សមាជិកក្រុមយុវជនខ្មែរថាវរៈ ព្រួយបារម្ភពីស្ថានភាពសុខភាពរបស់លោក ហ៊ុន វណ្ណៈ ដោយសារតែលោកបាន ធ្វើកូដកម្មបង្អត់អាហារតាំងពីថ្ងៃទី១៣ សីហា ដើម្បីបង្ហាញសាធារណជន និងរដ្ឋាភិបាលថា ពលរដ្ឋដែលរងគ្រោះនូវភាពអយុត្តិធម៌ គឺលំបាកជាងមនុស្សអត់អាហារទៅទៀត។ ក្រុមយុវជនថា មន្ត្រីពន្ធនាគារមិនអនុញ្ញាតឱ្យពួកគេ ចូលសួរសុខទុក្ខយុវជនរូបនេះនៅឡើយទេ ព្រោះអាជ្ញាធរ តម្រូវលោក ហ៊ុន វណ្ណៈ នៅដាច់ដោយឡែករយៈពេល ១៤ ថ្ងៃសិន ដើម្បីទប់ស្កាត់ជំងឺកូវីដ-១៩ ចូលក្នុងពន្ធនាគារ។
សមាជិកក្រុមយុវជនខ្មែរថាវរៈ ព្រះតេជគុណ កើត សារ៉ាយ ឱ្យដឹងនៅថ្ងៃទី ១៦ ខែសីហាថា លោក ហ៊ុន វណ្ណៈ ធ្លាប់បានប្ដេជ្ញាចិត្តតាំងពីមុនពេលជាប់ឃុំមកម្ល៉េះថា ប្រសិនបើ អាជ្ញាធរចាប់ខ្លួនពួកលោក ដោយគ្រាន់តែទាមទាររកយុត្តិធម៌នោះពួកលោក នឹងធ្វើពហិការបង្អត់អាហារ ដើម្បីទាមទារសិទ្ធិសេរីភាព ដោយសន្តិវិធី។ ព្រះតេជគុណ កើត សារ៉ាយ មានថេរៈដីកាបន្តថា ជាក់ស្ដែង លោក ហ៊ុន វណ្ណៈ បានបង្អត់អាហារខ្លួនឯង រយៈពេល ២ថ្ងៃរួចមកហើយ នៅពេលឃុំខ្លួនក្នុងស្នងការនគរបាលរាជធានីភ្នំពេញ មុនបញ្ជូនទៅពន្ធនាគារ កាលពីព្រលប់ថ្ងៃទី ១៤ ខែសីហា។ ព្រះអង្គ ព្រួយបារម្ភថា លោក ហ៊ុន វណ្ណៈ អាចនឹងបន្តធ្វើកូដកម្មបង្អត់អាហារនៅក្នុងពន្ធនាគារ ដែលធ្វើឲ្យសុខភាពរបស់លោកទ្រុឌទ្រោម។ ទោះយ៉ាងណាក្ដី ព្រះអង្គបន្តថា មកទល់ពេលនេះ នៅមិនទាន់ទទួលដំណឹង ពីលោក ហ៊ុន វណ្ណៈនៅឡើយទេ ព្រោះមន្ត្រីពន្ធនាគារ មិនអនុញ្ញាតឱ្យពួកគេចូលជួប សូម្បីតែមេធាវី៖ «អ្វីដែលយើងសោកសង្រេងជាងគេគឺ អយុត្តិធម៌សង្គម ជាពិសេស ពួកគាត់មានអារម្មណ៍ថា ខ្លួនឯងមិនធ្វើខុស ធ្វើដើម្បីប្រជាជាតិ បែរជាប្រជាជាតិរបស់ខ្លួនឯង ជាអ្នកចាប់ឃុំឃាំងអ៊ីចឹងវិញ គាត់មានអារម្មណ៍ថា វាវេទនាជាងការ ដែលខ្លួនឯង អត់បាយទៅទៀត។ ខ្ញុំមើលឃើញថា ហ្នឹងជារឿងមួយដែល ជាការតស៊ូមតិរបស់គាត់បង វណ្ណៈ គាត់មិនហូប ទឹក និងមិនហូបបាយ។ ខ្ញុំមើលឃើញថា គាត់កំពុងអនុវត្តគោលការណ៍ និងស្មារតី ដែលបាននិយាយគ្នាហ្នឹងហើយ»។
កាលពីថ្ងៃទី ១៣ ខែសីហា អាជ្ញាធរក្រុងភ្នំពេញ បង្ក្រាបដោយហិង្សា និងចាប់ខ្លួនយុវជនខ្មែរថាវរៈចំនួន ៦នាក់ ក្នុងនោះ យុវជន ២នាក់ គឺ លោក ហ៊ុន វណ្ណៈ និងយុវតី ឈឿន ដារ៉ាវី ត្រូវបានតុលាការបញ្ជូនទៅឃុំខ្លួននៅពន្ធនាគារព្រៃស កាលពីព្រលប់ថ្ងៃទី១៤ ខែសីហា ក្រោមបទចោទប្រកាន់ពីបទញុះញង់ឲ្យមានភាពវឹកវរដល់សន្តិសុខសង្គម។ ចំណែកយុវជន ៤នាក់ទៀត ត្រូវបានអាជ្ញាធរ បង្ខំឲ្យចុះកិច្ចសន្យាឈប់ចូលរួមតវ៉ា ឈប់បញ្ចេញមតិរឿងសង្គម និងនយោបាយលើហ្វេសប៊ុក (Facebook) និងឈប់ផ្តល់ព័ត៌មានឲ្យអ្នកសារព័ត៌មានជាដើម មុននឹងដោះលែងពួកគេវិញនៅព្រលប់ថ្ងៃទី១៤ សីហា។ យុវជនទាំង ៤នាក់ ដែលត្រូវបានដោះ លែងនោះ រួមមាន៖ កញ្ញា យ៉ង សៀងហៃ កញ្ញា ជា គន្ធីន លោក ថា ឡាវី និងលោក ស្វាយ សំណាង។ សមាជិកក្រុមយុវជនខ្មែរថាវរៈ កញ្ញា ជា គន្ធីន ថ្លែងថា កញ្ញាបារម្ភពីសុវត្ថិភាព លោក ហ៊ុន វណ្ណៈយ៉ាងខ្លាំង ព្រោះក្នុងពេលសមត្ថកិច្ចឃុំខ្លួនលោក គឺលោកពហិការបង្អត់អាហារ និងទឹក។ កញ្ញា ឲ្យដឹងដែរថា សម្រាប់ស្ថានភាពសុខភាពរបស់កញ្ញាវិញ បានធ្លាក់ខ្លួនឈឺ និងកំពុងសម្រាកព្យាបាល ក្រ
កញ្ញា ឲ្យដឹងដែរថា សម្រាប់ស្ថានភាពសុខភាពរបស់កញ្ញាវិញ បានធ្លាក់ខ្លួនឈឺ និងកំពុងសម្រាកព្យាបាល ក្រោយពីអាជ្ញាធរដោះលែងដោយសារ តែមុនការចាប់ខ្លួននោះ កញ្ញាបានរងអំពើហិង្សាធ្ងន់ធ្ងរពីក្រុមកងកម្លាំងសន្តិសុខរាជធានីភ្នំពេញ ក្នុងពេលក្រុមយុវជនតវ៉ាដោយអហិង្សាទាមទារឲ្យដោះលែងលោក រ៉ុង ឈុន៖ « ពេលយប់ហ្នឹង ខ្ញុំស្រែកសួរបង ដារ៉ាវី ហ្នឹង នៅក្នុងហ្នឹងស្រែកសួរថា បងវណ្ណៈ មានញាំបាយ ញាំទឹកអត់ ? មានញាំងទឹកអត់ ព្រោះអត់មានបាយទេ ហើយគាត់ថា អត់ញាំទេ ហើយបន្ទាប់មក ពេលយកគាត់ចេញ គឺអត់បាយតែម្ដងគាត់ប្រាប់ថា គាត់ពហិការអត់ញាំបាយទឹកទេ គឺគាត់និយាយអ៊ីចឹង » ។
រីឯម្ដាយលោក ហ៊ុន វណ្ណៈ គឺលោកស្រី ទី ម៉ារី មានប្រសាសន៍ថា លោកស្រីមិនអាចចូលសួរសុខទុក្ខកូនបាននៅឡើយទេ ព្រោះមន្ត្រីពន្ធនាគារកំពុងធ្វើចត្តាឡឺស័ក និងរកជំងឺកូវីដ១៩ ក្នុងរយៈ ១៤ថ្ងៃសិន។ លោកស្រីក៏បារម្ភយ៉ាងខ្លាំង ពីសុខភាពកូនប្រុស ព្រោះគាត់មិនហូបអារហារតាំងពីសមត្ថកិច្ចឃុំខ្លួនមក៖ « ថ្ងៃគេចាប់ហ្នឹង ក្មេងៗ នៅជាមួយគាត់ វណ្ណៈអត់ញាំបាយ ទឹកអីទេ គ្រាន់តែដឹងប៉ុណ្ណឹង ដល់ក្រោយមកទៀត អត់ដឹងអីសោះក្មួយ » ។
អាស៊ីសេរីបានព្យាយាមទាក់ទងអ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សាវនា ដើម្បីសុំការបំភ្លឺរឿងនេះ តែទូរស័ព្ទហៅចូលច្រើនដង គ្មានអ្នកទទួលនៅថ្ងៃទី១៦ សីហា។ ចំណែកមេធាវីការពារក្តី ឱ្យលោក ហ៊ុន វណ្ណៈ គឺលោក សំ សុគង់ ក៏មិនអាចទាក់ទងបានដែរ នៅថ្ងៃដដែលនេះ។
ក្រុមយុវជនខ្មែរថាវរៈ បង្ហាញការសោកស្រាយ ដែលសមត្ថកិច្ចរបបក្រុងភ្នំពេញបង្ក្រាប និងចាប់ខ្លួនពួកគេ យ៉ាងអយុត្តិធម៌។ ពួកគេចាត់ទុកទង្វើនេះថា រដ្ឋាភិបាលកំពុងលង់ខ្លួន លែងដឹងខុសត្រូវធ្វើបាបពលរដ្ឋខ្មែរធ្វើឱ្យប្រទេសជិតខាង មើលងាយកម្ពុជា។ ពួកគេអំពាវនាវឱ្យកូនខ្មែរ ត្រូវចេះឈឺចាប់ ចំពោះភាពអយុត្តិធម៌សង្គម និងចូលរួមទាមទារ ដោយប្រើប្រាស់សិទ្ធិសេរីភាពដែលមានចែងក្នុងខ្លឹមសាររដ្ឋធម្មនុញ្ញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។