ཧྥ་རན་སིའི་ནང་གི་བོད་རིགས་ཚོས་འཛིན་གྲྭ་བཅུ་གཉིས་ཀྱི་ཡིག་རྒྱུགས་ནང་བོད་ཡིག་བཅུག་དགོས་པའི་ཐད་ཧྥ་རན་སིའི་ཤེས་རིག་ལས་ཁུངས་ལ་སྙན་གསན་ཕུལ་ཡོད་པ།

བོད་ནང་རྒྱ་ནག་གཞུང་གིས་བོད་ཀྱི་སྐད་ཡིག་ཐོག་དམ་དྲག་ཇེ་ཆེ་དང་ཉམས་དམས་སུ་ཚབས་ཆེན་གཏོང་བཞིན་པའི་སྐབས་འདིར། ཡོ་རོབ་ཧྥ་རན་སི་རྒྱལ་ཁབ་ཀྱི་ནང་བོད་མི་གནས་སྤོས་གྲངས་འབོར་ཇེ་མང་དུ་འགྲོ་བཞིན་པ་དང་མཚུངས་སུ་ཧྥ་རན་སི་རྒྱལ་ཁབ་ནང་གི་སློབ་གྲྭ་ཁག་ཏུ་འཛིན་གྲྭ་བཅུ་གཉིས་ཀྱི་ཡིག་ཚད་སྐབས། སྐད་ཡིག་མི་འདྲ་བ་དུ་མ་ཞིག་བདམས་གསེས་གནང་ཆོག་གི་ཡོད་པ་དེར། ད་ལྟ་ཧྥ་རན་སི་རྒྱལ་ཁབ་ནང་བོད་ཡིག་གཟའ་མཇུག་སློབ་གྲྭ་ཁག་བཅུ་ཡོད་པའི་སློབ་ཕྲུག་ཚོར་ཡིག་ཚད་དེར་བོད་ཡིག་འདེམས་ཆོག་པའི་ལམ་སྲོལ་བཟོ་རོགས་ཞེས། བོད་རིགས་བུད་མེད་དབྱངས་སྐྱིད་སྒྲོལ་དཀར་ལགས་དང་ཁོང་གི་རོགས་པ་ཧྥ་རན་སིའི་བུད་མེད་བོད་ཡིག་དགེ་རྒན་དང་དགེ་རྒན་ཆེན་མོ་གཅིག་བཅས་ནས། ཉེ་ལམ་ཧྥ་རན་སི་གཞུང་གི་ཤེས་རིག་ལས་ཁུངས་ཀྱི་ལས་བྱེད་པ་ཚོར་མཇལ་འཕྲད་སྙན་གསེང་ཞུས་ཡོད་སྐོར། ཧྥ་རན་སིའི་ནང་གི་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་ཟུར་པ་དང་ལས་དོན་འདིའི་འགན་ཁུར་བཞེས་མཁན་དབྱངས་སྐྱིད་སྒྲོལ་དཀར་ལགས་ནས་འདི་ག་རླུང་འཕྲིན་ཁང་ལ་འགྲེལ་བརྗོད་གནང་གི་འདུག

ཧྥ་རན་སིའི་ནང་གི་འཛིན་གྲྭ་བཅུ་གཉིས་ཀྱི་ཡིག་ཚད་དེ་ནི་རྒྱལ་ཡོངས་ཀྱི་ཡིག་ཚད་ཆེ་ཤོས་ཤིག་ཆགས་ཡོད་པ་དང་། ཧྥ་རན་སིའི་སློབ་ཕྲུག་ཚོར་དེའི་ནང་ད་ལྟའི་ཆར་འཛམ་གླིང་གི་སྐད་ཡིག་ཆེ་ཁག་ཁ་ཤས་ཤིག་གདམ་ག་གནང་ཆོག་གི་ཡོད་ནའང་། བོད་སྐད་ཚུད་མེད་པར་དམིགས་ཏེ་ཧྥ་རན་སིའི་མི་རིགས་བོད་ཡིག་སློབ་མཁན་གྱི་དགེ་རྒན་ཆེན་མོ་ཧྥ་ཝང་སི་སོ་བྷན་དང་། ཡང་བོད་ཡིག་སློབ་ཁྲིད་དང་དོ་སྣང་ཅན་ཁཱ་མི་ལི། བོད་རིགས་བུད་མེད་དབྱངས་སྐྱིད་སྒྲོལ་དཀར་ལགས་བཅས་ནས་ཧྥ་རན་སི་གཞུང་ལ་སྙན་ཞུ་གནང་འགོ་བཙུགས་པ་ཞིག་ཡིན་ཞིང་། དབྱངས་སྐྱིད་སྒྲོལ་དཀར་ལགས་ནས་སྙན་ཞུ་འདི་ནི་གོམ་པ་དང་པོ་དང་གནད་དོན་ཐག་གཅོད་ལ་ལོ་ཤས་འགོར་སྲིད་པ་རེད་ཅེས་འགྲེལ་བརྗོད་གནང་གི་འདུག

ཧྥ་རན་སི་རྒྱལ་ཁབ་ནི་འཛམ་གླིང་ནང་གུ་ཡངས་དང་རང་དབང་། འདྲ་མཉམ་སོགས་དགོས་པའི་དེང་རབས་ཀྱི་གསར་བརྗེ་སྔ་ཤོས་ཀྱི་ཡུལ་གྲུ་དེ་ཡིན་པས། རྩོམ་རིག་སྒྱུ་རྩལ་དང་སྐད་ཡིག མི་རིགས་དང་རིག་གཞུང་སྣ་ཚོགས་ཕྱོགས་འདུས་ཆེ་ཤོས་ཀྱི་ཡུལ་ལུང་ཞིག་ཡིན་ཞིང་རྒྱལ་ཁབ་དེར་ད་ཆ་བོད་མི་སྐྱབས་བཅོལ་བ་བརྒྱད་སྟོང་བརྒལ་བ་གནས་ཡོད་པའི་ཚོད་དཔག་གནང་གི་ཡོད་པ་རེད།

གསར་འགོད་པ། བློ་བྷེ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།