༄༅༎བལ་ཡུལ་གྱི་མཆོད་རྟེན་བྱ་རུང་ཁ་ཤོར་མདུན་དུ་བོད་མི་དགེ་འདུན་པ་ཞིག་གིས་བོད་རང་དབང་ཆེད་རང་ལུས་མེར་བསྲེགས་བཏང་འདུག་།
གསར་འགྱུར་བརྒྱུད་ལམ་ཁག་གིས་གནས་ཚུལ་བཀོད་པར་གཞིགས་ན་ དེ་རིང་ཕྱི་ཚེས་༡༠སྔ་དྲོ་ཆུ་ཚོད་ ༧ པའི་སྟེང་བལ་ཡུལ་གྱི་མཆོད་རྟེན་བྱ་རུང་ཁ་ཤོར་མདུན་དུ་རང་ལོ་༢༥ཡས་མས་ཡིན་པའི་བོད་མི་དགེ་འདུན་པ་ཞིག་གིས་ལག་ཏུ་བོད་ཀྱི་རྒྱལ་དར་འཕྱར་བཞིན་ བོད་ལ་རང་དབང་དགོས་ཞེས་སྐད་འབོད་སྒྲོག་བཞིན་རང་ལུས་མེར་བསྲེགས་བཏང་ཡོད་པའི་གནས་ཚུལ་ཡོངས་གྲགས་བཀོད་འདུག སྐབས་དེར་ཉེ་འཁོར་རུ་ཡོད་པའི་བོད་མི་ཁག་ཅིག་ནས་ཁོང་གི་གཟུགས་པོའི་མེ་གསོད་ཐུབ་ཙམ་བྱུང་ཡོད་ནའང་གློ་བུར་དུ་ས་གནས་བལ་ཡུལ་ཉེན་རྟོག་པ་དང་དམག་མི་འབོར་ཆེན་སླེབས་ཏེ་ མང་ཚོགས་རྣམས་ཕྱིར་འབུད་བཏང་སྟེ་ མཆོད་རྟེན་གྱི་མཐའ་ཡོངས་སུ་བསྐོར་ཡོད་སྟབས་ད་ལྟ་དགེ་འདུན་པ་ཁོང་གི་གནས་སྟངས་ཤེས་རྟོགས་ཐུབ་མི་འདུག རྒྱལ་ས་ཀཐ་མན་དྲུའི་ཉེན་རྟོག་སྤྱི་ཁྱབ་གཞོན་པ་ཤྱམ་གྱ་ལྦ་ལི་ཞུ་བས་བརྗོད་ན་ ལོ་ན་༢༦ཡས་མན་ཡིན་པ་རང་ལུས་མེར་བསྲེགས་གཏོང་མཁན་ བོད་མི་དགེ་འདུན་པ་དེས་རང་ལུས་མེར་བསྲེགས་མ་བཏང་གོང་ཁོང་གིས་བོད་ཀྱི་རྒྱལ་དར་ལག་ཏུ་འཁྱེར་ནས་བོད་རང་དབང་རྒྱལ་གྱུར་ཅིག་ཅེས་སྐད་འབོད་བྱེད་བཞིན་དུ་རང་ལུས་ལ་མེར་བསྲེག་བཏང་ཡོད་ལུགས་དང་ ཡང་དགེ་འདུན་པ་ཁོང་གིས་རང་ལུས་མེར་བསྲེགས་བཏང་མ་ཐག་ ཁོང་གི་ལྷན་དུ་ཡོད་པའི་གྲོགས་པ་ཚོས་ལམ་སེང་མེ་བསད་ཡོད་པ་དང་ཉེན་རྟོག་མི་སྣས་ མི་དག་ད་ལྟ་རྩད་གཅོད་བྱ་མུས་ཡིན་པ་ཉེན་རྟོག་སྤྱི་ཁྱབ་པས་གསུངས་བཞག་ གཞན་ཡང་བོད་མི་དགེ་འདུན་པ་དེའི་མཆོད་རྟེན་བྱ་རུང་ཁ་ཤོར་གྱི་མདུན་དུ་རང་ལུས་མེར་བསྲེག་གི་ལས་འགུལ་སྤེལ་སྐབས་དངོས་མཐོང་ལག་ཟིན་གྱི་མི་སྣ་ར་ལྦི་བླ་མ་ཟེར་བའི་ཕེརན་སི་གསར་ལས་ཁང་གནས་ཚུལ་ངོ་སྤྲོད་བྱས་པར་ དགེ་འདུན་པ་ཁོང་གིས་རང་ལུས་ལ་ས་སྣུམ་ཤོས་སོང་བ་དང་ དེ་མ་ཐག་ལུས་པོ་ཡོངས་རྗོགས་སྟེང་མེ་འབར་ཞིང་ ཁོང་གི་ན་ས་དང་ཕྱག་མེས་ཚིག་པ་དང་ དེ་རྗེས་ཕྱག་རོགས་བོད་མི་ལྔས་མེ་བསད་ཐུབ་པ་བྱུང་ཡོད་སྐོར་གནས་ལུགས་འགྲེལ་བརྗོད་བྱས་འདུག་༎
