ཨང་སན་སུ་ཅིའི་ཚོགས་པར་རྒྱལ་ཁ་ཐོབ་པ།

༄༅༎ཕྱི་ཟླ་༤ཚེས་༡རེས་གཟའ་ཉི་མའི་ཉིན་འབར་མའི་གྲོས་ཚོགས་ཀྱི་འོས་བསྡུ་ཆེན་མོ་བྱས་པའི་རྗེས། འབར་མའི་དམངས་གཙོ་ཚོགས་པས། ཁོང་ཚོ་དམངས་གཙོ་ཚོགས་པའི་དབུ་ཁྲིད་ལྕམ་Aung Sun Suu Kyi ལ་རྒྱལ་ཁ་ཐོབ་ཡོད་པའི་ངོས་འཛིན་བྱེད་ཀྱི་ཡོད་པ་རེད།
འབར་མའི་རྒྱལ་ཁབ་དེ་ནི་མི་ལོ་བཅུ་ཕྲག་མང་པོའི་རིང་དྲག་པོས་དབང་བསྒྱུར་བྱས་ཏེ། དམངས་གཙོ་དོན་གཉེར་ཅན་ཐོག་རྡུང་རྡེག་དང་བཙོན་འཇུག་བྱས་པ་མ་ཟད། འབར་མའི་དམངས་གཙོའི་དབུ་ཁྲིད་ལྕམ་Aung Sun Suu Kyi ཡང་ལོ་མང་རིང་ཁྱིམ་ཚང་ནས་འགྲོ་བསྐྱོད་ཀྱི་རང་དབང་མེད་པར་བཟང་བཙོན་ལྟ་བུ་དོ་དམ་བཀག་ཉར་བྱས་ཡོད་ཅིང༌། འོན་ཀྱང་བར་ལམ་མི་དམངས་ཀྱི་གཞུང་ཟེར་སླེབས་པའི་རྗེས། ལྕམ་Aung Sun Suu Kyi གཙོས་པའི་ཆབ་སྲིད་བཙོན་པ་མང་པོ་གློད་བགྲོལ་བཏང་བ་སོགས་དམངས་གཙོའི་བཅོས་བསྒྱུར་གྱི་ཁ་ཕྱོགས་སུ་བསྐྱོད་པ་མ་ཟད། ད་རེས་གྲོས་ཚོགས་ཀྱི་འོས་བསྡུ་དེའི་ནང་དམངས་གཙོའི་དབུ་ཁྲིད་ལྕམ་Aung Sun Suu Kyi ཞུགས་སུ་བཅུག་པ་སོགས་གྲོས་ཚོགས་འོས་བསྡུ་དེ་ནི་འབར་མའི་རྒྱལ་ཁབ་དམངས་གཙོའི་ཕྱོགས་སུ་བསྐྱོད་པའི་ལོ་རྒྱུས་གསར་པ་ཞིག་ཏུ་གྱུར་ཡོད་པ་རེད། ལྷག་དོན་ད་རེས་འོས་བསྡུའི་དེའི་ནང་འབར་མའི་དམངས་གཙོ་ཚོགས་པའི་དབུ་ཁྲིད་ལྕམ་Aung Sun Suu Kyi ལ་རྒྱལ་ཁ་ཐོབ་པ་དངོས་སུ་ངེས་གཏན་བྱུང་བ་ཡིན་ཚེ། ལྷོ་ཤར་ཡེ་ཤི་ཡའི་རྒྱལ་ཁབ་འབར་མའི་ནང་གི་གལ་འགངས་ཆེ་བའི་ཆབ་སྲིད་ཀྱི་འགྱུར་བགྲོས་དང་ལོ་རྒྱུས་གལ་འགངས་ཆེན་པོ་ཞིག་ཏུ་འགྱུར་རྒྱུ་ཡིན་པ་རེད།།