༸གོང་ས་༸སྐྱབས་མགོན་ཆེན་པོ་མཆོག་གིས་ཨ་མི་རི་ཀའི་བདམས་ཐོན་སྲིད་འཛིན་སྐུ་ཞབས་ Donald Trump ལགས་སུ་འཚམས་འདྲའི་གསུང་འཕྲིན་སྩལ་གནང་བ།

ཟླ་ ༡༡ ཚེས་ ༧ ཉིན་བཞུགས་སྒར་༸རྒྱལ་བའི་ཕོ་བྲང་ནས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། ཁ་སང་ཕྱི་ཚེས་ ༦ ཉིན་ཨ་རིའི་སྲིད་འཛིན་ཟུར་པ་སྐུ་ཞབས་ Donald Trump ལགས་སླར་ཡང་ཨ་མི་རི་ཀའི་སྲིད་འཛིན་ཐེངས ༤༧ པར་འདེམས་ཐོན་བྱུང་བར་འཚམས་འདྲིའི་གསུང་འཕྲིན་ཞིག་སྩལ་གནང་ཡོད་པ་དང་། གསུང་འཕྲིན་ནང་༸གོང་ས་༸སྐྱབས་མགོན་ཆེན་པོ་མཆོག་གིས།“ངོས་ཀྱིས་དུས་ཡུན་རིང་པོ་ནས་ཨ་མི་རི་ཀས་མང་གཙོ་དང་རང་དབང། ཁྲིམས་ཀྱིས་དབང་སྒྱུར་བཅས་ཀྱི་དབུ་ཁྲིད་གནང་བར་ཡི་རངས་ཆེན་པོ་ཡོད་ཅིང་། ཨ་མི་རི་ཀའི་མང་གཙོའི་འཆར་སྣང་དང་འགོ་ཁྲིད་ལ་འཛམ་གླིང་སྤྱིས་རེ་ལྟོས་ཆེན་པོ་གནང་གི་ཡོད་པས། འཛམ་གླིང་ས་ཕྱོགས་ཁག་ཅིག་ཏུ་ངེས་གཏན་མེད་པ་དང་ཡོ་འཁྱོམ་ཆེ་བའི་དུས་སྐབས་འདིར། ངོས་ཀྱི་རེ་བར་སྲིད་འཛིན་མཆོག་ནས་ཞི་བདེ་དང་བརྟན་བརླིང་བསྐྲུན་ཐུབ་པའི་འགོ་ཁྲིད་ཅིག་གནང་དགོས་གལ་ཆེ།” ཞེས་བཀའ་སྩལ་གནང་ཡོད་ཅིང་། ༸གོང་ས་མཆོག་གིས་མུ་མཐུད། “ངོས་རང་དང་བོད་མི་མང་ལ་བཀུར་བར་འོས་པའི་ཨ་མི་རི་ཀའི་སྲིད་འཛིན་རིམ་པ་དང་མི་མང་གིས་འགྲོ་བ་མི་སྤྱི་ཡོངས་ལ་ཕན་པ་བསྒྲུབ་ཐུབ་པ་སྟེ། ང་ཚོའི་གནའ་རབས་ཀྱི་ནང་ཆོས་དང་འབྲེལ་བའི་འཚེ་བ་མེད་པ་དང་བྱམས་བརྩེའི་རིག་གཞུང་གོམས་གཤིས་སྲུང་སྐྱོབ་ཆེད་འབད་བརྩོན་ཐད་རྒྱབ་སྐྱོར་གནང་བར་གུས་བརྩི་ཡི་རང་ཆེན་པོ་ཡོད་པ་དང་།སྲིད་འཛིན་ཉིད་ནས་འབྱུང་འགྱུར་འཛམ་གླིང་ཞི་བདེ་ལ་ཞབས་འདེགས་དང་ཨ་རིའི་མི་མང་གི་མངོན་འདོད་སྒྲུབ་རྒྱུར་དཀའ་ཉེན་ཅི་འཕྲད་གེགས་མེད་ལམ་ལྷོངས་ཡོང་བའི་སྨོན་ལམ་ཡོད་”ཅེས་བཀའ་སྩལ་འདུག

གཞན་ཡང་ཕྱི་ཚེས་ ༦ ཉིན་Trump ལ་ཨ་མི་རི་ཀའི་སྲིད་འཛིན་གྱི་འོས་བསྡུའི་རྒྱལ་ཁ་ཐོབ་པར་ཐེ་ཝན་གྱི་སྲིད་འཛིན་Lai Ching te དང་ཨི་སི་རལ་གྱི་སྲིད་བློན་ Netanyahu དང་། ཡུག་རེན་གྱི་སྲིད་འཛིན་ Zelenskyy ། དེ་བཞིན་དབྱིན་ཇིའི་སྲིད་བློན་ Keir Starmer རྒྱ་གར་གྱི་སྲིད་བློན་Modi སོགས་རྒྱལ་ཁབ་མང་དག་ཅིག་གི་འགོ་ཁྲིད་རྣམས་ནས་འཚམས་འདྲི་མཛད་ཡོད་པ་རེད།

གསར་འགོད་པ། བློ་བྷེ།

རྩོམ་སྒྲིག་པ། བདེ་སྐྱིད་ཀུན་སྒྲོལ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།