ខណៈសាលាដំបូងរាជធានីភ្នំពេញ សម្រេចឃុំខ្លួនជនជាតិចិនចំនួន ៥នាក់ ពាក់ព័ន្ធនឹងការផឹកស៊ីប្រើប្រាស់អាវុធបាញ់បោះដោយខុសច្បាប់នៅរាជធានីភ្នំពេញ សមត្ថកិច្ចនៅឯខេត្តព្រះសីហនុឯណោះ បានចាប់ខ្លួនជនជាតិចិនចំនួន៣នាក់ផ្សេងទៀត ពាក់ព័ន្ធនឹងករណីប្រើប្រាស់អាវុធខុសច្បាប់បាញ់បោះដូចគ្នានេះ។ ពលរដ្ឋ និងមន្ត្រីសង្គមស៊ីវិល លើកឡើងថា បញ្ហាជនបរទេស ជាពិសេសជនជាតិចិន ប្រើប្រាស់អាវុធបាញ់បោះអនាធិបតេយ្យ កំពុងបង្កជាក្ដីបារម្ភចំពោះបញ្ហាសុវត្ថិភាពរបស់ពលរដ្ឋ។
សាលាដំបូងរាជធានីភ្នំពេញ កាលពីថ្ងៃទី២១ ខែកុម្ភៈ បានសម្រេចឃុំខ្លួនក្រុមជនសង្ស័យជាជនជាតិចិន ចំនួន៥ នាក់ ពីបទ «ហិង្សាចេតនាមានស្ថានទម្ងន់ទោស កាន់កាប់អាវុធដោយគ្មានការអនុញ្ញាត និងជួញដូរអាវុធខុសច្បាប់» ពាក់ព័ន្ធនឹងករណីជនជាតិចិន មួយក្រុមប្រើអាវុធប្រភេទ អាកា (AK) ចំនួន២ដើម និងអាវុធខ្លីចំនួន១ដើម បាញ់ចំនួន៣គ្រាប់ ស្ថិតនៅមជ្ឈមណ្ឌលរតនៈសម្បត្តិ នៅទល់មុខនឹងអាកាសយានដ្ឋានអន្តរជាតិភ្នំពេញ កាលពីថ្ងៃទី១៤ ខែកុម្ភៈ។ ទន្ទឹមនឹងនេះ សមត្ថកិច្ចខេត្តព្រះសីហនុ កាលពីថ្ងៃទី២១ ខែកុម្ភៈបានឃាត់ខ្លួនជនជាតិចិនចំនួន៣នាក់ និងចាប់យកអាវុធខ្លីចំនួន១ដើម និងសម្ភារៈមួយចំនួនទៀត ពាក់ព័ន្ធនឹងហេតុការណ៍ផ្ទុះអាវុធនៅកាស៊ីណូ និងសណ្ឋាគារ ណាន ហៃ ក្នុងក្រុងព្រះសីហនុ កាលពីថ្ងៃដដែលនោះ។ នេះបើតាមការចុះផ្សាយរបស់សារព័ត៌មានស្និទ្ធនឹងរដ្ឋាភិបាល ហ្វេ្រសញូវ (Freshnews)។
ការផ្ទុះអាវុធកំពុងបង្កការភ័យខ្លាចដល់ពលរដ្ឋ និងភ្ញៀវទេសចរអន្តរជាតិ
ទាក់ទិននឹងបញ្ហានេះ ប្រធានសមាគមប្រជាធិបតេយ្យខ្មែរនៅតំបន់ក្វាងជូ (GWANGJU) ប្រទេសកូរ៉េខាងត្បូង លោក លួន វិបុល ប្រាប់វិទ្យុអាស៊ីសេរី នៅថ្ងៃទី២៣ ខែកុម្ភៈថា ហេតុការណ៍ផ្ទុះអាវុធ បង្កឡើងដោយជនបរទេសខាងលើកំពុងបង្កការភ័យខ្លាចដល់ពលរដ្ឋរស់នៅមូលដ្ឋាន និងភ្ញៀវទេសចរអន្តរជាតិ។
លោក លួន វិបុល៖«នៅពេលពួកគាត់ធ្វើការស៊ើបអង្កេត ឬធ្វើការឲ្យបានហ្មត់ចត់ទៅលើករណី ដែលជនបរទេសមានអាវុធប្រើប្រាស់លើដែនដី នៃព្រះរាជាណាចក្រកម្ពុជារបស់យើងហ្នឹង គឺនឹងអាចរកប្រភពឃើញ ។ កាលណាដែលរកប្រភពឃើញអ្នកជាប់ពាក់ព័ន្ធត្រូវទទួលទោសតាមផ្លូវច្បាប់ កាលណា ដែលរកប្រភពអ្នកជាប់ពាក់ព័ន្ធឃើញហើយយកមកផ្ដន្ទាទោស នោះនឹងកាត់បន្ថយរឿងអសន្តិសុខនៅក្នុងស្រុកខ្មែរ ប្រជាពលរដ្ឋក៏គាត់សប្បាយចិត្ត ភ្ញៀវទេសចរអន្តរជាតិ ក៏នឹងអាចទៅលេងស្រុកខ្មែរបានច្រើន»។
ក្រៅពីនេះ មានអ្នកប្រើប្រាស់បណ្ដាញសង្គមជាច្រើនទៀត បង្ហាញប្រតិកម្មផ្សេងៗគ្នា ចំពោះករណីជនបរទេសជាពិសេស ជនជាតិចិនមួយចំនួន មានកាំភ្លើងនៅក្នុងដៃ និងបាញ់បោះនៅតាមទីសាធារណៈ បង្កជាការភ័យខ្លាចដល់ពលរដ្ឋ ហើយពលរដ្ឋខ្លះទៀត ថែមទាំងបានចោទសួរថា «តើជនបរទេសទាំងនោះ បានកាំភ្លើងមកពីណា?»។
វិទ្យុអាស៊ីសេរី នៅមិនទាន់អាចទាក់ទងអ្នកនាំពាក្យអង្គស្នងការដ្ឋាននគរបាលជាតិ លោក ឆាយ គឹមខឿន ដើម្បីសុំការឆ្លើយតបជុំវិញបញ្ហានេះ បាននៅឡើយទេ នៅថ្ងៃទី២៣ ខែកុម្ភៈ។
អត្ថបទដែលទាក់ទង៖
បញ្ហាជនបរទេសកំពុងក្លាយជាបញ្ហាស្មុគស្មាញ និងគំរាមកំហែងដល់សន្តិសុខ និងសុវត្ថិភាព
ទាក់ទងនឹងបញ្ហានេះ ប្រធានអង្គការសម្ព័ន្ធភាពការពារសិទ្ធិមនុស្សហៅកាត់ថា ច្រាក់ (CHRAC) លោក រស់ សុដ្ឋា មានប្រសាសន៍ថា បញ្ហាជនបរទេស អាចជួញដូរ រក្សាទុក និងប្រើប្រាស់អាវុធខុសច្បាប់ កំពុងក្លាយជាបញ្ហាស្មុគស្មាញ និងគំរាមកំហែងដល់សន្តិសុខ និងសុវត្ថិភាពរបស់ពលរដ្ឋ។ លោកស្នើដល់អាជ្ញាធរពាក់ព័ន្ធ ឲ្យបង្កើនការស្រាវជ្រាវ និងបង្ក្រាបបណ្ដុំឧក្រិដ្ឋកម្ម ដូចជា ការឆបោកតាមអនឡាញ ការរក្សាទុក និងជួញដូរគ្រឿងញៀនជាដើម។
លោក រស់ សុដ្ឋា៖«បញ្ហាទីផ្សារអាវុធខុសច្បាប់ជាសញ្ញាឲ្យយើងឃើញថា បញ្ហានេះនឹងអាចមានការលក់ដូរអាវុធខុសច្បាប់នៅក្នុងប្រទេសកម្ពុជាយ៉ាងណា ដែលបរទេសអាចទិញអាវុធហើយអាចលាក់ទុកអាវុធនៅក្នុងផ្ទះសំណាក់ ផ្ទះជួល ឬគេហដ្ឋានរបស់ពួកគេ ដែលជាបញ្ហាមួយដែលយើងត្រូវសិក្សា និងអង្កេតឲ្យបានមែនទែន ព្រោះបញ្ហានេះវារឿងបង្កឲ្យកើតមានបទឧក្រិដ្ឋផ្សេងៗ ឬអំពើហិង្សា ដែលខុសច្បាប់បណ្ដាលឲ្យយើងមានការព្រួយបារម្ភ»។
ពលរដ្ឋ និងមន្ត្រីសង្គមស៊ីវិល ស្នើឲ្យអាជ្ញាធរស្រាវជ្រាវស្វែងរកប្រភពនៃកាំភ្លើង ដែលជនសង្ស័យប្រើប្រាស់ក្នុងហេតុការណ៍ផ្ទុះអាវុធខាងលើ និងពង្រឹងការអនុវត្តច្បាប់គ្រប់គ្រងអាវុធ គ្រឿងផ្ទុះ ដើម្បីកាត់បន្ថយហេតុការណ៍ ជនបរទេសប្រើប្រាស់អាវុធខុសដោយច្បាប់ បាញ់បោះអានាធិបតេយ្យនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។