អគារ​មួយ​ចំនួន​របស់ ឧកញ៉ា សុខ គង់ លើ​ភ្នំបូកគោ​រង​ការ​ចោទ​ប្រកាន់​ថា បង្ខាំង​មនុស្ស​ធ្វើ​ជា​ទាសករ​តាម​ប្រព័ន្ធ​អ៊ីនធឹណិត

ដោយ សុ ជីវី
2022.12.20
អគារ​មួយ​ចំនួន​របស់ ឧកញ៉ា សុខ គង់ លើ​ភ្នំបូកគោ​រង​ការ​ចោទ​ប្រកាន់​ថា បង្ខាំង​មនុស្ស​ធ្វើ​ជា​ទាសករ​តាម​ប្រព័ន្ធ​អ៊ីនធឹណិត ទិដ្ឋភាព​អគារ ៩ ​ស្ថិត​នៅ​រមណីយដ្ឋាន ឋានសួគ៌​បូកគោ​ ខេត្តកំពត ដែល​រង​ការ​ចោទ​ថា មាន​ការ​បង្ខាំង​មនុស្ស​រាប់​រយ​នាក់​ធ្វើ​ជា​ទាសករ​ឱ្យ​ធ្វើការ​ផ្នែក​​ឆបោក​តាម​ប្រព័ន្ធ​អ៊ីធឹណិត (Internet)។
រូបពីពលរដ្ឋ 2022-11-01

អគារ​មួយ​ចំនួន​ស្ថិត​នៅ​រមណីយដ្ឋាន ឋានសួគ៌​បូកគោ​ខេត្តកំពត កំពុង​រង​ការ​ចោទ​ប្រកាន់​ថា បង្ខាំង​មនុស្ស​រាប់​រយ​នាក់​ធ្វើ​ជា​ទាសករ​ឆបោក​តាម​ប្រព័ន្ធ​អ៊ីធឹណិត (Internet)។ អតីត​បុគ្គលិក​ធ្វើ​ការ​នៅ​ក្នុង​អគារ ៩ ជាប់​នឹង​សណ្ឋាគារ​ឋានសួគ៌​សុខា (Thansur Sokha Hotel) អះអាង​ថា ជន​បរទេស​ច្រើន​ជាតិ​សាសនា​ត្រូវ​បាន​ថៅកែ​ជនជាតិ​ចិន​ល្បួង​ពួកគេ​ឱ្យ​មក​ធ្វើ​ការងារ​ជា​អ្នក​បោកប្រាស់ (Scammer) តាម​ប្រព័ន្ធ​អនឡាញ (Online) នៅ​អគារ​លើ​ភ្នំបូកគោ និង​មិន​អនុញ្ញាត​ឱ្យ​ពួក​គេ​មាន​សេរីភាព​ឡើយ។ ទោះ​បី​ជា​យ៉ាង​ណា អាជ្ញាធរ​ទទួល​ស្គាល់​ថា មាន​បណ្ដឹង​ប៉ុន្តែ មិន​មែន​ជា​ការ​បង្ខាំង​មនុស្ស​នោះ​ទេ។

អ្នក​ធ្វើការ​នៅ​តំបន់​រមណីយដ្ឋាន​ភ្នំបូកគោ​អះអាង​ថា តំបន់​អគារ ៩ និង​សួន​ឧទ្យាន​កម្សាន្ត​ក្បែរ​សណ្ឋាគារ​ឋានសួគ៌​សុខា (Thansur Sokha Hotel) ហាក់​រង​ការ​រឹតត្បិត និង​មិន​អនុញ្ញាត​ឱ្យ​ភ្ញៀវ​ទេសចរ ចូល​ដើរ​លេង​កម្សាន្ត និង​ថតរូប​បាន​ដោយ​សេរី​នោះ​ទេ ខណៈ​ដែល​អគារ​ទាំង​នេះ​កំពុង​រង​ការ​ចោទ​ប្រកាន់​ថា មាន​ការ​បង្ខាំង​មនុស្ស​រាប់​រយ​នាក់​ឱ្យ​ធ្វើ​ជា​ទាសករ​ឆបោក​តាម​ប្រព័ន្ធ​អ៊ីនធឹណែត (Internet) នៅ​ក្នុង​អគារ​ទាំងនោះ។

អតីត​បុគ្គលិក​ម្នាក់​ធ្វើ​ការងារ​នៅ​ក្នុង​អគារ ៩ ថ្លែង​សុំ​មិន​បញ្ចេញ​ឈ្មោះ ព្រោះ​បារម្ភ​ពី​បញ្ហា​សុវត្ថិភាព បាន​ទម្លាយ​ប្រាប់​វិទ្យុ​អាស៊ី​សេរី​ឱ្យ​ដឹង​ថា នៅ​ខាង​ក្នុង​តំបន់​អគារ៩ អាច​មាន​បុគ្គលិក​ជា​ជនបរទេស​ប្រមាណ​ជាង ៦រយ​នាក់ ដែល​ត្រូវ​ថៅកែ​ជនជាតិ​ចិន បង្ខាំង​ឱ្យ​ធ្វើ​ការងារ​ជា​អ្នក​ឆបោក (Scammer) តាម​ប្រព័ន្ធ​អ៊ីនធឹណេត (Internet)។ លោកស្រី​បញ្ជាក់​ថា បុគ្គលិក​ឆបោក​ទាំង​នោះ​ភាគច្រើន​មាន​ជនជាតិ ឥណ្ឌូណេស៊ី (Indonesia) វៀតណាម (Vietnam) ថៃ (Thailand) ចិន (China) ភូមា ឬ​មីយ៉ាន់ម៉ា (Myanmar) និង​ជនជាតិ​ទ្បាវ (Laos) ជា​ដើម។

អតីត​បុគ្គលិក​សុំ​លាក់​ឈ្មោះ៖ «ខ្ញុំ​គិត​ថា លើ​បូកគោ​ការងារ​អ៊ីចឹង វា​មិន​គួរ​ឱ្យ​ពួក​គាត់ [ជនជាតិ​ចិន] ធ្វើ​ទៀត​ទេ ព្រោះ​ប្រទេស​យើង​វា​សេរី​ពេក។ អ៊ីចឹង ចង់​ឱ្យ​ពួក​គាត់ [អាជ្ញាធរ និង​រដ្ឋាភិបាល] លុបបំបាត់​ចោល​កុំ​ឱ្យ​មាន​ដោយសារ​តែ​ប្រើប្រាស់​លុយ និង​ដើម្បី​កុំ​ឱ្យ​ពួក​គាត់ [ជនជាតិ​ចិន] ហ្នឹង​ធ្វើ​អ្វី​ស្រេច​តែ​ចិត្ត​នៅ​លើ​ប្រទេស​ខ្មែរ​យើង»

អតីត​បុគ្គលិក​ក្នុង​អគារ ៩ រូប​នេះ ឱ្យ​ដឹង​ថា បុគ្គលិក​មួយ​ចំនួន​ប្រសិនបើ​ពួកគេ​ចង់​ចេញ​ពី​បរិវេណ​អគារ​នៃ​កន្លែង​ការងារ គឺ​ពួក​គេ​ត្រូវ​មាន​កាត វី អាយ ភី (V.I.P) និង​សុំ​អនុញ្ញាត​ពី​ថៅកែ​ជនជាតិ​ចិន​ជា​មុន​សិន។ ចំណែក បុគ្គលិក​មួយ​ចំនួន​ទៀត ត្រូវ​បាន​ថៅកែ​រឹតត្បិត ដោយ​មិន​អនុញ្ញាត​ឱ្យ​ពួក​គេ​ចេញ​ពី​បន្ទប់ ឬ​បរិវេណ​អគារ​នៃ​កន្លែង​ការងារ​នោះ​ទេ។

ប្រភព​ដដែល បាន​ទម្លាយ​ទៀត​ថា បុគ្គលិក​ធ្វើ​ការងារ​ជា​អ្នក​បោកប្រាស់​តាម​ប្រព័ន្ធ​អនឡាញ (Online) ទាំង​នោះ ដោយ​ថៅកែ​ជា​ជនជាតិ​ចិន​បាន​បង្កើត​គណនី​បណ្ដាញ​សង្គម​ក្លែងក្លាយ​ដូចជា ហ្វេសប៊ុក (Facebook) អ៊ីនស្តារក្រាម (Instagram) វ៉ត់សអែប (WhatsApp) ផ្ដល់​ឱ្យ​ពួកគេ​ក្នុង​ម្នាក់ៗ​មិន​ក្រោម ៦០ គណនី​ឡើយ។ លោកស្រី​ពន្យល់​ថា បុគ្គលិក​ឆបោក​ទាំងនោះ​ គឺ​ពួកគេ​មាន​តួនាទី​ទាក់ទង​ទៅ​កាន់​អតិថិជន ដើម្បី​ល្បួង​ឱ្យ​បញ្ជា​ទិញទំនិញ​តាម​ប្រព័ន្ធ​អនឡាញ (Online) និង​បញ្ចុះបញ្ចូល​អតិថិជន​ចូល​រួម​វិនិយោគ​ជាមួយ​ក្រុមហ៊ុន​ចិន។

បុគ្គលិក​ស្ត្រី​ម្នាក់៖ «គឺ​គាត់ [បុគ្គលិក​ជន​បរទេស] ឆាត (Chat) ជាមួយ​ភ្ញៀវ​ទាក់ទង ដើម្បី​ភ្ញៀវ​និយាយ​អំពី​រឿង​ដក​ដាក់​លុយ ឬ​ក៏​ទិញ​អីវ៉ាន់​បោកប្រាស់ របៀប​បោក​បញ្ឆោត។ ប៉ុន្តែ អា​ហ្នឹង​គាត់ [បុគ្គលិក​ជន​បរទេស] ជា​ខ្សែ​របស់​គាត់ ដូចជា ក្រុមការងារ (Team Work) របស់​គាត់​ពី​របៀប​ធ្វើ​ការ​បោកប្រាស់ របៀប​ធ្វើជា​អ្នកជំនួយ​ការ​ទិញ​អីវ៉ាន់​ខ្យល់»

តំបន់​អគារ៩ គឺ​ស្ថិតនៅ​ភាគ​ខាង​ក្រោយ ដែល​នៅ​ជាប់​នឹង​សណ្ឋាគារ​ឋានសួគ៌​សុខា (Thansur Sokha Hotel)។ ទោះ​យ៉ាង​ណា​ក្ដី នៅ​ពី​ខាង​មុខ​ច្រក​ចូល​នៃ​កន្លែង​ទទួល​ភ្ញៀវ​ទេសចរ​សណ្ឋាគារ​ឋានសួគ៌​សុខា គឺ​មាន​កន្លែង​បា​ផឹកស៊ី ព្រមទាំង​មាន​កង​សន្តិសុខ​ជា​ច្រើន​នាក់ ដើរ​យាមកាម​ចល័ត​យ៉ាង​ប្រុងប្រយ័ត្ន។ ភ្ញៀវ​ទេសចរ​ដែល​ចូល​ទទួល​ទាន​កាហ្វេ ឬ​អាហារ និង​ទស្សនា​បរិវេណ​សណ្ឋាគារ​នេះ ត្រូវ​បាន​កង​សន្តិសុខ​កំណត់​ទីតាំង​ឱ្យ​ដើរ​កម្សាន្ត​រួច​ជា​ស្រេច។ ថ្វី​បើ​បែប​នេះ​ក្ដី កាល​ពី​អំឡុង​ឆ្នាំ២០១៨ នៅ​ខាង​ក្នុង​នៃ​សណ្ឋាគារ​ឋានសួគ៌​សុខា​នេះ ពុំ​មាន​កង​សន្តិសុខ​រឹតត្បិត​ភ្ញៀវ​ទេសចរ​ទេ។ មិន​តែ​ប៉ុណ្ណោះ ភ្ញៀវ​ទេសចរ​ជាតិ និង​អន្តរជាតិ​តែងតែ​ចូល​ទស្សនា និង​លេងល្បែង​ក្នុង​កាស៊ីណូ​នៃ​សណ្ឋាគារ​នេះ​បាន​ដោយ​សេរី។ បច្ចុប្បន្ន សណ្ឋាគារ​ឋានសួគ៌​សុខា​ហាក់​ពុំ​មាន​ភ្ញៀវ​ទេសចរ​ច្រើន​កុះករ​នោះ​ទេ ក្រៅពី​កង​សន្តិសុខ​ប្រមាណ ១០នាក់ រង់ចាំ​ទទួល និង​បើក​ទ្វារ​ឡាន​ឱ្យ​ជនជាតិ​ចិន ដែល​ចេញ​ពី​សណ្ឋាគារ​នេះ។

Guard_post_at_entrance_of_building_9_on_Boko_Mount_top_110122.jpg
មានប៉ុស្តិ៍កងសន្តិសុខយាមការពារ​យ៉ាង​ប្រុងប្រយ័ត្​នៅ​ពី​ខាង​មុខ​ច្រក​ចូលតំបន់​អគារ៩ ដែល​ឋិតនៅ​​ខាង​ក្រោយ ​ជាប់​នឹង​សណ្ឋាគារ​ឋានសួគ៌​សុខា (Thansur Sokha Hotel) ភ្នំបូកគោ។ រូបពីពលរដ្ឋ 2022-11-01

កម្មករ​ម្នាក់​ជា​អ្នក​ជីក​ស្មៅ​ក្នុង​សួន​សណ្ឋាគារ​ឋានសួគ៌​សុខា​ប្រាប់​វិទ្យុ​អាស៊ី​សេរី​ថា រមណីយដ្ឋាន​ឋានសួគ៌​បូកគោ​មាន​សភាព​ស្ងប់ស្ងាត់ ពុំ​សូវ​មាន​ភ្ញៀវ​មក​ទស្សនា​ច្រើន​ដូច​ពេល​កន្លង​ទៅ​នោះ​ទេ។ កម្មករ​ដដែល​បញ្ជាក់​ថា បុគ្គលិក​សណ្ឋាគារ​ឋានសួគ៌​សុខា​នៅតែ​មាន​ចំនួន​ច្រើន ហើយ​អគារ៩ ដែល​នៅ​ជាប់​សណ្ឋាគារ​នេះ ក៏​មាន​ជនជាតិ​ចិន​ជួល​សម្រាប់​ធ្វើ​ការ​ដែរ។

កម្មករ​ម្នាក់​ជា​អ្នក​ជីក​ស្មៅ​ក្នុង​សួន​សណ្ឋាគារ​ឋានសួគ៌​សុខា៖ «បុគ្គលិក​នៅ​ក្នុង​ហ្នឹង [​សណ្ឋាគារ​ឋានសួគ៌​សុខា និង​អគារ៩] មាន​តែ​បុគ្គលិក​ចុងភៅ មើល​នេះ​មើល​នោះ។ បង​ឯង​ចង់​យក​ព័ត៌មាន​មែន? មិន​ងាយ​ទេ មាន​សន្តិសុខ​យាម​នៅ​ហ្នឹង​ដែរ។ មាន​សន្តិសុខ​នៅ​ទី​ហ្នឹង ហើយ​មាន​មេ ត​ពី​លើ​ហ្នឹង​ទៀត។ មេ​ច្រើន​ណាស់ ខ្ញុំ​មិន​សូវ​ស្គាល់​អស់​ទេ។ អគារ៩ នៅ​ខាង​ក្រោយ [សណ្ឋាគារ​ឋានសួគ៌​សុខា] ហ្នឹង។ កន្លែង​ហ្នឹង មាន​ចិន​នៅ​ទី​ហ្នឹង។ កន្លែង​ហ្នឹង​ចិន​ជួល​នៅ​ទេ​តើ ចិន​ជួល​ដេក​ធ្វើការ»

អតីត​បុគ្គលិក​ធ្វើការ​ក្នុង​តំបន់​អគារ៩ បញ្ជាក់​ថា ដំបូង​ឡើយ​ក្រុមហ៊ុន​ឆបោក​ជនជាតិ​ចិន​នេះ គឺ​មាន​មូលដ្ឋាន​នៅ​ខេត្ត​ព្រះសីហនុ។ ប្រភព​ដដែល​បញ្ជាក់​ទៀត​ថា រហូត​ថ្ងៃ​ទី២៣ ខែកញ្ញា កន្លង​ទៅ​ក្រុម​ថៅកែ​ជនជាតិ​ចិន​បាន​ប្រមូល​សម្ភារៈ​ការងារ និង​បញ្ជូន​បុគ្គលិក​ឱ្យ​ធ្វើការ​ក្នុង​អគារ​លើ​ភ្នំបូកគោ​នេះ។

អតីត​បុគ្គលិក​ធ្វើការ​ក្នុង​តំបន់​អគារ៩៖ «បញ្ហា​ហ្នឹង​ប៉ូលិស​ក៏​បាន​ដឹងរឿង អ៊ីចឹង​ហើយ​គាត់ [ថៅកែ​ជនជាតិ​ចិន] ក៏​បាន​ផ្លាស់ទី (Move) មក​លើ​បូកគោ​បណ្ដោះអាសន្ន​សិន»

លោកស្រី​និយាយ​ថា លោកស្រី​បាន​ចូល​ធ្វើ​ការងារ​ក្នុង​ក្រុមហ៊ុន​ឆបោក​នេះ​បាន​ត្រឹមតែ​ជាង ៤ខែ​ប៉ុណ្ណោះ។ លោកស្រី​បញ្ជាក់​ថា ពេល​ដែល​កំពុង​បម្រើ​ការងារ​លោកស្រី​មាន​តួនាទី​ស្វែង​រក​បុគ្គលិក​ពី​ប្រទេស​ឥណ្ឌូណេស៊ី (Indonesia) ក្នុង​មួយ​ខែ ៣ ទៅ ៥នាក់ ដើម្បី​មក​បម្រើ​ការងារ​ជា​អ្នក​ឆបោក​ឱ្យ​ក្រុមហ៊ុន​ចិន។ លោកស្រី ត្រូវ​បាន​ថៅកែ​បញ្ឈប់​ពី​ការងារ​កាល​ចុង​ខែតុលា កន្លង​ទៅ ដោយសារ​តែ​មិន​អាច​រក​បុគ្គលិក​ធ្វើ​អ្នក​ឆបោក​តាម​តម្រូវ​ការ​របស់​ក្រុមហ៊ុន​បាន។

តំបន់​ប្លុក​អគារ៩ គឺ​មាន​ការ​សាងសង់​អគារ​ចំនួន៩ ស្ថិតនៅ​ក្បែរៗ គ្នា។ អគារ​នីមួយៗ​មាន​កម្ពស់ ៣ជាន់ និង​មាន​បន្ទប់​ចំនួន ៧៨បន្ទប់។ អគារ​មួយ​ចំនួន​ដែល​ស្ថិត​ក្នុង​តំបន់​ប្លុក​អគារ៩ នេះ​គឺ​មាន​ការ​ព័ទ្ធ​របង​ខ្ពស់​អម​ដោយ​បន្លា​លួស និង​មាន​ការ​បំពាក់​កាមេរ៉ា​សុវត្ថិភាព​លើ​របង​ជាច្រើន។ ចំណែក ខាងក្រៅ​របង​នៃ​ចំណុច​ច្រក​ចេញ​ចូល​ពី​អគារ​មាន​កង​សន្តិសុខ​ប្រមាណ ១០នាក់ យាមកាម​តឹងរ៉ឹង ហើយ​ពួកគេ​ត្រៀម​វិទ្យុ​ទាក់ទង ឬ​អៃកូម (Icom) សម្រាប់​ទាក់ទង​គ្នា​រួច​ជា​ស្រេច នៅ​ពេល​ដែល​មាន​មនុស្ស​ប្លែក​មុខ​ចូល​ទៅ​ដល់​ក្បែរ​អគារ។ តំបន់​អគារ ៩ បើ​មើល​មួយ​ភ្លែត ហាក់​គ្មាន​មនុស្ស​រស់នៅ​នោះ​ទេ ហើយ​នៅ​តាម​កញ្ចក់​អគារ​នីមួយៗ ត្រូវ​បាន​គេ​បិទបាំង​វាំងនន​ពណ៌​ស។ ប៉ុន្តែ អ្វី​ដែរ​គួរ​ឱ្យ​កត់​សម្គាល់​នោះ ចាប់​តាំង​ពី​ព្រឹក​មក​អគារ​នីមួយ​សុទ្ធ​សឹងតែ​បើក​ម៉ាស៊ីន​ត្រជាក់​ចោល ហើយ​អ្នក​ដែល​ចេញ​ចូល​បរិវេណ​អគារ មាន​តែ​ជនជាតិ​ចិន​តែ​ប៉ុណ្ណោះ។

វិទ្យុ​អាស៊ី​សេរី​មិន​ទាន់​អាច​ទាក់ទង​ឧកញ៉ា សុខ គង់ ម្ចាស់​សណ្ឋាគារ​ឋានសួគ៌​សុខា (Thansur Sokha Hotel) និង​តំបន់​អគារ៩ ដើម្បី​សុំ​ប្រតិកម្ម​ឆ្លើយតប​ជុំវិញ​ការ​ចោទ​ប្រកាន់​ទាំង​នេះ​បាន​ទេ។ វិទ្យុ​អាស៊ី​សេរី ក៏​បាន​ព្យាយាម​ទាក់ទង អភិបាល​ខេត្តកំពត លោក ម៉ៅ ធនិន ដើម្បី​សាកសួរ​អំពី​រឿង​នេះ​ដែរ ក៏​ប៉ុន្តែ​ទូរស័ព្ទ​ហៅ​ចូល​តែ​ពុំ​មាន​អ្នក​ទទួល។

ទោះ​ជា​យ៉ាង​ណា​ក្ដី ស្នងការ​នគរបាល​ខេត្ត​កំពត លោក ម៉ៅ ច័ន្ទមធុរិទ្ធ ប្រាប់​វិទ្យុ​អាស៊ី​សេរី​ថា កន្លង​មក​លោក​ធ្លាប់​ទទួល​បាន​ពាក្យ​បណ្ដឹង​ពី​អ្នក​ធ្វើការ​នៅ​លើ​ភ្នំបូកគោ​នេះ​ដែរ ក៏​ប៉ុន្តែ​ពេល​លោក​ចាត់​កម្លាំង​ជំនាញ​ចុះ​ស្រាវជ្រាវ​គឺ​ពុំ​មានការ​បង្ខាំង​មនុស្ស​ធ្វើ​ទារុណកម្ម​នោះ​ទេ។ លោក​បញ្ជាក់​ថា មូលហេតុ​ដែល​បុគ្គលិក​ជា ជនបរទេស​ទាំង​នោះ​ប្ដឹង​មក​សមត្ថកិច្ច​ថា មាន​ការ​បង្ខាំង និង​ធ្វើ​ទារុណកម្ម​ពួកគេ គឺ​ដោយសារ​ជនបរទេស​ទាំង​នោះ​ចង់​ចាកចេញ​ពី​កន្លែង​ការងារ​លើ​ខ្នង​បូកគោ ដើម្បី​ធ្វើការ​នៅ​កន្លែង​ផ្សេង​ទៀត។

លោក ម៉ៅ ច័ន្ទមធុរិទ្ធ៖ «ក្រោយពេល​ដែល​យើង​ទទួល​បាន​ព័ត៌មាន​នូវ​បណ្ដឹង​នៃ​ជន​បរទេស​ទាំង​អស់ យើង​ចុះ​ទៅ​ដល់​ទីតាំង​កន្លែង​កើតហេតុ​យើង​អត់មាន​រក​ឃើញ​កន្លែង​បង្ខាំង​មនុស្ស​ដោយ​ខុសច្បាប់ មិន​មាន​នូវ​ការ​ធ្វើទារុណកម្ម ខ្ញុំ​សូម​បញ្ជាក់​ជូន​ប៉ុណ្ណឹង។ ហេតុផល​តែ​មួយ​គាត់​ប្ដឹង​គឺ​គាត់ [ជនបរទេស] ចង់​ទៅ​ធ្វើការ​នៅ​កន្លែង​ផ្សេង តែ​ប៉ុណ្ណឹង»

ថ្វីបើ​មេ​ប៉ូលិស​ផ្កាយ​ពីរ​រូប​នេះ​អះអាង​បែប​នេះ​ក្ដី លោក ម៉ៅ ច័ន្ទមធុរិទ្ធ មិន​បាន​បកស្រាយ​លម្អិត​ត្រង់​ចំណុច​ថា តើ​មូលហេតុ​អ្វី​បាន​ជនបរទេស​ទាំងនោះ​គ្រាន់​តែ​ចង់​ចាកចេញ​ពី​កន្លែង​ការងារ​លើ​ភ្នំបូកគោ ហើយ​ពួកគេ​បែរ​ជា​ដាក់ពាក្យ​បណ្ដឹង​មក​​កាន់​សមត្ថកិច្ច​ថា ត្រូវ​បាន​គេ​បង្ខាំង និង​ធ្វើទារុណកម្ម​នេះ​ទេ។

ទាក់ទង​នឹង​ការ​បង្ខាំង​មនុស្ស ធ្វើទារុណកម្ម និង​ជួញដូរ​មនុស្ស​ពី​ក្រុមហ៊ុន​ចិន កន្លងទៅ មាន​ការ​ចោទ​ប្រកាន់​ថា ឧកញ៉ា​គ្រាក់ៗ និង​មនុស្ស​ជំរិត​របស់​លោក ហ៊ុន សែន ជាប់ពាក់ព័ន្ធ​នឹង​អំពើ​បង្ខាំង​មនុស្ស​ដោយ​ខុស​ច្បាប់​នេះ។ ជាមួយ​គ្នា​នេះ ក៏​មាន​ការ​ចោទ​ប្រកាន់​ដែរ​ថា លោក ហ៊ុន សែន ធ្លាប់​ទទួល​បាន​ផលប្រយោជន៍​ពី​អ្នកជំនួញ​ជនជាតិ​ចិន​ដែល​មាន​អគារ​សម្រាប់​បង្ខាំង​មនុស្ស​នៅ​ក្នុង​ខេត្តព្រះសីហនុ។

លោក ហ៊ុន សែន មិន​ដែល​ចេញ​មុខ​បដិសេធ​អំពី​រឿង​នេះ​ទេ ហើយ​លោក​ក៏​បាន​ទទួល​ស្គាល់​អំពី​ប៉ះពាល់​សង្គម​ដោយសារ​តែ​ឧក្រិដ្ឋកម្ម​ជួញដូរ​មនុស្ស ខណៈ​កន្លង​មក​រដ្ឋាភិបាល​តែងតែ​បដិសេធ​រាល់​របាយការណ៍​នានា របស់​អង្គការ​ជាតិ និង​អន្តរជាតិ​ដែល​រក​ឃើញ​ថា កម្ពុជា​គឺជា​ទីតាំង​សម្រាប់​ឧក្រិដ្ឋជន​ជួញដូរ​មនុស្ស និង​បង្ខាំង​មនុស្ស​ដោយ​ខុស​ច្បាប់។

អនុប្រធាន​អចិន្ត្រៃយ៍​នៃ​គណៈកម្មាធិការ​ជាតិ​ប្រយុទ្ធ​ប្រឆាំង​អំពើ​ជួញដូរ​មនុស្ស អ្នកស្រី ជូ ប៊ុនអេង ប្រាប់​វិទ្យុ​អាស៊ី​សេរី​ថា ការ​ចោទ​ប្រកាន់​ថា មាន​ក្រុម​មន្ត្រី​ឧកញ៉ា​ដែល​មាន​ទំនាក់ទំនង​ជាមួយ​ជនជាតិ​ចិន​ចាប់​បង្ខាំង​មនុស្ស និង​ជួញដូរ​មនុស្ស​នៅ​កម្ពុជា គ្រាន់​ជា​ការ​ចោទប្រកាន់​ដែល​គ្មាន​ភស្តុតាង​ច្បាស់លាស់​តែ​ប៉ុណ្ណោះ។ ត្រង់​ចំណុច​នេះ អ្នកស្រី​បញ្ជាក់​ថា អាជ្ញាធរ​កម្ពុជា​មិន​អាច​បើក​ការ​ស៊ើបអង្កេត​លើ​អ្នក​ទាំង​នោះ ទៅ​តាម​តម្រូវការ​នៃ​មជ្ឈដ្ឋាន​នានា​ដែល​ចោទប្រកាន់​នោះ​ទេ ព្រោះ​អ្នកស្រី​ថា កម្ពុជា​មាន​ច្បាប់​ត្រឹមត្រូវ ហើយ​តុលាការ​ក៏​កំពុង​បន្ត​នីតិវិធី​រក​អ្នក​ដែល​ពាក់ព័ន្ធ។

អ្នកស្រី ជូ ប៊ុនអេង៖ «យើង​ចង់​ផ្ដោត​ទៅ​លើ​អ្នកណាមួយ​នោះ ដល់​គេ​មិន​បាន​ធ្វើ​ដូច​ចិត្ត​យើង​ចេះ​តែ​គិត​ថា គេ​អត់​ធ្វើ។ ប៉ុន្តែ ធម្មតា​កាល​គេ​ចោទ​ប្រកាន់​គេ​ត្រូវ​មាន​ភស្តុតាង គេ​ត្រូវ​មាន​ព័ត៌មាន​ពាក់ព័ន្ធ ហើយ​យើង​គ្រាន់តែ​ចោទ ហើយ​យើង​ទៅ​ធ្វើ​តាម​អំពើ​ចិត្ត​យើង​គឺ​អត់​បានទេ ពី​ព្រោះ​ប្រទេស​មាន​ច្បាប់។ ភាគច្រើន​ចង់​ផ្ដោត​ថា ចុះ​ម៉េច​មិន​យក​អ្នកនេះ ម៉េច​មិន​ចាប់​អ្នកនោះ ធ្វើ​តាម​យើង​តាម​អំពើ​ចិត្ត​អ៊ីចឹង​អត់​បាន​ទេ គឺ​យើង​ត្រូវ​តែ​អនុលោម​ទៅ​តាម​ច្បាប់»

ដោយឡែក ចំពោះ​ភាព​មិន​ប្រក្រតី​ក្នុង​អគារ​មួយ​ចំនួន​នៅ​ឧទ្យានជាតិ​ភ្នំបូកគោ​វិញ អ្នកស្រី ជូ ប៊ុនអេង ជំរុញ​ឱ្យ​អតីត​បុគ្គលិក​ធ្វើការ​ក្នុង​តំបន់​អគារ ៩ និង​អ្នក​ដែល​រងគ្រោះ​គួរ​ដាក់​បណ្ដឹង​តាមរយៈ​ទំព័រ​ហ្វេសប៊ុក លោក ស ខេង ដើម្បី​ឱ្យ​សមត្ថកិច្ច​រៀប​ចំ​នីតិវិធី​ទៅ​តុលាការ និង​ចុះ​ស្រាវជ្រាវ​អគារ​ទាំង​នោះ។

លោក ស ខេង៖ «អ៊ីចឹង បើ​ក្នុង​ករណី​មាន​បណ្ដឹង​គឺ​យើង​មាន​បង្អែក គឺ​យើង​ធ្វើ ពីព្រោះ​កាលណា​ដែល​យើង​ចូល​ទៅ​រុករើ​កន្លែង​ណាមួយ គឺ​គេ​មាន​ព្រះរាជអាជ្ញា​ទៅ​ដោយ​មាន​សិទ្ធ​ក្នុង​ការ​រុករក​មើល​កន្លែង​សង្ស័យ ក្នុង​ទីតាំង​កន្លែង​ឯកជន​របស់​គេ។ ខ្ញុំ​គិត​ថា ច្បាប់​ប្រទេស​ណា​ក៏​អ៊ីចឹង​ដែរ យើង​មិន​ចេះ​តែ​ចូលៗ តាម​អំពើ​ចិត្ត​ទេ»

ក្រោយ​ពី​រដ្ឋាភិបាល​ឯកបក្ស​ទទួល​ស្គាល់​ឱ្យ​ឧក្រិដ្ឋកម្ម​ជួញដូរ​មនុស្ស​នេះ សមត្ថកិច្ច​បាន​ចុះស្រាវជ្រាវ​តាម​តំបន់​អគារ​ដែល​ភាគច្រើន​គ្រប់គ្រង​ជនជាតិ​ចិន និង​បាន​ជួយ​សង្គ្រោះ​ជនបរទេស​ត្រូវ​បាន​គេបង្ខាំង​ធ្វើទារុណកម្ម ហើយ​បញ្ជូន​ទៅ​ប្រទេស​កំណើត​វិញ​ជា​បន្តបន្ទាប់។

របាយការណ៍​របស់​ក្រសួងមហាផ្ទៃ ឱ្យ​ដឹង​ថា គិត​ត្រឹម​ពី​ពាក់កណ្ដាល​ខែសីហា ដល់​ថ្ងៃ​ទី២៧ ខែតុលា សមត្ថកិច្ច​ទទួល​បាន​សំណើ​ពី​ជនរងគ្រោះ​ ៥២៩​ករណី និង​បាន​ជួយ​សង្គ្រោះ​មនុស្ស​ជិត ១ពាន់ ៤រយ​នាក់ (១.៣៧០នាក់)។ សមត្ថកិច្ច​ស្រាវជ្រាវ​បឋម​បាន​ ២៧៦សំណើ និង​បិទ​សំណុំ​រឿង​ ១៣៧​សំណុំរឿង ដោយ​រក​ឃើញ​មនុស្ស​ ៦៤៨​នាក់ ឃាត់​ខ្លួន​ជន​សង្ស័យ ដែល​ភាគ​ច្រើន​ជា​ជនជាតិ​ចិន ខ្មែរ និង​វៀតណាម​សរុប​ ៨២នាក់ បញ្ជូន​ទៅ​តុលាការ និង​បិទ​ក្រុមហ៊ុន​ចំនួន ៥ទីតាំង និង​ផ្អាក​អាជីវកម្ម ក្រុមហ៊ុន ៤ទីតាំង ដើម្បី​បន្ត​ស្រាវជ្រាវ។ អ្នកស្រី ជូ ប៊ុនអេង បញ្ជាក់​ថា ក្រុមហ៊ុន​ចំនួន ៥ទីតាំង​ត្រូវបិទ​នោះ គឺ​ស្ថិត​នៅ​តំបន់​អគារ​ឆៃណា ថោន (China Town) ក្នុង​ខេត្តព្រះសីហនុ។

ជុំវិញ​រឿង​នេះ អ្នកឃ្លាំមើល​ការ​រំលោភ​សិទ្ធិមនុស្ស​នៃ​អង្គការ​លីកាដូ (LICADHO) ប្រចាំ​ខេត្តកំពត លោក ប៉ែន វុទ្ធា យល់​ថា រដ្ឋាភិបាល និង​អាជ្ញាធរ​មូលដ្ឋាន​គួរតែ​ធ្វើ​អធិការកិច្ច​ចុះ​ស្រាវជ្រាវ ដើម្បី​រក​ឱ្យ​ឃើញ​ការ​ពិត​ថា​តំបន់​អគារ​មួយ​ចំនួន​នៅ​ឧទ្យានជាតិ​ភ្នំបូកគោ​ពិតជា​មាន​បុគ្គលិក​កំពុង​ធ្វើ​ការ​ដោយ​ខុសច្បាប់ ឬ​យ៉ាងណា។

លោក ប៉ែន វុទ្ធា៖ «យើង​មិនទាន់​និយាយ​ចាំបាច់​ថា ទីតាំង​នេះ​ជា​របស់​អ្នក​ណា​ទេ ឱ្យ​តែ​ខុសច្បាប់​គឺ​អាជ្ញាធរ​មាន​សមត្ថកិច្ច​ត្រូវតែ​ចុះ​ធ្វើការ​ស៊ើបអង្កេត ចុះ​ស្រាវជ្រាវ​ចំពោះ​ករណី​ហ្នឹង​ហើយ​ធ្វើការ​បង្ក្រាប​លើ​ករណី​ហ្នឹង ហើយ​រក​ឱ្យ​ឃើញ​នូវ​មេខ្លោង​ដាក់​ទោស​ទៅ​តាម​ផ្លូវច្បាប់។ ប្រសិន​បើ​យោគយល់​ទៅ​លើ​ទីតាំង​ជា​របស់​អ្នក​នេះ ជា​របស់​អ្នក​នោះ។ អ៊ីចឹង តើ​ការ​អនុវត្ត​ច្បាប់ និង​ការ​បង្ក្រាប​លើ​បទល្មើស​ដែល​ខុសច្បាប់​ហ្នឹង​វា​មិន​អាច​ថមថយ​បាន​ទេ។ វា​ក៏​អាច​ជះឥទ្ធិពល​ទៅលើ​ខេត្តកំពត​ផង ទៅ​លើ​ព្រះរាជាណាចក្រ​កម្ពុជា​ផង ចំពោះ​ករណី​ដែល​កើតឡើង​ទៅ​លើ​បទ​ល្មើស​ហ្នឹង»

ថ្វី​ដ្បិត​អាជ្ញាធរ​បាន​ជួយ​សង្គ្រោះ​ជន​បរទេស​រាប់​រយ​នាក់​បញ្ជូន​ទៅ​ប្រទេស​កំណើត​ពួក​គេ​ជា​បន្ត​បន្ទាប់​យ៉ាង​ណា​ក្ដី ក៏​មក​ទល់​នឹង​ពេល​នេះ រដ្ឋាភិបាល​នៅ​តែ​មិន​ទាន់​រក​ឃើញ​មេខ្លោង​ធំៗ ជាប់​ពាក់ព័ន្ធ​នឹង​ការ​បង្ខាំង និង​ជួញដូរ​មនុស្ស​នេះ ដើម្បី​បង្ហាញ​ឱ្យ​មហាជន​បាន​ដឹង​នៅ​ឡើយ ដ្បិត​ក្រុម​មេខ្លោង​ទាំង​នោះ អាច​ជា​មនុស្ស​បម្រើ​ផល​ប្រយោជន៍​ដល់​គណបក្ស​ប្រជាជន​កម្ពុជា និង​រដ្ឋាភិបាល​លោក ហ៊ុន សែន។ ជាង​នេះ​ទៅ​ទៀត ស្រប​ពេល​ដែល​កម្ពុជា​នៅតែ​ជាប់​ឈ្មោះ​ជា​ប្រទេស ដែល​មាន​អំពើ​ពុករលួយ​ជា​ប្រព័ន្ធ និង​មាន​អំពើ​និទណ្ឌភាព​ផង​នោះ ឧក្រិដ្ឋកម្ម​ជួញដូរ​មនុស្ស និង​ការ​បង្ខាំង​មនុស្ស​ដោយ​ខុស​ច្បាប់​នេះ ទំនង​រដ្ឋាភិបាល​លោក ហ៊ុន សែន នឹង​មិន​ងាយ​ដោះ​ស្រាយ​ឱ្យ​មាន​ប្រសិទ្ធភាព និង​លុប​បំបាត់​ឱ្យ​សាបរលាប​ចេញ​ពី​កម្ពុជា​ឡើយ៕

កំណត់ចំណាំ ចំពោះ​អ្នក​បញ្ចូលមតិ​នៅ​ក្នុង​អត្ថបទ​នេះ៖ ដើម្បីរក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។