༄༅༎༸དཔལ་རྒྱལ་བ་ཀརྨ་པ་རིན་པོ་ཆེ་མཆོག་གིས་དེ་རིང་རྒྱ་ནག་གཞུང་གི་འགོ་ཁྲིད་ཚོར་། རྒྱ་གཞུང་གིས་ཆོས་དད་རང་དབང་ཐོག་དམ་དྲག་ཤུགས་ཆེ་བྱེད་བཞིན་ཡོད་པར་བོད་ནང་གི་བོད་མི་ཚོས་རང་ལུས་མེར་བསྲེགས་བཏང་ནས་ངོ་རྒོལ་བྱེད་བཞིན་ཡོད་པ་དེ་དག་མཚམས་འཇོག་ཡོང་ཐབས་སུ་རྒྱ་ནག་ངོས་ནས་གྲོས་མོལ་འགོ་འཛུགས་བྱ་དགོས་རྒྱུའི་འབོད་སྐུལ་གནང་འདུག ༸རྒྱལ་བ་ཀརྨ་པ་མཆོག་གིས་དེ་རིང་སྤྱི་བསྒྲགས་ཤིག་སྤེལ་གནང་ཡོད་པའི་ནང༌། རྒྱ་ནག་གི་འགོ་ཁྲིད་ཚོས་དོ་གལ་ཆེན་པོའི་སྒོ་ནས་བོད་ནང་གི་བོད་མི་ཚོ་དང་དེ་མིན་གྲངས་ཉུང་མི་རིགས་ཐོག་འཛིན་པའི་རྒྱ་གཞུང་གི་སྲིད་བྱུས་ཁག་ལ་བསྐྱར་ཞིབ་ངེས་པར་དུ་བྱེད་དགོས་ཀྱི་འདུག་ཅེས་གསུངས་ཡོད་པ་དང༌། བོད་མི་ཚོ་འུ་ཐུག་ཐབས་གཟད་ཀྱིས་ལྷག་བསམ་བཟང་པོའི་སྒོ་ནས་རང་ལུས་མེར་བསྲེགས་བཏང་ནས་རྒྱ་གཞུང་ལ་ངོ་རྒོལ་བྱེད་བཞིན་པ་དེ་ནི་། གཞིས་ལུས་བོད་མི་ཚོ་དྲང་བདེན་མ་ཡིན་པའི་རྒྱ་མིའི་བཙན་གནོན་འོག་སྡོད་རྒྱུའི་འདོད་པ་མེད་པའི་ངུ་འབོད་ཞིག་རེད་ཅེས་གསུངས་པ་དང༌ཆབས་ཅིག ༸རྒྱལ་བ་ཀརྨ་པ་མཆོག་གིས་རྒྱལ་སྤྱིའི་སྤྱི་ཚོགས་ནས་བོད་ནང་གི་དགོན་སྡེ་སྤྱི་དང་དམིགས་བསལ་ཟི་ཁྲོན་ཁུལ་གྱི་དགོན་པ་ཁག་གི་ནང་དྲག་རྩུབ་ཆེ་བའི་སྲིད་བྱུས་ལག་བསྟར་བྱེད་བཞིན་ཡོད་པ་དེ་ཚོར་ཞིབ་འཇུག་གནང་དགོས་པའི་སྐུལ་མ་ཡང་ཞུས་གནང་འདུག།
