[ អានអត្ថបទជា ភាសាអង់គ្លេស៖ Cambodia arrests suspects in killing of teenage girl scam center victim]
កម្លាំងសមត្ថកិច្ចនៃនាយកដ្ឋានព្រហ្មទណ្ឌបានចាប់ខ្លួនជនសង្ស័យជនជាតិចិនចំនួន ២នាក់សង្ស័យពាក់ព័ន្ធករណីសម្លាប់ស្ត្រីខ្មែរអាយុ ១៨ឆ្នាំម្នាក់ យកទៅកប់ចោលទាំងអាក្រាតកាយ។ មន្ត្រីសិទ្ធិមនុស្សថ្កោលទោសចំពោះជនដៃដល់ ហើយចាត់ទុកករណីឃាតកម្មនេះថា ឃោរឃៅ អមនុស្សធម៌ និងទាមទារឱ្យតុលាការផ្ដន្ទាទោសលើជនដៃដល់ រួមទាំងអ្នកដែលពាក់ព័ន្ធឱ្យបានធ្ងន់ធ្ងរតាមផ្លូវច្បាប់។
កម្លាំងនៃនាយកដ្ឋានព្រហ្មទណ្ឌបានបង្ហាញមុខ ជនសង្ស័យជនជាតិចិនចំនួន ២នាក់ដែលជាប់សង្ស័យ បានចូលរួមធ្វើសកម្មភាពសម្លាប់ស្ត្រីជនជាតិខ្មែរម្នាក់រួចយកទៅកប់ចោល។ កម្លាំងជំនាញឱ្យក្រុមអ្នកកាសែតក្នុងស្រុកដឹងនៅថ្ងៃទី៣ ខែមីនាថា ជនសង្ស័យទាំង ២នាក់បានសារភាពចំពោះការប្រព្រឹត្តអំពើឃាតកម្មលើស្ត្រីជនជាតិខ្មែរ ហើយពួកគេអះអាងថា អំពើឃាតកម្មនេះពួកគេបានចូលរួមជាមួយជនជាតិចិនម្នាក់ទៀតមានឈ្មោះ យ៉ាង ខៃស៊ីន (Yang Kaixin) ដែលកំពុងរត់គេចខ្លួន។ សមត្ថកិច្ចជំនាញបញ្ជាក់ថា មូលហេតុដែលក្រុមជនដៃដល់សម្លាប់នារីជនជាតិខ្មែរ គឺដោយសារតែនារីរងគ្រោះបម្រើការងារផ្នែកអនឡាញបានដឹងរឿងអាថ៌កំបាំងច្រើនពីក្រុមជនជាតិចិនទាំងនោះ។
សមត្ថកិច្ចមិនទាន់ចាប់បានមេខ្លោងធំដែលរៀបចំផែនការសម្លាប់ស្ត្រីជនជាតិខ្មែរទេ
ទោះជាយ៉ាងណាក្ដី ក្នុងសំណុំរឿងឃាតកម្មនេះ សមត្ថកិច្ចមិនទាន់ចាប់បានមេខ្លោងធំ ដែលរៀបចំផែនការសម្លាប់ស្ត្រីជនជាតិខ្មែរនោះទេ។ ជនសង្ស័យចំនួន ២នាក់ ដែលសមត្ថកិច្ចឃាត់ខ្លួនម្នាក់មានឈ្មោះ ចេន កុង (Chen Cong) គឺជាមិត្តប្រុសរបស់នារីរងគ្រោះ និងម្នាក់ទៀតមានឈ្មោះ លី ហាវហាវ (Li HaoHao) ដែលពួកគាត់គឺជាជនជាតិចិន ហើយត្រូវបានសមត្ថកិច្ចបង្ក្រាបបាននៅរាជធានីភ្នំពេញកាលពីថ្ងៃទី២ ខែមីនា។
ចំណែកនារីរងគ្រោះមានឈ្មោះ ហេង សៀវលី មានអាយុ ១៨ឆ្នាំ និងមានស្រុកកំណើតនៅស្រុកកំពង់ត្រាច ខេត្តកំពត។ ប៉ូលិសបានប្រទះឃើញសាកសពនារីរងគ្រោះនៅជិតបឹងមួយកន្លែងក្នុងខណ្ឌដង្កោ រាជធានីភ្នំពេញ កាលពីថ្ងៃទី១ ខែមីនា ដោយសាកសពជនរងគ្រោះអាក្រាតកាយ និងមានចងស្លាបសេកដេកដួលផ្កាប់មុខ និងស្នាមជាំលើក្បាលរួមទាំងដងខ្លួនជាច្រើនកន្លែង។
ម្ដាយស្ត្រីជនរងគ្រោះ បានប្រាប់អ្នកយកព័ត៌មានក្នុងស្រុកកាលពីថ្ងៃទី១ ខែមីនាថា លោកស្រីមិនអាចទាក់ទងកូនស្រីចាប់តាំងពីថ្ងៃទី២៧ ខែកុម្ភៈ បន្ទាប់ពីកូនស្រីបានផ្ញើលុយឱ្យចំនួន ៥០ដុល្លារ។ ម្ដាយនារីរងគ្រោះឱ្យដឹងទៀតថា ដំបូងឡើយកូនស្រីធ្វើការនៅខេត្តព្រះសីហនុ ប៉ុន្តែក្រោយមកនាងបានតាមក្រុមជនជាតិចិន ដែលបម្រើការងារផ្នែកអនឡាញ មកក្រុងភ្នំពេញបានប្រមាណជាងកន្លះខែប៉ុណ្ណោះ។
វិទ្យុអាស៊ីសេរីបានព្យាយាមទាក់ទងអ្នកនាំពាក្យអគ្គស្នងការដ្ឋាននគរបាលជាតិលោក ឆាយ គឹមខឿន ដើម្បីសាកសួរបន្ថែមជុំវិញរឿងនេះ ប៉ុន្តែគ្មានការឆ្លើយតបនោះទេ នៅថ្ងៃទី៣ ខែមីនា។ ចំណែកម្ដាយស្ត្រីរងគ្រោះ ក៏មិនទាន់អាចទាក់ទងបាននៅឡើយដែរ នៅថ្ងៃដដែលនេះ។
អត្ថបទដែលទាក់ទង៖
មន្ត្រីសិទ្ធិមនុស្សថា ឃាតកម្មនេះឃោរឃៅ អមនុស្សធម៌
នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត មានប្រសាសន៍ថា ករណីឃាតកម្មនេះគឺឃោរឃៅ អមនុស្សធម៌ ហើយក្រុមជនដៃដល់គឺមានផែនការច្បាស់លាស់ និងបានគិតទុកជាមុនក្នុងការសម្លាប់នារីខ្មែរវ័យក្មេង។ លោកទាមទារឱ្យតុលាការផ្ដន្ទាទោសឱ្យបានធ្ងន់ធ្ងរលើជនដៃដល់ និងអ្នកដែលពាក់ព័ន្ធក្នុងករណីឃាតកម្មនេះ។
លោក អំ សំអាត៖«ជនជាតិចិនដែលគិតទុកជាមុនក្នុងការសម្លាប់ស្ត្រីវ័យក្មេងនេះ គឺជារឿងមួយសោកសៅ។ ករណីនេះគួរណាតែមានការផ្ដន្ទាទោសឱ្យធ្ងន់ធ្ងរបើរកទៅឃើញអ្នកដែលជាប់ពាក់ព័ន្ធនឹងរឿងទាំងអស់ហ្នឹង ត្រូវតែអនុវត្តច្បាប់ឱ្យបានតឹងរ៉ឹង និងធ្ងន់ធ្ងរ មិនត្រូវមានការបន្ធូរបន្ថយ ឬលើកលែងទេ»។
លោក អំ សំអាត ពិនិត្យឃើញថា ក្នុងសំណុំរឿងនេះក្រៅពីមានអំពើឃាតកម្មលើនារីខ្មែរ សមត្ថកិច្ចគប្បីបើកការស៊ើបអង្កេតឱ្យបានម៉ឺងម៉ាត់ ដើម្បីស្វែងរកបទល្មើសដែលក្រុមជនដៃដល់ប្រព្រឹត្ត ព្រោះលោកថា ការសម្លាប់នារីរងគ្រោះនោះគឺជាការសម្លាប់បំបិទមាត់ បំបិទភស្តុតាង ដែលជនរងគ្រោះអាចបានដឹងរឿងរ៉ាវនៃការប្រព្រឹត្តបទល្មើសរបស់ក្រុមជនជាតិចិនដែលជាក្រុមឃាតករសម្លាប់នាង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។