Малайшиядики 11 уйғурниң соти 24‏-апрелға кечиктүрүлгән

Мухбиримиз шөһрәт һошур
2018-03-21
Share

Малайсия ахбаратиниң хәвәр қилишичә, өткән йили тайланд түрмисидин қачқан вә бу йил февралда малайшияда тутулған 11 нәпәр уйғур бүгүн, йәни 21‏-март күни сотқа тартилған, әмма түркчә тәрҗиман болмиғанлиқи үчүн сотлаш давам қилалмиған вә сот вақти 24-апрелға кечиктүрүлгән.

Бу 11 уйғурниң адукати фәхми моин бүгүн мухбирларға қилған сөзидә уларниң "малайсия көчмәнләр қануниға хилаплиқ қилиш, йәни малайшияға рухсәтсиз кириш" билән әйиблиниш еһтималлиқини баян қилған. Әмма у малайсия даирилириниң бу уйғурларни хитайға қайтуруветиш вә қайтурмаслиқ мәсилисидә һазирчә бир немә дейәлмәйдиғанлиқини әскәрткән.

Хәлқара хәвәрләрдә дейилишичә, 11 уйғур тутулғандин кейин хитай даирилири малайшиядин уларни қайтуруп беришни тәләп қилған. Америка қатарлиқ бир қисим ғәрб дөләтлири малайшияни бу 11 уйғурни хитайға қайтурмаслиққа чақирған. Америка башлиқ ғәрб әллири, әгәр бу уйғурлар хитайға қайтурулса һаятий бихәтәрликиниң хәвпкә учрайдиғанлиқини тилға елип, өзлириниң бу җәһәттики әндишисини ипадилигән иди.

Бу 11 уйғур 4 йилниң алдида тайландта тутулуп қалған уйғурларниң бир қисми иди. Әйни вақитта тайландта тутулуп қелип өзлириниң түркийә вәтәндиши икәнликини илгири сүргән 200 чә уйғурниң бир қисми 2015‏-йили хитайға қайтурулған, бир қисми түркийәгә йөткәлгән. Тайландта қепқалғанлиридин 20 нәпири өткән йилниң ахири түрмә темини тешип вә йотқан-әдяллирини арқан қилип түрмидин қечип чиққан иди.

Бүгүнки бу һәқтики хәвәрләрдә түрмидин қечип малайшияда тутулуп қалған зәкәрия арман қатарлиқ бу 11 нәпәр уйғур яшниң 20 яш билән 40 яш арисида икәнлики қәйт қилинған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт