རྒྱ་ནག་གིས་འཕྲིན་དྲ་སྒོ་འབྱེད་ལ་བོད་ཀྱི་རྒྱལ་གླུ་བཏང་འདུག


2013-11-06
Share
བོད་ལྗོངས་འཕྲིན་དྲ་ཞེས་བའི་མདུན་ངོས་། རྒྱ་ནག་གིས་འཕྲིན་དྲ་སྒོ་འབྱེད་ལ་བོད་ཀྱི་རྒྱལ་གླུ་བཏང་འདུག
པར། དྲ་ངོས་པར་བ།

རྒྱ་ནག་གིས་ཉིན་ཤས་གོང་གསར་དུ་དྲ་ལམ་ཕྱིར་གཏོང་བྱས་བའི་བོད་ལྗོངས་འཕྲིན་དྲའི་གཉེན་ཆས་དང་། དྲ་བར་བོད་རྒྱལ་ཁབ་ཀྱི་རྒྱལ་གླུ་བཞག་འདུག

ཉེ་ལམ་བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་འགོ་ཁྲིད་མཐོ་ཤོས་ཁྲེན་ཆོན་གོ་ཡིས་བོད་ནང་ཕྱིའི་དཔུང་ཤུགས་དང་། ཏཱ་ལའི་རུ་ཚོགས་ཀྱི་སྒྲ་གཟུགས་ཙམ་ཡང་མཐོང་ཐོས་མེད་པ་བཟོ་རྒྱུ་ཡིན་པ་བཤད་ཞོར་། རྒྱ་ནག་གཞུང་གི་གཏིང་འཛིན་འོག་ཡོད་པའི་བོད་ལྗོངས་རླུང་འཕྲིན་དང་། བརྙན་འཕྲིན་ཁང་སོགས་ཀྱིས་བོད་ཀྱི་གསར་འགྱུར་དང་། བརྙན་འཕྲིན། པར་རིས་སོགས་སྣ་འཛོམས་ཡོད་པའི་བོད་ལྗོངས་འཕྲིན་དྲ་ཞེས་བ་ཞིག་གསར་དུ་སྒོ་འབྱེད་བྱས་ཡོད་པ་དང་། བོད་ལྗོངས་འཕྲིན་དྲའི་གཉེན་ཆས་དང་། དྲ་བའི་མདུན་ངོས་སུ་འདས་པའི་ལོ་ལྔ་བཅུ་ལྷག་གི་རིང་བོད་ནང་ཡོངས་སུ་བཀག་པའི་བོད་རྒྱལ་ཁབ་ཀྱི་རྒྱལ་གླུ་བཞག་པའི་གནས་ཚུལ་ཐོན་ཡོད།

ཁོང་ཚོའི་དྲ་ངོས་ཀྱི་གནས་ཚུལ་ལྟར་ན། བོད་ལྗོངས་འཕྲིན་དྲ་ཞེས་བ་ནི་གཙོ་བོ་འགུལ་རིས་ཆ་འཕྲིན་པར་གཞི་ཡིན་པ་དང་། དེའི་ནང་བོད་ཀྱི་གསར་འགྱུར་ཆ་འཕྲིན་དང་། རླུང་འཕྲིན་བརྙན་འཕྲིན། བརྙན་ཕབ། གླུ་གཞས། པར་མཛོད་སོགས་གཞི་གཅིག་ཏུ་བསྡུས་ཤིང་། བོད་རྒྱ་ཡིག་རིགས་གཉིས་མཉམ་དུ་བཀོལ་སྤྱོད་ཐུབ་པའི་APPསམ་གཉེན་ཆས་ཞིག་ཡིན། APPདེ་ནས་བོད་དང་འབྲེལ་བ་ཡོད་པའི་ཡི་གེ་དང་པར་རིས། སྒྲ་བརྙན་ཕབ་སོགས་གསར་འགྱུར་ཆ་འཕྲིན་ཁུངས་བཙན་ཤེས་ཐུབ་པ་དང་། བོད་རྒྱ་སྐད་རིགས་གཉིས་ནས་བཏང་བའི་བོད་ཀྱི་སྲོལ་རྒྱུན་གླུ་གཞས་དང་དེང་དུས་གླུ་གཞས་ཅུང་ཆ་ཚང་བ་ཉན་ཐུབ་པ་དང་ཆབས་ཅིག་བོད་ཡིག་གི་གཞས་ཚིག་ལྟ་ཐུབ་པ་མ་ཟད། བོད་ཀྱི་ཡུལ་ལྗོངས་སོགས་ཀྱི་པར་རིས་ཀྱང་ལོངས་སྤྱོད་ཐུབ་པ་དང་། འཕྲིན་དྲ་འམ་གཉེན་ཆས་འདིའི་བཟོ་བསྐྲུན་བདག་དབང་འཛིན་མཁན་བོད་ལྗོངས་མི་དམངས་ཀུན་ཁྱབ་རླུང་འཕྲིན་ལས་ཁུངས་ཡིན་པ་སོགས་འཁོད་འདུག

འཕྲིན་དྲ་གཉེན་ཆས་གསར་པ་དེ་ནི་ཕྱི་ཟླ་༡༠ཚེས་༢༩ཉིན་གསར་དུ་སྒོ་འབྱེད་བྱས་བ་དང་། དེ་བོད་རང་སྐྱོང་ལྗོངས་ཀྱི་འབྲེལ་ཡོད་འགོ་ཁྲིད་རྣམ་པས་ལྟ་ཞིབ་དང་། ཆོག་མཆན་ཐོབ་པའི་གཞུང་འབྲེལ་གསར་འགྱུར་བརྒྱུད་ལམ་ཞིག་ཡིན་འདུག

དྲ་གནས་ནི་http://www.vtibet.com/tb/download/

གསར་འགོད་པ་ཀླུ་འབུམ་བཀྲ་ཤིས།

མཆན་འཇོག་རོགས།

གཤམ་དུ་ཡོད་པའི་འགེང་ཤོག་འགེང་ནས་སོ་སོའི་མཆན་བཀོད་རོགས་གནང་། མཆན་དེ་མ་ཐག་ཏུ་གཟིགས་མི་ཐུབ་པ་དང་འབྲེལ་ཡོད་འགན་འཛིན་གྱིས་ང་ཚོའི་སྒྲིག་འཛུགས་ཀྱི་ནང་དོན་སྤྱོད་ཕྱོགས་དང་བསྟུན་ནས་བསྒྱུར་བཅོས་དང་ཕྱོགས་སྒྲིག་བྱེད་དེ་དྲ་གནས་ཐོག་ཁྱབ་སྤེལ་བྱ་སྲིད། མཆན་གྱི་ནང་དོན་ཐད་ཨེ་ཤེ་ཡ་རང་དབང་རླུང་འཕྲིན་ཁང་ལ་འགན་གང་ཡང་མེད་པ་དང་། མཆན་གཞག་གནང་སྐབས་གཞན་གྱི་ཚོར་སྣང་ལ་བརྩི་མཐོང་དང་དངོས་འབྲེལ་ལ་ཐུགས་སྣང་གནང་རོགས་ཞུ༎

དྲ་གནས་ཆ་ཚང༌།