༧གོང་ས་མཆོག་གིས་སྤྱི་ཁྱབ་བློན་ཆེན་མཆོག་ལ་ཐུཊ་རྗེ་ཆེ་ཞུས་འདུག

༧གོང་ས་མཆོག་གིས་རྒྱ་གར་བྷི་ཧཱར་Bihar་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་(Shri Nitish Kumar)མཆོག་ལ་བསྩལ་བའི་གསུང་འཕྲིན། ༢༠༡༧།༡།༡༥

༧གོང་ས་མཆོག་གིས་རྒྱ་གར་བྷི་ཧཱར་མངའ་སྡེའི་སྤྱི་ཁྱབ་བློན་ཆེན་མཆོག་ལ་ཐུགས་རྗེ་ཆེ་ཞུ་བའི་གསུང་འཕྲིན་བསྩལ་འདུག
སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་རྒྱ་གར་བྷི་ཧཱར་Bihar་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་(Shri Nitish Kumar)མཆོག་ལ་དུས་འཁོར་དབང་ཆེན་ཐེངས་༣༤་གོ་སྒྲིག་ཚགས་ཚུད་སླད་མངའ་སྡེའི་གཞུང་དང་། ལྷག་པར་ས་གནས་རྫོང་དཔོན་སོགས་ཀྱི་གཙོས་འབྲེལ་ཡོད་རྣམས་ནས་མཐུན་འགྱུར་རོགས་རམ་རྒྱ་ཆེ་གནང་བར་ཐུགས་རྗེ་ཆེ་ཞུའི་གསུང་འཕྲིན་ཞིག་སྩལ་གནང་མཛད་ཡོད་པའི་ནང་། བདུན་ཕྲག་གཉིས་རིང་གི་དུས་དབང་སྐབས་སྤྱི་ཁྱབ་བློན་ཆེན་མཆོག་སྐུ་སྒེར་གྱི་ངོས་ནས་ཐུགས་ཁུར་ཧ་ཅང་གནང་བ་མ་ཟད། བྷི་ཧར་མངའ་སྡེ་གཞུང་ངོས་ནས་ས་གནས་ཀྱི་དགོས་མཁོར་གཞིགས་པའི་མཐུན་འགྱུར་རོགས་རམ་ཧ་ཅང་ཚགས་ཚུད་གནང་བར་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། ཕྱོགས་མཚུངས་གནས་སྐོར་བ་ཚོས་ཀྱང་བྷི་ཧར་མངའ་སྡེ་གཞུང་དང་བློན་ཆེན་སྐུ་སྒེར་ནས་མཐུན་འགྱུར་དང་གྲ་སྒྲིག་ཚགས་ཚུད་བཅས་ལ་ཡི་རངས་བསྔགས་བརྗོད་ཧ་ཅང་ཞུ་བཞིན་འདུག ནང་པ་ཚོས་གནས་རྩ་ཆེ་ཤོས་སུ་བརྩི་བཞིན་པའི་གནས་མཆོག་རྡོ་རྗེ་གདན་དུ་དུས་འཁོར་དབང་ཆེན་གོ་སྒྲིག་ལམ་ལྷོངས་ལྡན་པ་བྱུང་བ་དེ་ནི་བློན་ཆེན་སྐུ་ཉིད་ཀྱི་ཐུགས་ཁུར་དང་མངའ་སྡེའི་གཞུང་གི་ལྷན་ཁང་འདྲ་མིན་གྱི་ལས་བྱེད་རྣམ་པས་དུས་ཚོད་བཏང་ནས་འབད་བརྩོན་རྒྱ་ཆེ་གནང་ཡོད་པས། ༧གོང་ས་སྐྱབས་མགོན་ཆེན་པོ་གང་ཉིད་ཀྱིས་ཤེས་ཚོད་ལ་ཐེངས་འདིའི་དུས་འཁོར་དབང་ཆེན་སྐབས་རྒྱལ་ཁབ་ཁག་༩༢་ནས་ཆོས་ཞུ་བ་མི་གྲངས་ ༡༧༥༠༠༠་ཙམ་ཕེབས་ཡོད་པ་དང་། ལྷག་པར་འདས་པའི་ལོ་ཤས་ནང་གནས་མཆོག་རྡོ་རྗེ་གདན་གྱི་བྱང་ཆུབ་མཆོད་རྟེན་རིན་པོ་ཆེའི་གཡས་གཡོན་དུ་སྤྱི་ཡོངས་ཀྱི་གནས་སྟངས་ཧ་ཅང་ཡར་རྒྱས་ཕྱིན་པའི་རྣམ་པ་གསལ་པོ་མཐོང་རྒྱུ་ཡོད་པར་༧གོང་ས་སྐྱབས་མགོན་ཆེན་པོ་མཆོག་ལ་དགའ་སྤོབས་ཧ་ཅང་བྱུང་ཞེས་འཁོད་ཡོད་འདུག
སྤྱི་ནོར་༧གོང་ས་མཆོག་གི་བསྩལ་བའི་གསུང་འཕྲིན་དེ་སྤྱི་ཁྱབ་བློན་ཆེན་མཆོག་གིས་ཁོང་ཉིད་ཀྱི་ངོ་དེབ་ཐོག་བཞག་པ་མ་ཟད། ༧གོང་ས་ཏཱ་ལའི་བླ་མ་མཆོག་གིས་གསུང་འཕྲིན་དེ་འདྲ་ཞིག་ཁོང་ལ་བསྩལ་བར་སྙིང་ཐག་པ་ནས་བཀའ་དྲིན་ཆེ་ཞེས་བྲིས་འདུག།

གསར་འགོད་པ་འཆི་མེད།