གདན་ས་རུམ་བཏེག་དགོན་འཛིན་སྐྱོང་སྤེལ་གསུམ་བྱ་རྒྱུ་ཧ་ཅང་གནད་འགག་ཆེན་པོ་ཡིན། ཀརྨ་པ་མཆོག་གིས།

ཟླ་བ་འདིའི་ཕྱི་ཚེས་༡༣ཉིན་འབྲས་ལྗོངས་ཀྱི་རྒྱལ་ས་སྒང་ཏོག་གི་ཉེ་འདབས་སུ་ཆགས་པ་གདན་ས་རུམ་བཏེག་བཤད་སྒྲུབ་ཆོས་འཁོར་གླིང་དུ། བོད་ཆུ་སྟག་ལོའི་ལོ་མཇུག་ཏུ་རིས་མེད་བསྟན་པ་སྤྱི་དང་འགྲོ་བ་ཡོངས་ཀྱི་ཞབས་རིམ་དུ་སྒར་ཆེན་དགུ་གཏོར་ཆེན་མོའི་ཉིན། དཔལ་རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་དྲྭ་ལམ་བརྒྱུད་ཚོགས་མགོན་དུ་དབུ་བཞུགས་གནང་ཡོད་པ་དང་། སྐབས་དེར་ཀརྨ་པ་མཆོག་གིས་གདན་ས་རུམ་བཏེག་དེ་བཞིན་ཀརྨ་པ་སྐུ་ཕྲེང་བཅུ་དྲུག་པ་རང་བྱུང་རིག་པའི་རྡོ་རྗེ་མཆོག་གིས་བོད་ས་ཤོར་པའི་རྗེས་བཙན་བྱོལ་ནང་ཕྱག་བཏབ་པའི་བྱེས་ཀྱི་གདན་ས་གཙོ་བོ་དང་། སྐབས་དེ་དུས་རུམ་བཏེག་དགོན་དེ་བཞིན་བཙན་བྱོལ་ནང་གི་དགོན་པ་ཚད་ལྡན་དང་རྒྱ་ཆེ་ཤོས་ཐོག་མའི་གྲས་སུ་ཆགས་ཀྱི་ཡོད་པ་དེ་ཡང་གཙོ་བོ་རྒྱལ་མཆོག་བཅུ་དྲུག་པ་ཆེན་པོ་མཆོག་གིས་མ་འོངས་དངོས་གཟིགས་ཀྱིས་སངས་རྒྱས་ཀྱི་བསྟན་པ་སྤྱི་དང་། བྱེ་བྲག་སངས་རྒྱས་ཀྱི་བསྟན་པ་འཛམ་གླིང་ཀུན་ལ་ཁྱབ་སྤེལ་ཡོང་ཆེད་ཐུགས་ཕན་ཆེན་པོ་གསོས་ཡོད་པར་ང་ཚོས་ཁོང་གིས་བཙན་བྱོལ་ནང་གིས་གདན་ས་གཙོ་བོ་རུམ་བཏེག་དགོན་པ་འཛིན་སྐྱོང་སྤེལ་གསུམ་བྱ་རྒྱུ་དེ་ཧ་ཅང་གལ་ཆེན་པོ་དང་གནད་འགག་ཆེན་པོ་ཆགས་ཀྱི་ཡོད་པ་དང་། མི་མང་ཚོའི་ངོས་ནས་བཤད་སྒྲུབ་ཀྱི་སྡེ་ལ་དངོས་ཤུགས་རྒྱུད་གསུམ་ནས་ཕྱག་རོགས་ཞུ་དགོས་སྐོར་གསུངས་འདུག
དེ་བཞིན་ཀརྨ་པ་ཁོང་བཙན་བྱོལ་དུ་ཕེབས་ནས་ལོ་མང་ཕྱིན་ཡོད་པ་དང་། དང་ཐོག་ཁོང་རྒྱ་གར་གྱི་མངའ་སྡེ་འབྲས་ལྗོངས་ཁུལ་དུ་ཕེབས་རྒྱུར་རྒྱ་གར་གཞུང་གིས་དམ་དྲག་གནང་ཡོད་པ་དང་། ད་ཆ་ཁོང་གདན་ས་རུམ་བཏེག་ཕུད་པའི་འབྲས་ལྗོངས་ནང་གིས་ས་ཁུལ་ཁག་གཞན་དུ་བསྐྱོད་ཆོག་པའི་ཆོག་མཆན་ཐོབ་པ་སོགས་ཀྱི་འགྱུར་བ་ཆེན་པོ་ཕྱིན་ཡོད་དུས། མ་འོངས་པར་རུམ་བཏེག་གིས་དཀའ་རྙོག་རྣམས་སེལ་བའི་རེ་བ་ཞུ་བཞིན་ཡོད་པ་དང་། གཙོ་ཆེ་ཤོས་ཚང་མས་སོ་སོའི་སྤྱི་ཚོགས་གཅིག་པོ་ཙམ་མིན་པར་དེང་སང་གྱིས་དུས་དང་མཐུན་པའི་སོ་སོའི་བསམ་བློ་ཁྱེར་ཕྱོགས་དང་མ་འོངས་འཆར་གཞི་རྣམས་རྒྱ་གང་ཆེ་དང་ཕུགས་རྒྱང་རིང་པོར་བསམ་བློ་གཏོང་རྒྱུ་གལ་ཆེན་པོ་ཆགས་ཀྱི་ཡོད་པ་གསུངས་འདུག
མཐའ་དོན་ཀརྨ་པ་མཆོག་གིས། ཁོང་ཉིད་རུམ་བཏེག་དགོན་པར་དངོས་སུ་ཕེབས་རྒྱུར་དཀའ་ངལ་འཕྲད་བཞིན་ཡོད་ན་ཡང་ད་ལན་དྲྭ་ལམ་བརྒྱུད་རུམ་བཏེག་སྒར་ཆེན་དགུ་གཏོར་ཆེན་མོའི་མཚལ་མའི་ཉིན་གྱི་ཚོགས་མགོན་དུ་ཕེབས་ཐུབ་པ་བྱུང་བས། ལོ་ངོ་༩༠༠ལྷག་གྱི་ལོ་རྒྱུས་ལྡན་པའི་སྒྲུབ་བརྒྱུད་ཀརྨ་ཀམ་ཚང་གི་བསྟན་པ་ཡང་ནས་ཡང་དུ་མཛད་པའི་རྟགས་རྟེན་འབྲེལ་སྒྲིག་པ་འདྲ་པོ་ཞིག་ལ་ངོས་འཛིན་ཞུ་བཞིན་ཡོད་པ་གསུངས་ཡོད་པ་རེད།
གདན་ས་རུམ་བཏེག་བཤད་སྒྲུབ་ཆོས་འཁོར་གླིང་དེ་བཞིན་འབྲས་ལྗོངས་ཀྱི་རྒྱལ་ས་སྒང་ཏོག་ནས་རྒྱང་ཐག་སྤྱི་ལེ་༣༠སར་ཡོད་པ་དང་། རུམ་བཏེག་དགོན་པ་དེ་བཞིན་ཕྱིའི་མཛེས་སྡུག་དང་ལོ་རྒྱུས་ཀྱི་ཆ་ནས་སྒང་ཏོག་ཁུལ་དུ་ཡུལ་སྐོར་སྤྲོ་འཆམ་པ་མང་པོ་ཡོང་སའི་བསྟི་གནས་གལ་ཆེ་ཞིག་ཆགས་གི་ཡོད་པ་རེད། རུམ་བཏེག་དགོན་ནི་ཕྱི་ལོ་༡༩༥༩ལོར་བོད་ནང་དུས་འགྱུར་བྱུང་པའི་རྗེས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་དབུས་ཆོས་བརྒྱུད་རིས་མེད་ཀྱི་བླ་ཆེན་རྣམ་པ་དང་། བོད་མི་ཁྲི་ཚོ་མང་པོ་བཙན་བྱོལ་དུ་ཐོག་མར་འབྱོར་པའི་གནས་སྐབས་སུ་འབྲས་ལྗོངས་ཆོས་རྒྱལ་ཆེན་པོས་རྒྱལ་བ་ཀརྨ་པ་སྐུ་ཕྲེང་བཅུ་དྲུག་པ་མཆོག་འབྲས་ལྗོངས་སུ་གདན་ཞུ་གནང་ནས་ཁོང་ལ་ས་ཆ་རྒྱ་ཁྱོན་ཨེ་ཀར་༧༤ཕུལ་ནས་ཕྱི་ལོ་༡༩༦༠ལོར་དགོན་པ་ཐོག་མར་ཕྱགས་བཏབ་ཡོད་འདུག།

གསར་འགོད་པ། པ་སངས་ཚེ་རིང་།
རྩོམ་སྒྲིག་པ། ཚེ་བརྟན་རྣམ་རྒྱལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།