អ្នកសារព័ត៌មានអនឡាញ CBN ម្នាក់នៅរាជធានីភ្នំពេញ គឺលោក គួយ ពិសិត អាយុ ២៤ឆ្នាំ បានស្លាប់ក្នុងពេលជិះម៉ូតនៅសង្កាត់ចោមចៅ៣ ខណ្ឌពោធិ៍សែនជ័យ កាលពីម៉ោងជាង២យប់ឈានចូលថ្ងៃទី២៩ ខែកញ្ញា ដែលគេសង្ស័យថា ជាអំពើឃាតកម្ម។
ប្រធានផ្នែកសិទ្ធិមនុស្សនៃសមាគមការពារសិទ្ធិមនុស្ស អាដហុក (Adhoc) លោក នី សុខា មានប្រសាសន៍ថា លោកមានមន្ទិលពាក់ព័ន្ធនឹងការស្លាប់របស់សារព័ត៌មាននេះ អាចជាអំពើឃាតកម្មច្រើនជាងគ្រោះថ្នាក់ចរាចរណ៍។ លោកស្នើឱ្យអាជ្ញាធរស៊ើបអង្កេតរឿងនេះឱ្យបានល្អិតល្អន់ដើម្បីផ្ដល់យុត្តិធម៌ជនរងគ្រោះ ពីព្រោះកន្លងទៅអ្នកយកព័ត៌មានតែងប្រឈមនឹងការវាយធ្វើបាបពីសំណាក់អ្នកមានលុយនិងមានអំណាច ដោយសារតែការចុះផ្សាយព័ត៌មានរបស់ពួកគេ៖ «អីចឹងដូច្នេះសម្រាប់អ្នកសារព័ត៌មានវាជារឿងមួយមានការសង្ស័យច្រើនក្នុងការដែលមានគ្រោះថ្នាក់របស់ពួកគាត់។អីចឹងហើយបានជាយើងស្នើឱ្យសមត្ថកិច្ចហ្នឹងមានការស្រាវជ្រាវឱ្យមានមូលដ្ឋានឱ្យច្បាប់លាស់ មុនហ្នឹងធ្វើការសន្និដ្ឋាន » ។
ទាក់ទងនឹងបញ្ហានេះអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា ប្រាប់អាស៊ីសេរីថា ការស្លាប់របស់អ្នកសារព័ត៌មាន CBN ឈ្មោះ គួយ ពិសិត នេះ ពុំមានមែនអំពើឃាតកម្ម ឬចោរប្លន់នោះឡើយ គឺគ្រោះថ្នាក់ចរាចរស្លាប់ដោយខ្លួនឯង។ ទោះជាយ៉ាងលោកមិនបានបញ្ជាក់ថា គ្រោះថ្នាក់ចរាចរនេះបណ្ដាលមកពីអ្វីឱ្យបានជាក់លាក់នោះទេ។
ទោះជាយ៉ាងណា ការស្លាប់របស់អ្នកសារព័ត៌មាននេះ ត្រូវបានសារព័ត៌មានក្នុងស្រុក ចុះផ្សាយដោយស្រង់សម្ដីសមត្ថកិច្ចមូលដ្ឋានថា យោងតាមកាមេរ៉ា សុវត្ថិភាពរបស់ប្រជាពលរដ្ឋនៅក្បែរកន្លែងកើតហេតុ គឺបង្ហាញថា ជនរងគ្រោះត្រូវជនមិនស្គាល់មុខលួចវាយពីក្រោយខ្នងចំក្បាលបណ្ដាលឱ្យដួលម៉ូតូហើយបោកក្បាលស្លាប់ភ្លាមៗនៅកន្លែងកើតហេតុ កាលពីប្រមាណម៉ោងជាង២រំលងអាធ្រាត្រឈានចូលថ្ងៃទី២៩ កញ្ញា។ រីឯជនដៃដល់បានគេចខ្លួនបាត់ភ្លាមៗ តែម្ដង។ ចំណែកក្រុមអ្នកលេងហ្វេសប៊ុកឱ្យដឹងថា នៅកន្លែងកើតហេតុនោះ មានមួកការពារសុវត្ថិភាពចំនួន ២មួកទៀតផង ដូច្នេះគេជឿជាក់ថា ជាអំពើឃាតកម្មក្នុងហេតុផលណាមួយ។ បច្ចុប្បន្ន សាកសពជនរងគ្រោះត្រូវបានសាច់ញាតិយកទៅធ្វើបុណ្យតាមបែបព្រះពុទ្ធសាសនានៅស្រុកកំណើត ស្រុកចម្ការលើខេត្តកំពង់ចាម ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។