ប្រធានសមាគមគ្រូបង្រៀនឯករាជកម្ពុជា អ្នកស្រី អ៊ុក ឆាយាវី ជួបគ្រោះថ្នាក់ចរាចររងរបួសធ្ងន់ក្នុងពេលដែលអ្នកស្រីធ្វើដំណើរជាមួយប្ដីរបស់គាត់ត្រឡប់មកពីធ្វើការនៅរាជធានីភ្នំពេញ នៅរសៀលថ្ងៃទី១០ សីហា។
អ្នកស្រី អ៊ុក ឆាយាវី ប្រាប់អាស៊ីសេរីនៅមុននេះបន្តិចថា គ្រោះថ្នាក់ចរាចរនេះជាការប៉ុនប៉ងធ្វើបាបអ្នកស្រី ពីព្រោះមានបុរសម្នាក់ពាក់អាវបានចាប់ដៃម៉ូតូរបស់អ្នកស្រី បណ្ដាលឱ្យដួលសន្លប់ នៅភូមិចិនកោះ ឃុំគគីរ ស្រុកកៀនស្វាយ ខេត្តកណ្ដាល៖ «របួសដែលធ្ងន់ជាងគេនៅបាតដៃខាងឆ្វេង ដេរច្រើនថ្នេរ ហើយមាត់និងផ្ទៃមុខខ្ញុំប៉ោងខ្ញុំបុកនឹងដៃចង្កូតម៉ូតូ វាកញ្ឆក់ដៃចង្កូតផ្ដួលយើងតែម្ដង។ខ្ញុំអំពាវនាវឱ្យប្រជាពលរដ្ឋទាំងអស់យើងនាំគ្នាងើបឡើង កុំខ្លាចទោះបីជាខ្ញុំប៉ះពាល់ក្នុងការគេធ្វើស៊ីមែន ប៉ុន្តែខ្ញុំនៅតែមានជំហររឹងមាំដើម្បីទាមទារឱ្យមានការដោះលែងអ្នកប្រជាធិបតេយ្យពីក្នុងពន្ធនាគារទាំងអស់វិញ»។
ភ្លាមៗក្រោយពេលគ្រោះថ្នាក់ចរាចរលោកស្រីអ៊ុក ឆាយាវី ត្រូវបានប្ដីរបស់គាត់ដឹកទៅព្យាបាលនៅមន្ទីរពេទ្យឯកជនមួយកន្លែងនៅស្រុកកៀនស្វាយ ។ បច្ចុប្បន្នលោកស្រីបានចេញពីមន្ទីរពេទ្យទៅសម្រាកព្យាបាលជំងឺនៅផ្ទះសាច់ញាតិវិញហើយនៅខេត្តកណ្ដាល ដោយសារចង់រក្សាភាពស្ងប់ស្ងាត់។
ថ្មីៗ នេះអ្នកស្រី អ៊ុក ឆាយាវី ដែលជាមនុស្សស្និទ្ធនឹងលោក រ៉ុង ឈុន នោះ តែងតែដឹកនាំកម្មករ និងក្រុងយុវជនតវ៉ានៅមុខសាលាដំបូងរាជធានីភ្នំពេញទាមទារឱ្យតុលាការដោះលែងលោក រ៉ុង ឈុន ជាបន្តបន្ទាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។