བོད་ནང་ཕྱི་ཕྱོགས་ནས་རྒྱང་སྲིང་བྱས་པའི་རླུང་འཕྲིན་བཀག་འགོག

༄༅༎རྒྱ་ནག་གཞུང་ལ་ངོ་རྒོལ་བྱ་ཆེད་འདས་པའི་ཟླ་བ་བཅོ་བརྒྱད་ཙམ་གྱི་ནང་། བོད་ནང་བོད་མི་དགུ་བཅུ་ཙམ་གྱིས་རང་ལུས་མེར་བསྲེག་བཏང་བའི་གནས་ཚུལ་བྱུང་བར་བརྟེན། རྒྱ་ནག་གཞུང་གི་དེང་སྐབས་བོད་ཀྱི་ས་ཁུལ་གང་སར་དྲག་གནོན་དང་དམ་དྲག་ཤུགས་ཆེ་རུ་གཏོང་བཞིན་ཡོད་འདུག   
དེ་ཡང་རྒྱལ་སྤྱིའི་གསར་འགྱུར་རྒྱུད་ལམ་ཁག་ནང་གནས་ཚུལ་ཐོན་གསལ་ལ་གཞིགས་ན།  རྒྱ་ནག་གཞུང་གིས་བོད་ནང་བོད་མི་ཚོས་རྒྱ་ནག་གཞུང་ལ་ངོ་རྒོལ་མཚོན་ཆེད་དུ་རང་ལུས་མེར་བསྲེག་བཏང་དང་གཏོང་བཞིན་པ་དེ་དག  ཕྱི་ཕྱོགས་ནས་༧གོང་ས་སྐྱབས་མགོན་ཆེན་པོ་མཆོག་གི་དབུས་པའི་བཙན་བྱོལ་བོད་མིའི་སྒྲིག་འཛུགས་ཀྱི་རྒྱུད་བསྐུལ་བྱས་པ་ཞིག་ཡིན་པ་དང་ ངན་བསྐུལ་དེ་དག་འགོག་ཐབས་ཀྱི་སླད་མདོ་སྟོད་སྨད་ཀྱི་ས་ཁུལ་མང་པོའི་ནང་། ཕྱི་ཕྱོགས་ནས་རྒྱང་སྲེང་བྱས་པའི་བོད་སྐད་རླུང་འཕྲིན་ལས་རིམ་ཁག་བཀག་འགོག་གི་ལས་འགུལ་ཤུགས་ཆེ་རུ་གཏོང་བཞིན་ཡོད་པ་དང༌།  གཟུགས་མཐོང་བརྙན་འཕྲིན་སོགས་བཙན་འཕྲོག་དང༌། བརྙན་འཕྲིན་དང་རླུང་འཕྲིན་བལྟ་ཉན་བྱ་རྒྱུའི་འོད་སྡེར་ཁག་མེད་པ་བཟོ་བཞིན་ཡོད་པ་མ་ཟད། རང་ལུས་མེར་བསྲེག་གཏོང་བའི་དོན་རྐྱེན་དང་འབྲེལ་བ་ཡོད་པ་རྣམས་ཀྱི་ཐོག  མི་བསད་པའི་ནག་ཉེས་གཡོག་རྒྱུའི་རྡིག་སྐུལ་བྱེད་བཞིན་པའི་གནས་ཚུལ་སྤེལ་འདུག་པ་ལྟར། ཉེ་ལམ་རྒྱ་ནག་གཞུང་འབྲེལ་ཤིན་ཧུའ་གསར་འགྱུར་ལས་ཁང་གིས་གནས་ཚུལ་སྤེལ་བའི་ནང་། བོད་ནང་བོད་མིས་རང་ལུས་མེར་བསྲེག་གི་ལས་འགུལ་འགོག་ཐབས་སུ་མང་ཚོགས་ལ་ཏྭ་ལའི་བླ་མའི་གནད་དོན་ཐད་གོ་རྟོག་སྤེལ་རྒྱུ་དང་། ཕྱི་ཕྱོགས་ནས་རྒྱང་བསྲིང་བྱས་པའི་གནོད་འཚེ་ཅན་གྱི་བརྙན་འཕྲིན་དང་རླུང་འཕྲིན་ཁག་ཉན་མ་ཐུབ་པ་བཟོ་རྒྱུ་དེ། རྒྱ་ནག་གཞུང་གིས་གལ་འགངས་ཆེན་པོར་ངོས་འཛིན་བྱེད་བཞིན་ཡོད་པའི་སྐོར་དང༌། ཡང་མདོ་སྨད་རེབ་གོང་ཁུལ་རང་ལུས་མེར་བསྲེག་གི་དོན་རྐྱེན་འགོག་ཐབས་ཀྱི་སླད། གཞུང་གི་ཉེན་རྟོག་སྐོར་སྲུང་བ་དང་དམག་དཔུང་བཀོད་བསྒྲིག་གིས་ བལྟ་སྲུང་ནན་ཏན་བྱེད་བཞིན་ཡོད་པའི་ཐོག རང་ལུས་མེར་བསྲེག་གཏོང་བའི་གནས་ཚུལ་མཁོ་སྤྲོད་བྱེད་མཁན་ལ་དངུལ་གྱི་རྔན་པ་སྤྲོད་རྒྱུ་སོགས་ལས་འཆར་བཀོད་བསྒྲིག་བྱེད་བཞིན་ཡོད་པའི་ཁྱབ་བསྒྲགས་བྱས་ཡོད་པའི་གནས་ཚུལ་ཐོན་འདུག།