​ដល់ថ្ងៃទី៣១ ខែមីនា ឆ្នាំ២០២២ និយោជក ឬតំណាងនិយោជក ត្រូវនាំពលករទៅដំណើរការដាក់ពាក្យស្នើសុំបន្ត​ ​ទិដ្ឋាការស្នាក់នៅ និងណ្ណអនុញ្ញាតការងារ​ឱ្យបានរួចរាល់អោយបានមុនថ្ងៃ៣១ ខែតុលា ឆ្នាំ២០២០។

ស្ថានទូតអោយដឹងទៀតថាប្រសិនបើពលករមានម្ងល់លើបញ្ហានេះ​ ​អាចទាក់ទងទៅកាន់ស្ថានទូតតាមរយៈហ្វេសប៊ុក​ផេក ឬលេខ​ទូរស័ព្ទ ០៩៨ ០៩២ ៥៩ ០៥៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។