རྒྱ་ནག་གི་ལི་ཐུའེ་ནི་ཡར་བཙན་ཤེད་བྱེད་བཞིན་པར་ཨ་མེ་རི་ཀས་གདོང་ལེན་གནང་རྒྱུ།

ཨ་མེ་རི་ཀའི་ཕྱི་སྲིད་ལས་ཁུངས་ཀྱི་དྲུང་ཆེ་གཞོན་པ་ལྕམ་ཝེན་ཌི་ཤརྨེན་ལགས་ཀྱིས་རེས་གཟའ་པ་སངས་ཉིན་ལི་ཐུའི་ནི་ཡའི་ཕྱི་སྲིད་བློན་ཆེན་གྷབ་རི་ལིའུ་སེ་ལནྜིསེ་བྷརྒིསེ་(Gabrielius Landsbergis)ལ་བཀལ་མོལ་གནང་བ་བརྒྱུད་ནེ་ཊོ་ཞེས་བྱང་ཨེཊ་ལན་ཊིག་མཐུན་གྲོས་སྒྲིག་འཛུགས་ཀྱི་ཕྱོགས་གཏོགས་དང་ཡོ་རོབ་མཉམ་འབྲེལ་སྒྲིག་འཛུགས་ཀྱི་ཚོགས་མི་རྒྱལ་ཁབ་ལི་ཐུའེ་ནི་ཡ་ཡིས་ཐའེ་ཝན་དང་འབྲེལ་ལམ་གསར་འཛུགས་གནང་བཞིན་པར་རྒྱ་ནག་གི་གནོན་ཤུགས་སྤྲོད་བཞིན་པ་དེར་གདོང་གནང་རྒྱུ་ཡིན་ལུགས་གསུངས་གནང་འདུག དབུ་ཁྲིད་རྣམ་གཉིས་ཀྱིས་བྷེ་ལ་རུསུ།(Belarus) ཡི་ཆབ་སྲིད་ཀྱི་གནས་སྟངས་སྐོར་ཡང་བཀའ་བསྡུར་གནང་བ་དང་སྦྲགས་བྷེ་ལ་རུ་སུ་ཡིས་མང་གཙོའི་ལས་འགུལ་ལ་མཐུན་འགྱུར་གནང་ཕྱོགས་སྐོར་བཀའ་བསྡུར་གནང་བ་དང་དེ་བཞིན་བྷེ་ལ་རུ་སུ་ཡི་སྲིད་འཛིན་ཨེ་ལེཁ་ཛེནྡར་ལུ་ཀ་ཤེན་ཀོ་(AlexanderLukashenko)མཆོག་གིས་རང་གི་ས་མཚམས་ལ་སྟངས་འཛིན་ནན་པོ་བྱས་ཏེ་ཡུལ་དེའི་ཡུལ་མི་Belarus ནང་གཞིས་སྤོ་བྱེད་བཞིན་པ་མཚམས་འཇོག་བྱ་གལ་ཆེ་བའི་སྐོར་ཡང་བཀའ་བསྡུར་ཡང་གནང་ཡོད་འདུག ད་ལམ་ལི་ཐུའེ་ནི་ཡ་ནང་ཐའེ་ཝན་གྱི་གཞུང་ཚབ་ཁང་དེ་ཐའེ་ཝན་གཞུང་ཚབ་ཁང་ཞེས་འབོད་ཆོག་པར་Lithuania ཡིས་མོས་མཐུན་གནང་རྗེས་རྒྱ་ནག་གིས་ལི་ཐུའེ་ན་ཡི་རྒྱལ་ས་ཝིལ་ནིའུསེ་(Vilnius) ནས་རྒྱ་ནག་གི་གཞུང་ཚབ་ཕྱིར་འཐེན་བྱ་རྒྱུ་དང་ལི་ཐུའེ་ནི་ཡིས་རྒྱ་ནག་རྒྱལ་ས་པེ་ཅིང་དུ་ཡོད་པའི་གཞུང་ཚབ་པ་ཕྱིར་འཐེན་དགོས་ལུགས་བརྗོད་ཡོད་འདུག།

གསར་འགོད་པ། ཀརྨ་རྒྱ་མཚོ།

རྩོམ་སྒྲིག་པ། ཚེ་བརྟན་རྣམ་རྒྱལ།

དྲ་ཐོག་སྤེལ་མཁན། ཡེ་ཤེས་བཀྲ་ཤིས།