Әнқәрәдә түркий милләтләр норуз байримини тәнтәнилик өткүзди

Тарихий мәнбәләргә қариғанда норуз байримини уйғурлар миладидин бурун 8-әсирдин бери қутлап кәлмәктә икән. Бурун йеңи күн дәп аталған норуз, уйғурлар иран мәдәнийити билән учрашқандин кейин норуз дәп атилишқа башланған. Бу байрам бүгүн түркийиниң әнқәрә, истанбул, измир вә аданаға охшаш шәһәрлиридә тәнтәнилик өткүзүлди. Бу паалийәтләргә дуняниң һәрқайси җайлиридин түркийигә кәлгән қериндаш түркий милләтләрдин сәнәтчиләр қатнашти. Уйғурлар тунҗи қетим түрк дуняси норуз паалийитигә қатнашти.

21-Март саәт 11 дә әнқәрә рәсим һәйкәл музейиниң залида өткүзүлгән норуз байрими паалийитигә түркийә мәдәнийәт министири әртуғрул гүнай, оттура асия түркий җумһурийәтлириниң әнқәрәдә турушлуқ әлчилири вә 15 дөләттин кәлгән сәнәтчиләр қатнашти. Алди билән түркийә мәдәнийәт министири әртуғрул гүнай ечилиш нутқи қилип түрк дунясиниң шундақла пүтүн дуня хәлқиниң норуз байримини қутлиди.

RFA/Erkin Tarim

У һәрқайси дөләттин кәлгән сәнәтчиләрни тонуштуруп келип, бу йилқи норуз байримимизға хитай сәнәтчиләр вә уйғур сәнәтчиләрму қатнашти,‏ дәп уйғурларни айрим тилға алди. Қазақ, қирғиз, өзбек, түркмән, тува сәнәтчилиридин кейин уйғур сәнәтчиләр мәшрәп намлиқ оюнини көрсәтти. Тамашибинлар бу оюнни өрә туруп узун чавак челип алқишлиди.

Әнқәрәдин башқа истанбул, измир вә қәйсәридиму өткүзүлгән норуз паалийитигә уйғурларму қатнашти. Биз норуз байрими вә бу йилқи норуз паалийәтлири һәққидә тәпсилий мәлумат елиш үчүн бу паалийәтләргә қатнашқан уйғурларға микрофонимизни узаттуқ.