རུམ་བཏེག་ཀརྨ་བཤད་སྒྲུབ་གླིང་དགོན་པའི་སློབ་གྲྭའི་ངོས་ནས་ས་གནས་ཡུལ་མི་ཉམ་ཐག་ཚོར་ཕན་ཐོགས་ཆེན་པོ་བསྒྲུབ་བཞིན་འདུག

འབྲས་ལྗོངས་ཀྱི་རྒྱལ་ས་སྒང་ཏོག་གི་ཉེ་འགྲམ་དུ་ཆགས་པའི་གདན་ས་རུམ་བཏེག་བཤད་སྒྲུབ་ཆོས་འཁོར་གླིང་གིས་འཛིན་སྐྱོང་དང་། དཔལ་རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གིས་དགོངས་གཞི་དང་འགྲོ་གྲོན་བཏང་བའི་འོག་ཁུལ་དེར་གནས་སྡོད་ས་གནས་ཀྱི་ཡུལ་མི་ཉམ་ཐག་ཚོའི་བྱིས་བར་ཤེས་ཡོན་ཀྱི་གོ་སྐབས་ཐོབ་ཆེད། ཕྱི་ལོ་༢༠༠༧ལོར་(Rumtek Karmae Dharma Chakra Centre School)་འམ་རུམ་བཏེག་ཀརྨའི་བཤད་སྒྲུབ་གླིང་དགོན་པའི་སློབ་གྲྭ་གསར་འཛུགས་ཀྱི་ཕྲུ་གུ་ཚོར་རིན་མེད་སློབ་སྦྱོང་སྤྲོད་པ་དང་དེབ་ཆས། སྒྲིག་ཆས་དང་ཉིན་གུང་ཟ་མ། དེ་བཞིན་ཐག་རིང་གནས་སྡོད་ཕྲུ་གུ་ཚོའི་ཆེད་དུ་འགྲུལ་སྐྱེལ་རླངས་འཁོར་སོགས་ཀྱི་མཐུན་རྐྱེན་སྦྱོར་ཡོད་པ་སློབ་གྲྭའི་སློབ་སྤྱི་ཀརྨ་ལྷ་མོ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་གསུང་བྱུང་།
ཁོང་མོས་གསུང་ན། སློབ་གྲྭ་དེ་བཞིན་ཐོག་མར་ཕྱི་ལོ་༡༩༧༥ལོར་རྒྱལ་དབང་ཀརྨ་པ་སྐུ་ཕྲེང་བཅུ་དྲུག་པ་རང་འབྱུང་རིག་པའི་རྡོ་རྗེ་མཆོག་གིས་རུམ་བཏེག་ཁུལ་དུ་གནས་སྡོད་བོད་མི་བཙན་བྱོལ་བའི་བྱིས་བ་ཚོའི་ཤེས་ཡོན་ཆེད་དུ་སྔོན་འགྲོའི་སློབ་གྲྭ་ཆུང་ཆུང་ཞིག་བཙུགས་པ་ནས་འགོ་འཛུགས་གནང་པ་ཞིག་ཡིན་འདུག་པ་དང་། སྐབས་དེ་དུས་དགེ་རྒན་ལས་བྱེད་དང་སློབ་ཕྲུག་ཉུང་ཤས་ལས་མེད་པ་རེད་འདུག ད་ཆ་སློབ་གྲྭ་འདིར་སྔོན་འགྲོའི་སློབ་གྲྭ་ནས་འཛིན་རིམ་བརྒྱད་པ་བར་ཡོད་པ་དང་། དགེ་རྒན་ལས་བྱེད་༣༠དང་སློབ་ཕྲུག་ཕོ་མོ་གྲངས་༢༩༠ཙམ་ཡོད་འདུག སློབ་གྲྭ་འདིར་ལོ་རེ་བཞིན་སློབ་མ་གསར་ཞུགས་བྱེད་མཁན་གྱི་གྲངས་འབོར་ཇེ་མང་དུ་ཕྱིན་ནས་མ་འོངས་པར་སློབ་གྲྭ་འདིར་འཛིན་རིམ་བཅུ་གཉིས་བར་བཟོ་རྒྱུའི་འཆར་གཞི་ཡོད་པ་གསུངས་བྱུང་།

ས་གནས་ཡུལ་མི་ཟླ་བ་ཆོས་སྐྱིད་ཤར་པ་ལགས་ཀྱིས་གསུང་ན། སློབ་གྲྭ་དེས་ས་གནས་ཀྱི་ཡུལ་མི་ཉམ་ཐག་ཚོར་ཕན་ཐོགས་ཆེན་པོ་ཡོང་གི་ཡོད་པ་དང་། རུམ་བཏེག་དགོན་པ་དང་ཀརྨ་པ་མཆོག་ཁོང་ཚོའི་མི་ཚེའི་ནང་བཀའ་དྲིན་ཆེན་པོ་ཡིན་པས། ཀརྨ་པ་མཆོག་དང་རུམ་བཏེག་དགོན་པར་ཐུགས་རྗེ་ཆེ་ཞུ་འདོད་བྱུང་ཞེས་གསུངས་བྱུང་།
སློབ་གྲྭ་དེའི་ནང་འབྲས་ལྗོངས་ཁུལ་གྱི་མི་རིགས་དང་ཆོས་ལུགས་རིས་མེད་ཀྱི་སློབ་ཕྲུག་ཚོར་གོ་སྐབས་གཅིག་མཚུངས་འབུལ་བཞིན་ཡོད་པ་དང་། ཁོང་ཚོར་དེང་དུས་ཀྱི་ཤེས་ཡོན་དང་མཉམ་དུ་ནང་སེམས་ཀྱི་གཤིས་རྒྱུད་དང་འབྲེལ་བའི་བྱམས་པ་དང་བརྩེ་བ། ཆོག་ཤེས། བཟོད་བསྲན་སོགས་གོང་མཐོར་གཏོང་ཆེད་རེས་བཟའ་སྤེན་པ་ནམ་ཡིན་ལ་ནང་ཆོས་ངོ་སྤྲོད་དང་། ལྷག་པར་དུ་ཀརྨ་པ་མཆོག་གི་ཐུགས་དགོངས་དང་བཀའ་སློབ་ལམ་སྟོན་བཞིན་ཁོར་ཡུག་སྲུང་སྐྱོབ་དང་སེམས་ཅན་གྱི་ཚེ་སྲོག་སྐྱོབ་པའི་ཕན་ཡོན་སྐོར་སློབ་ཕྲུག་ཚོར་ཆུང་དུས་ནས་ལམ་སྟོན་དང་གོ་རྟོགས་རྒྱ་ཆེ་སྤེལ་བཞིན་ཡོད་པ་སློབ་སྤྱི་ཀརྨ་ལྷ་མོ་ལགས་ཀྱིས་གསུངས་བྱུང་།
སློབ་གྲྭ་དེ་ནས་མཐར་ཕྱིན་པའི་ཀརྨ་ཆོས་ལྡན་ལགས་ཀྱིས། ཁོ་མོ་མཐོ་སློབ་ཐོན་རྗེས་སློབ་གྲྭ་འདིར་བཀའ་དྲིན་རྗེས་དྲན་ཆེད་དུ་དགེ་རྒན་གྱི་ཕྱག་ལས་གནང་བཞིན་ཡོད་པ་དང་། ཁོང་མོས་གསུང་ན། སྤྱིར་ལས་ཀ་ཚང་མ་གལ་ཆེན་པོ་རེད་ཡིན་ན་ཡང་སློབ་གྲྭ་འདིའི་ནང་ཞབས་ཞུ་བསྒྲུབ་རྒྱུ་དེ་ང་རང་ལ་མཚོན་ན་གལ་ཆེན་པོ་ཡིན་པ་གསུང་བྱུང་།
སློབ་གྲྭ་འདིར་ས་གནས་ཀྱི་སློབ་གྲྭ་གཞན་དང་གཅིག་མཚུངས་སློབ་ཚན་ཆ་ཚང་སློབ་ཁྲིད་གནང་བཞིན་ཡོད་པ་མ་ཟད། སྔོན་འགྲོ་ནས་འཛིན་རིམ་ལྔ་པ་བར་བོད་ཡིག་སློབ་ཁྲིད་གནང་གི་ཡོད་པ་རེད་འདུག འཛིན་གྲྭའི་དུས་ཡུན་ནི་ཞོགས་པ་ཆུ་ཚོད་༩པ་ནས་ཕྱི་དྲོ་ཆུ་ཚོད་༣པ་བར་ཡིན་པ་དང་། སློབ་ཕྲུག་རྣམས་སློབ་གྲྭ་འདི་ནས་ཐོན་རྗེས་ས་གནས་ཀྱི་སློབ་གྲྭ་ཆེན་མོའི་ནང་དཀའ་ངལ་མེད་པའི་ཐོག་འཛུལ་ཞུགས་གནང་ཐུབ་ཀྱི་ཡོད་འདུག།

གསར་འགོད་པ། པ་སངས་ཚེ་རིང་།
རྩོམ་སྒྲིག་པ། རྡོ་རྗེ་དགྲ་འདུལ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།