རྒྱ་གར་གྱི་མངའ་སྡེ་ཨ་རུ་ཎ་ཅཱལ་ནང་གི་ས་ཚིགས་ ༦༢ ལ་རྒྱ་ནག་གཞུང་གིས་མིང་བཏགས་པ།

ཕྲེང་རྡོའི་སྐུད་པ་ཞེས་རྩོམ་བྱང་དུ་བཀོད་པ་སྟེ་ཕྱི་ལོ་ ༢༠༡༧ ནས་བཟུང་རྒྱ་གར་གྱི་མངའ་སྡེ་ཨ་རུ་ཎ་ཅཱལ་ནང་གི་ས་ཚིགས་ ༦༢ ལ་རྒྱ་ནག་གཞུང་གིས་མིང་བཏགས་པའི་གནས་ཚུལ་བྱུང་པའི་ཐད་དཔྱད་གཞིའི་ཉམས་ཞིབ་གནང་ཡོད་ཅིང་། དེ་བརྒྱུད་རྒྱ་ནག་གཞུང་གིས་སྦཡེ་དྷུ་ཞེས་པའི་སྤྱི་ཚོགས་དྲ་ལམ་ཁག་ཏུ་ས་ཁུལ་འདི་དག་ལ་རྒྱ་ནག་གི་བདག་དབང་ཡོད་ཚུལ་བསྒྲགས་ཡོད་པ་ནི་མ་འོངས་མི་རབས་རྗེས་མ་ཚོར་ས་ཁུལ་འདི་རྒྱ་ནག་ལ་བདག་དབང་ཡོད་པ་བཟོ་སྐྲུན་བྱེད་པ་ཞིག་ཡིན་པར་ངོས་འཛིན་གནང་གི་ཡོད་ཅིང་།  ལྷག་པར་རྒྱ་གར་གྱི་ས་ཁྱོན་ཀི་ལོ་མི་ཊར་གྲུ་བཞི་མ་ཁྲི་ ༩ ཙམ་རྒྱ་ནག་གི་མངའ་ཁོངས་ཡིན་ཚུལ་ས་ཁྲ་སོགས་ནང་བཀོད་ཡོད་པ་ཤེས་རྟོགས་བྱུང་འདུག་པས།  ཨ་རུ་ཎ་ཅཱལ་མངའ་སྡེ་གཅིག་པུར་མཚོན་ན་ས་ཁྱོན་ཀི་ལོ་མི་ཊར་གྲུ་བཞི་མ་ ༨༣༧༠༠ ལྷག་ཙམ་ཡོད་པ་རེད།  ཐེངས་འདིའི་གནད་དོན་གླེང་མོལ་གྱི་ལས་རིམ་ནང་།  རྒྱ་གར་དུ་རྟེན་གཞི་བྱས་པའི་ (Foundation for Non-Violent Alternatives) ཞེས་འཚེ་བ་མེད་པའི་ཐབས་ལམ་གྱི་གདམ་གའི་ཐེབས་རྩ་ཁང་གི་ཉམས་ཞིབ་པ་བསྟན་འཛིན་དགྲ་འདུལ་ལགས་དང་ལྷན་ཨེ་ཤེ་ཡ་རང་དབང་རླུང་འཕྲིན་ཁང་གི་བོད་སྐད་སྡེ་ཚན་གྱི་འགན་འཛིན་གཞོན་པའི་ལས་ཚབ་བཀྲིས་དབང་ཕྱུག་ལགས་ཀྱིས་གླེང་མོལ་ཞུས་པར་གསན་རོགས་གནང་།
གསར་འགོད་པ། བཀྲ་ཤིས་དབང་ཕྱུག
རྩོམ་སྒྲིག་པ། བཀྲ་ཤིས་དབང་ཕྱུག
དྲྭ་ཐོག་སྤེལ་མཁན། ཡེ་ཤེས་བཀྲ་ཤིས།