༄༅༎བལ་ཡུལ་ནང་གི་བོད་མི་ཚོས་ཁ་སྔོན་ཕྱི་ཟླ་གསུམ་པའི་ཚེས་༡༠ ནས་འགོ་བཙུགས་ཏེ་རྒྱ་ནག་གཞུང་གིས་བོད་ནང་གི་བོད་མིའི་ཐོག་དྲག་གནོན་བྱས་པའི་བྱ་སྤྱོད་ལ་མུ་མཐུད་ངོ་རྒོལ་ལས་འགུལ་སྤེལ་བཞིན་པ་ལྟར་ད་རིང་གི་ངོ་རྒོལ་ལས་འགུལ་ནང་བལ་པོའི་ཉེན་རྟོག་པས་བོད་པའི་བུད་མེད་དྲུག་བརྒྱ་ལྷག་འཛིན་བཟུང་བྱས་ཡོད་པ་དང་དེའི་ནང་ནས་མང་ཆེ་བ་བཙུན་མ་ཡིན་པ་རེད།
ད་རིང་བོད་མི་ཚོས་བལ་ཡུལ་གྱི་རྒྱལ་སའི་ནང་དུ་ལས་འགུལ་མི་འདྲ་བ་རིམ་པ་གསུམ་སྤེལ་རྒྱུའི་འཆར་གཞི་བྱས་ཀྱང་བལ་པོའི་ཉེན་རྟོག་པས་བཀག་འགོག་བྱས་པ་དང་ཉེན་རྟོག་དཔོན་རིགས་ ཨར་པི་རྡར་མཱ་ལཱ་ ཞུ་བས་ངོ་རྒོལ་གནང་མཁན་བུད་མེད་༦༠༠ ལྷག་འཛིན་བཟུང་བྱས་ཡོད་པ་ནི། རྒྱལ་ས་ཀ་ཐ་མན་གྲུའི་བཀག་ཉར་ཁང་དུ་དོ་དམ་བྱས་ཡོད་པའི་སྐོར་གསུངས་ཡོད་ཅིང་། བལ་ཡུལ་ནང་གི་བོད་མི་ཚོ་ཁ་སྔོན་ཕྱི་ཟླ་གསུམ་པའི་ཚེས་༡༠ ནས་རྒྱལ་ས་ཀ་ཐ་མན་གྲུའི་ནང་ངོ་རྒོལ་ལས་འགུལ་མུ་མཐུད་སྤེལ་བཞིན་པ་དང་བལ་པོའི་ཉེན་རྟོག་པས་ཉིན་ལྟར་བཞིན་བོད་མི་ངོ་རྒོལ་གནང་མཁན་འཛིན་བཟུང་བྱས་པའི་ནང་ནས་ད་རེས་ཐེངས་དང་པོ་མི་གྲངས་མང་ཤོས་འཛིན་བཟུང་བྱས་པ་མ་ཟད། དེ་ཡང་བུད་མེད་ཁོ་ནས་ངོ་རྒོལ་ལས་འགུལ་སྤེལ་བ་ཡང་ཐེངས་དང་པོ་ཡིན་པ་རེད། ངོ་རྒོལ་བྱེད་མཁན་བུད་མེད་རུ་ཁག་དང་པོ་དེ་ཞི་བའི་ཐོག་ནས་རྒྱ་ལམ་ཐོག་གོམ་བགྲོད་ཀྱི་ལས་འགུལ་སྤེལ་རྒྱུའི་འཆར་གཞི་ཡོད་ཀྱང་ཉེན་རྟོག་པས་ཁོང་རྣམས་རྒྱ་ལམ་ཐོག་མ་སླེབས་གོང་བཀག་འགོག་བྱས་པ་དང་། ཐེངས་གཉིས་པའི་བུད་མེད་རུ་ཁག་རྣམས་ཀྱིས་མུ་མཐུད་རྒྱ་ལམ་ཐོག་འཛུལ་ཐབས་བྱས་ཀྱང་ཉེན་རྟོག་པས་འཕྲལ་མ་ཉིད་དུ་བཀག་འགོག་བྱས་ཏེ་ཁོང་རྣམས་ཉེན་རྟོག་པའི་མོ་ཊའི་ནང་བླུགས་ཏེ་དོ་དམ་ཁང་དུ་ཁྲིད་པ་དང། རུ་ཁག་མཐའ་མ་དེས་རྒྱ་ནག་གི་ཐོངས་མཆན་ལག་འཁྱེར་སྤྲོད་སའི་ལས་ཁུངས་ཀྱི་ཉེ་འཁྲིས་ངོ་རྒོལ་ལས་འགུལ་སྤེལ་ཐབས་བྱས་ཀྱང་ཉེན་རྟོག་པས་བཀག་འགོག་བྱས་ནས་འཛིན་བཟུང་བྱས་ཡོད་པ་རེད།