རྒྱ་གར་ནང་ཡོད་པའི་བོད་མི་ཕྱིར་བསྐྱོད་སྐབས་ཕྱིར་ཐོན་ཆོག་མཆན་ངེས་པར་ཞུ་དགོས་པ།

རྒྱ་གར་ནས་བོད་མི་ཚོ་ལག་འཁྱེར་(IC)་ཐོག་ཕྱིར་བསྐྱོད་སྐབས་ཕྱིར་ཐོན་ཆོག་མཆན་མ་ཞུས་ན་དཀའ་ངལ་འཕྲད་ཀྱི་ཡོད་འདུག
རྒྱ་གར་དུ་ཡོད་པའི་བོད་མི་སྐྱབས་བཅོལ་བ་ཚོ་རྒྱ་གར་གྱི་ཕྱི་བསྐྱོད་ལག་འཁྱེར་སེར་པོ་(IC)་ཐོག་ཕྱི་ལ་འགྲུལ་བཞུད་བྱེད་སྐབས། ངེས་བར་དུ་ཕྱིར་ཐོན་ཆོག་མཆན་(Exit permit)་ཞུ་དགོས་པ་གྲོང་ཁྱེར་སྦེང་ལོར་ནང་ཡོད་པའི་བོད་མིའི་ལྷོ་སྤྱི་ལས་ཁུངས་ཀྱིས་བརྡ་ཁྱབ་བཏང་གནང་འདུག
རྒྱ་གར་ལྷོ་ཕྱོགས་སུ་ཡོད་པའི་བོད་པའི་གཞིས་ཆགས་ཁག་ལྔར་ཁྱབ་པའི་ལྷོ་སྤྱི་ལས་ཁུངས་ཀྱི་འགན་འཛིན་ཆོས་འཕེལ་ཐུབ་བསྟན་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསལ་བཤད་གནང་པར་གཞིགས་ན། ཉེ་ཆར་ཨ་རི་དང་། ཁེ་ཎ་ཊ་གཉིས་ནང་གཏན་སྡོད་ཀྱི་ལག་འཁྱེར་(Green Card)་ལྟབུ་ཡོད་པ་གང་ཞིག་ལ་སྐྱབས་བཅོལ་བོད་མི་ཚོ་ཕྱི་རྒྱལ་ཡུལ་གྲུ་ཁག་ཏུ་འགྲིམ་འགྲུལ་ཆེད་གནང་པའི་ཡོངས་གྲགས་སུ་དེབ་སེར་པོ་ཞེས་པ་དེའི་ཐོག་བསྐྱོད་མཁན་བོད་མི་ཁག་གཅིག་རྒྱ་གར་ནང་ཡོང་ནས། ཕྱིར་ལོག་སྐབས་རྒྱ་གར་ས་གནས་ཕྱི་མི་དེབ་སྐྱེལ་ལས་ཁུངས་ནས་ཕྱིར་ཐོན་ཆོག་མཆན་མ་ཞུས་པའི་རྐྱེན་གྱིས་སྦེང་ལོར་གནམ་ཐང་ནས་ཕྱིར་ཐོན་མ་བཅུག་པའི་དཀའ་ངལ་འཕྲད་འདུག དེར་བརྟེན་རྒྱ་གར་གྱི་ཕྱི་བསྐྱོད་ལག་ཁྱེར་སེར་པོ་བེད་སྤྱོད་གཏོང་མཁན་ཡིན་ཚེ་རྒྱ་གར་ནས་ལུང་པ་གང་དུ་བསྐྱོད་པ་ཡིན་ཡང་། རྒྱ་གར་ས་གནས་ཕྱི་མི་དེབ་སྐྱེལ་ལས་ཁུངས་ནས་ཕྱིར་ཐོན་ཆོག་ཆེན་ངེས་པར་དུ་ཞུ་དགོས་པ་དང་། ཡང་བོད་མི་གང་ཞིག་ཕྱིའི་རྒྱལ་ཁབ་ཁག་ལ་གུང་སེང་དང་སློབ་སྦྱོང་སོགས་དོན་གནད་གང་གི་ཐོག་བསྐྱོད་ཀྱང་ཕྱིར་རྒྱ་གར་དུ་ཡོང་མཁན་རྣམས་ནས་ངེས་པར་དུ་རྒྱ་གར་དུ་འཛུལ་ཞུགས་ཆོག་པའི་མཐོང་མཆན་ཞུ་དགོས་པ་གསལ་བཤད་གནང་ཡོད་པ་རེད།
བཙན་བྱོལ་བོད་མིིའི་སྤྱི་ཚོགས་ཀྱི་ཁྲོད་བོད་མི་མང་ཤོས་གནས་ཡུལ་ནི་རྒྱ་གར་ལྷོ་ཕྱོགས་ཀར་ན་ཀྲ་ཀ་མངའ་སྡེ་འདིའི་ནང་ཡིན་ཅིང་། མངའ་སྡེ་འདིའི་ནང་གི་བོད་མིའི་གཞིས་ཆགས་མོན་གྷོ་ཌི་དང་། སྦེལ་ཀོབ། ཧོན་སུར་དང་ཀོ་ལི་གྷལ་བཅས་སུ་ཁྱོད་བསྡོམས་བོད་མི་སེར་སྐྱ་གསུམ་ཁྲི་ལྔ་སྟོང་ཙམ་ཡོད་པའི་ཚོད་དཔག་བྱེད་བཞིན་ཡོད་པ་རེད།