རྒྱ་ནག་གི་མི་རབས་བཞིའི་འགོ་ཁྲིད་ཀྱི་འདྲ་པར་བཀྲམས།

༄༅༎བོད་རང་ལྗོངས་ཟེར་བས་དེ་རིང་རེས་གཟའ་ཉི་མའི་ཉིན་ལྷ་ས་གྲོང་ཁྱེར་ནང་དུ་ཡོད་པའི་ས་གནས་གཞུང་གི་ཐོག་རྒྱ་ནག་གི་མི་རབས་བཞི་ཡི་འགོ་ཁྲིད་ཀྱི་འདྲ་པར་ཆེན་པོ་ཞིག་བསྐལ་ཏེ་རྒྱ་མིའི་དཔྱིད་ཟླའི་ལོ་གསར་གྱི་མཛད་སྒོ་ཚོགས་ཡོད་པ་མ་ཟད། ས་གནས་བོད་མི་ཚོར་ཡང་འདྲ་པར་བསྐྱལ་དུ་བཅུག་ཡོད་པ་རེད།
དེ་ཡང་རྒྱ་ནག་གི་མི་རབས་བཞི་ཡི་འགོ་ཁྲིད་མའོ་རྩེ་ཏུང་དང༌། ཏིང་ཤའུ་ཕིང༌། ཅང་ཛ་མིན། ཧུའུ་ཅིང་ཐའུ་བཅས་ཀྱི་འདྲ་པར་རིང་ཚད་ལ་མི་ཊར་༡༣ དང་གྲངས་ཆུང་༦ ནས་༨ དང་གྲངས་ཆུང་དགུ་བྱས་པ་བསྐལ་ཏེ། དེ་རིང་རྒྱ་མིའི་དཔྱིད་ཟླའི་ལོ་གསར་གྱི་མཛད་སྒོ་ཚོགས་པའི་ཐོག་ས་གནས་ཀྱི་དཔོན་རིགས་དང་ས་གནས་མི་དམངས་མཉམ་ཞུགས་བྱེད་མཁན་མི་གྲངས་༦༦༠ བྱུང་ཡོད་པའི་སྐོར་དང༌། སྐབས་དེར་བོད་རང་སྐྱོང་ལྗོངས་ཟེར་བའི་འགོ་ཁྲིད་པདྨ་འཕྲིན་ལས་ཀྱིས། རྒྱ་ནག་གི་མི་རབས་བཞི་ཡི་འགོ་ཁྲིད་ཀྱི་འདྲ་པར་བསྐྱལ་བ་དེ་ཡི་མཚོན་དོན་ནི། བོད་མི་ཚོས་རྒྱ་ནག་མི་དམངས་སྤྱི་མཐུན་རྒྱལ་ཁབ་དང་གུང་ཁྲན་ཏང་གི་བཀའ་འདྲིན་ཡིན་པའི་སྐོར་གཏམ་བཤད་བྱས་ཡོད་པ་རེད། ད་རེས་རྒྱ་མིའི་དུས་ཆེན་དེའི་སྐབས། བོད་རང་སྐྱོང་ལྗོངས་ཀྱི་འགོ་ཁྲིད་ནས། རྒྱ་མིའི་རྒྱལ་དར་དང༌། གོང་གསལ་རྒྱ་ནག་གི་མི་རབས་བཞི་ཡི་འགོ་ཁྲིད་ཚོའི་འདྲ་པར་གཅིག་མཚུངས་བོད་མིའི་སྡོད་ཁྱིམ་དང༌། དགོན་པ་། སློབ་གྲ། ལས་ཁུངས་སོགས་ཀྱི་ཐོག་བསྐྱལ་དུ་བཅུགས་ཡོད་ཅིང༌། དེ་ནི་ས་གནས་གཞུང་གིས། རྒྱ་མིའི་རྒྱལ་དར་དང༌། རྒྱ་ནག་གི་མི་རབས་བཞི་ཡི་འགོ་ཁྲིད་བཞི་པོའི་འདྲ་པར་ས་ཡ་གཅིག་ལྷག་ལྷ་ས་གྲོང་ཁྱེར་དང༌། དགོན་སྡེ་ཁག  སློབ་གྲ། བོད་ཀྱི་གྲོང་གསེབ་ས་ཁུལ་གྱི་ཁྱིམ་ཚང་སོགས་ལ་འགྲེམས་སྤེལ་བྱས་པ་ཞིག་ཡིན་པ་རེད།།