តុលាការ​កំពុង​សាកសួរ​ជន​ជាតិ​ចិន​ចំនួន ៤នាក់​ពាក់​ព័ន្ធ​នឹង​សំណុំ​រឿង​ពន្ធ​ថ្នាំ​ញៀន​ជាង ៥គីឡូក្រាម

ដោយ ហេង រស្មី
2020-09-25
អ៊ីម៉ែល
មតិ
Share
បោះពុម្ព
ជន​ជាតិ​ចិន​ចំនួន​ ៣​នាក់ ដែល​កងរាជអាវុធហត្ថ​​​រាជធានី​ភ្នំពេញ​ចាប់​​​​​រឿង​​រត់​ពន្ធ​ថ្នាំ​ញៀន​ នៅ​​ថ្ងៃ​ទី២៥ ខែ​កញ្ញា ឆ្នាំ២០២០។
ជន​ជាតិ​ចិន​ចំនួន​ ៣​នាក់ ដែល​កងរាជអាវុធហត្ថ​​​រាជធានី​ភ្នំពេញ​ចាប់​​​​​រឿង​​រត់​ពន្ធ​ថ្នាំ​ញៀន​ នៅ​​ថ្ងៃ​ទី២៥ ខែ​កញ្ញា ឆ្នាំ២០២០។
រូប៖ ហ្វេសប៊ុក​​កងរាជអាវុធហត្ថ​​​រាជធានី​ភ្នំពេញ

តុលាការ​កំពុង​សាក​សួរ​ជន​ជាតិ​ចិន​ចំនួន​ ៤​នាក់​នៅ​ក្នុង​សំណុំ​រឿង​ដាច់​ដោយ​ឡែក​ៗ​ពី​គ្នា​ ពាក់​ព័ន្ធ​នឹង​ការ​រត់​ពន្ធ​ថ្នាំ​ញៀន​ជាង​៥​ គីឡូក្រាម​ នៅ​ក្នុង​ទី​ក្រុង​ភ្នំពេញ។​ មន្ត្រី​តុលាការ​ថា​ តុលាការ​ត្រូវ​ការ​ពេល​វេលា​បន្ថែម​ទៀត​ដើម្បី​សាក​សួរ​ជនជាតិ​ចិន​ទាំង​៤​នាក់​នោះ​មុន​នឹង​សម្រេច​បញ្ជូន​ខ្លួន​ទៅ​មន្ទីរ​ឃុំ​ឃាំង​ព្រៃ​ស។

អ្នក​នាំ​ពាក្យ​តុលាការ​ក្រុង​ភ្នំពេញ​លោក​ គុជ គឹមឡុង​ បញ្ជាក់​ថា​ លោក​ព្រះ​រាជ​អាជ្ញា​រង​ ប្លង់ សុផល កំពុង​សាក​សួរ​ ជនជាតិ​ចិន​ចំនួន​ ៤​នាក់​ដែល​សមត្ថកិច្ច​ចាប់​ខ្លួន​ដាច់​ដោយ​ឡែកៗ ពី​គ្នា​កាល​ពី​ពេល​ថ្មីៗ ​នេះ។ លោក​បញ្ជាក់​ថា លោក​ព្រះរាជ​អាជ្ញា​ មិន​ទាន់​សម្រេច​ចោទ​ប្រកាន់​នៅ​ឡើយ​ទេ៖ «រឿង​ហ្នឹង​លោក​ព្រះរាជអាជ្ញា​រង ប្លង់ សុផល កំពុង​សាក​សួរ​តាម​នីតិ​វិធី​ ហើយ​បើ​មាន​ការ​សម្រេច​យ៉ាង​ណា​ខ្ញុំ​នឹង​ជូន​ព័ត៌មាន​បន្ថែម​ទៀត»​​​

ក្រុម​សមត្ថកិច្ច​កង​រាជ​អាវុធ​ហត្ថ​លើ​ផ្ទៃ​ប្រទេស​ និង​ប៉ូលិស​ក្រុង​ភ្នំពេញ​កាល​ថ្ងៃ​ទី២២ និង​ទី២៣ ខែកញ្ញា បាន​ចាប់​ខ្លួន​ជនជាតិ​ចិន​ចំនួន ៤នាក់​ ដាច់​ដោយ​ឡែកៗ ពី​គ្នា​ នៅ​ក្នុង​សំណុំ​រឿង​រត់​ពន្ធ​ថ្នាំ​ញៀន​ចំនួន​ជាង ៥គីឡូ​ក្រាម។

ក្រុម​សមត្ថកិច្ចឲ្យ​ដឹង​ថា ​ជនជាតិ​ចិន​ចំនួន ៣នាក់ គឺ​ស្រ្តី​ម្នាក់​អាយុ ៣៦ឆ្នាំ និង​បុរស​ពី​នាក់​អាយុ​ ពី​ ៣៧ ដល់ ៣៨ឆ្នាំ​ ត្រូវ​ចាប់​ខ្លួន កាល​ពី​ថ្ងៃ​ទី២៣ កញ្ញា ដោយ​កង​រាជ​អាវុធ​ហត្ថ​លើ​ផ្ទៃ​ប្រទេស​ នៅ​សង្កាត់​ទន្លេ​បាសាក់​ ខណ្ឌ​ចំការ​មន​ ក្រោយ​ពី​​រក​ឃើញ​ថា​ពួក​គេ​ជាប់​ពាក់​ព័ន្ធ​នឹង​ការ​រត់​ពន្ធ​ថ្នាំ​ញៀន​ ចំនួន​ជិត ១៥ក្រាម (១៤.៨៨ក្រាម)

អ្នក​នាំ​ពាក្យ​កង​រាជ​អាវុធហត្ថ​លើ​ផ្ទៃ​ប្រទេស​ លោក​ អេង ហ៊ី​ មិន​បាន​បញ្ជាក់​ពី​មូល​ហេតុ​ដែល​នាំ​ទៅ​រក​ការ​ចាប់​ខ្លួន​ជនជាតិ​ចិន​ទាំង​៣​នាក់​នេះ​ទេ។លោក​គ្រាន់​តែ​បាន​បញ្ជាក់​ថា​ លោក​បាន​បញ្ជូន​សំណុំ​រឿង​នេះ​ទៅ​តុលាការ​ហើយ៖ «ធម្មតា ​ការ​ស៊ើប​អង្កេត​ទាល់​តែ​បង​សាក​សួរ​ទៅ​អ្នក​នាំ​ពាក្យ​ខាង​អយ្យការ​ល្អជាង​។​ យើង​គ្រាន់​តែ​ផ្សាយ​ព័ត៌មាន​ចាប់​បាន​ប៉ុណ្ណឹង​ទេ​ តែ​ចំពោះ​ដំណាក់​កាល​ផ្សេងៗ​ ឬ​ក៏​ចោទ​ប្រកាន់​អ្វី​មួយ​ខាង​អយ្យការ​បាន​ចោទ​បាន»

ចំណែក​នៅ​ក្នុង​សំណុំ​រឿង​ ជនជាតិ​ចិន​ម្នាក់​ផ្សេង​ទៀត​ត្រូវ​​សមត្ថកិច្ច​ចាប់​ខ្លួន កាល​ពី​យប់​ថ្ងៃ​ទី២២​ កញ្ញា​ ខណៈ​កំពុង​បើក​បរ​រថយន្ត​មួយ​គ្រឿង គេច​ចេញ​ពី​សមត្ថកិច្ច​ដែល​កំពុង​ត្រួត​ពិនិត្យ​មើល​អាវុធ​ជាតិ​ផ្ទុះ​ តំបន់​រមណីយដ្ឋាន​​កោះពេជ្រ​ សង្កាត់​ទន្លេបាសាក់​ ខណ្ឌ​ចំការមន​ រាជធានី​ភ្នំពេញ។

សមត្ថកិច្ច​បាន​ឲ្យ​ដឹង​ថា​ នៅ​ពេល​ដែល​​​ឃាត់​រថយន្ត​ជនសង្ស័យ​ ក៏​បាន​ឆែក​ឆេរ​នៅ​ក្នុង​រថយន្ត​ មាន​ថ្នាំ​ញៀន​ចំនួន​ជិត ៥គីឡូក្រាម និង​ថ្នាំ​ញៀន​ប្រភេទ ហេរ៉ូអ៊ីន ចំនួន ១៤ដុំ​ផ្សេង​ទៀត។

​​អ្នក​នាំ​ពាក្យ​អគ្គស្នងការ​នគរ​បាល​ជាតិ លោក​ ឆាយ គឹមឃឿន បញ្ជាក់​ថា សមត្ថកិច្ច​កំពុង​តាម​ចាប់​ខ្លួន​ជនសង្ស័យ​២​នាក់​ផ្សេង​ទៀត​ ដែល​កំពុង​រត់​គេច​ខ្លួន​ ពាក់​ព័ន្ធ​នឹង​សំណុំ​រឿង​គ្រឿង​ញៀន​ជាង ៥គីឡូក្រាម​នេះ។

ជនជាតិ​ចិន​ចាប់​ពី​ខែ​មិថុនា​ រហូត​ដល់​ចុង​ខែ​កញ្ញា​នេះ​​ បាន​ធ្វើ​សកម្មភាព​ល្មើស​ច្បាប់​ជា​ច្រើន​ករណី​នៅ​ក្នុង​ប្រទេស​កម្ពុជា​ ដូរ​ជា​ ចាប់ជំរិត​ទារ​ប្រាក់​ និង​រត់ពន្ធ​ថ្នាំ​ញៀន​ជាដើម។ ជនរងគ្រោះ​ភាគ​ច្រើន​សុទ្ធ​សឹង​ជា​ជនជាតិ​ចិន​ដូច​គ្នា ត្រូវ​បាន​ជនសង្ស័យ​គំរាម​ទារ​ប្រាក់​ពី​ក្រុម​គ្រួសារ​ជន​រង​គ្រោះ​នៅ​ក្នុង​ប្រទេស​ចិន។​

កាលពី​ឆ្នាំ២០១៩ សមត្ថកិច្ច​ខេត្ត​ព្រះសីហនុ​ក៏​បាន​ចាប់​បញ្ជូន​ខ្លួន​ជនជាតិ​ចិន​ចំនួន ១២៧នាក់​ បញ្ជូន​ទៅកាន់​ប្រទេស​ចិន​វិញ ក្រោយពី​បាន​ចាប់ខ្លួន​ពាក់ព័ន្ធ​នឹង​ការ​ចាប់​ជំរិត​ទារ​ប្រាក់​តាម​ប្រព័ន្ធ​អ៊ីនធឹណិត។

របាយការណ៍​នៃ​កិច្ចប្រជុំ​ប្រចាំ​ឆ្នាំ​របស់​ក្រសួង​មហាផ្ទៃ បាន​ឲ្យ​ដឹង​ថា ជនជាតិ​ចិន ត្រូវ​បាន​ចាត់​ទុក​ថា ជា​ជនបរទេស ដែល​បាន​ចូល​មក​ក្នុង​ប្រទេស​កម្ពុជា ហើយ​បាន​ប្រព្រឹត្ត​បទល្មើស​ច្រើន​ជាងគេ ក្នុង​ចំណោម​ជនបរទេស​ដទៃ​ទៀត ដែល​ករណី​បទល្មើស​សរុប​ចំនួន ៣២៤ករណី នៅ​ឆ្នាំ២០១៩។ ចំនួន​នេះ បាន​កើន​ឡើង​ជិត ៥០ករណី ធៀប​ទៅ​នឹង​ឆ្នាំ២០១៨៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល