༄༅༎རྒྱ་ནག་གི་སྲིད་འཛིན་ཧུ་ཇིན་ཏའོ་མཆོག་གིས་འཆར་ལོའི་ནང་ཡུལ་མི་རྣམས་ཀྱི་ལས་ཀའི་གནས་སྟངས་དེ་ཡ་ང་བའི་གནས་སྟངས་ཤིག་ཏུ་ཆགས་རྒྱུ་ཡིན་སྐོར་ཉེན་བརྡ་བཏང་ཡོད་པ་རེད།
རྒྱ་ནག་གི་གཞུང་འབྲེལ་མི་མང་གསར་ཤོག་ཅེས་པས་སྲིད་འཛིན་ཧུ་ཇིན་ཏའོ་ཁ་ཉིན་ཡུལ་གྱི་བྱང་ཤར་ཞིང་ཆེན་ལོའོ་ནན་ལ་གཟིགས་བསྐོར་དུ་བསྐྱོད་སྐབས་འཆར་ལོའི་ནང་འཛམ་གླིང་གི་དཔལ་འབྱོར་དཀའ་ངལ་གྱི་ཤུགས་རྐྱེན་གྱིས་ཡུལ་གྱི་ལས་ཀའི་གནས་སྟངས་དེ་ཆེས་ཡ་ང་བ་ཆགས་རྒྱུ་ཡིན་པ་གསུང་སྐོར་གནས་ཚུལ་བཏོན་ཡོད་པ་རེད།
ངའི་རེ་བར་ལས་ཀ་སྤྲོད་མཁན་ཚོགས་སྡེ་ཁག་གིས་ལས་ཀ་འཚོལ་མཁན་མི་མང་རྣམས་པར་རོགས་རམ་གང་ཡོང་དང་སྤྱི་ཚོགས་འཆམ་མཐུན་དང་བརྟན་ལྷིང་ཡོང་རྒྱུར་འཕྱར་གྲུ་མཉམ་འདེགས་གནང་བའི་རེ་བ་ཡོད་སྐོར་གོང་ཞུས་མི་མང་གསར་ཤོག་ཞེས་པའི་ནང་བཀོད་ཡོད་པ་རེད།
རྒྱ་གཞུང་གི་དཔོན་རིགས་རྣམས་ཀྱིས་འདི་ལོ་ཕྱི་ཟླ་བཅུ་གཅིག་པའི་ནང་ཡུལ་མི་རྣམས་ཀྱི་ད་ཡོད་ལས་ཀ་ཁག་མུ་མཐུད་གནས་རྒྱུ་དང་ལས་ཀ་གསར་པ་ཐབས་འཚོལ་ཆེད་འཆར་གཞི་ཁག་ཅིག་གསར་སྒྲིག་གནང་ཡོད་ཅིང་ལྷག་པར་དུ་ཡུལ་གྱི་གྲོང་གསེབ་ཁག་གི་ལས་མི་ས་ཡ་ཉིས་བརྒྱ་སུམ་ཅུ་ཆེད་འཆར་གཞི་ཁག་ཅིག་བཀོད་སྒྲིག་གནང་ཡོད་པ་རེད། ཡིན་ནའང་ཡུལ་ནང་ཉེ་ལམ་ལས་ཀ་ཤོར་མཁན་མི་མང་རྣམས་ཀྱིས་ཟིང་ཆ་སློང་བའི་གནས་ཚུལ་མང་དག་བྱུང་རྗེས་རྒྱ་གཞུང་གི་དཔོན་རིགས་རྣམས་ཀྱིས་ད་ལྟའི་ཡུལ་གྱི་དཔལ་འབྱོར་གྱི་དཀའ་རྙོག་དེས་བདེ་འཇགས་ཐོག་ཉེན་ཚབས་ཡོང་བའི་བློ་འཚབ་སྐྱེས་གཞི་ཆགས་ཡོད་པ་རེད།