«13-Бәш йиллиқ пилан» мәзгилидә уйғур елидики йеза-кәнт саяһәтчилики 40 милйондин артуқ саяһәтчини күтүвалидикән

Мухбиримиз қутлан
2017-01-01
Елхәт
Пикир
Share
Принт


29-Декабир күни уйғур аптоном районлуқ саяһәт идариси «йеза-кәнт саяһәтчилики вә саяһәт арқилиқ намратларни йөләш» ахбарат елан қилиш йиғини ачқан.

Хитай һөкүмәт таратқулириниң бу һәқтики хәвиригә қариғанда, «13-бәш йиллиқ пилан» мәзгилидә, йәни 2020-йилиғичә болған арилиқта уйғур аптоном районидики йеза-кәнт саяһәтчилики хитай ичи вә сиртидин 40 милйондин артуқ саяһәтчини күтүвалидикән.

Уйғур аптоном районлуқ саяһәт идарисиниң бу һәқтики ахбаратида мундақ дейилгән: «2020-йилиғичә йеза-кәнт саяһәтчилики омумий истемал қиммити 70 милярд йүәндин ашиду. Аптоном район бойичә саяһәтчилик кинишкиси беҗиргән намрат кәнт 600 гә йәткүзүлүп, йеза-кәнт саяһәтчилики билән шуғуллинидиған кишиләрниң сани бир милйондин ашурулиду. Буниң билән аптоном районимиздики 300 миң намрат нопусниң намратлиқтин қутулуш мәсилиси һәл болиду.»

Уйғур аптоном районлуқ саяһәт идарисиниң йоқириқи ахбарати муһаҗирәттики уйғур паалийәтчилири билән көзәткүчиләрни күчлүк әндишигә салмақта.

Улар бирдәк, хитай һөкүмитиниң ғәрбни ечиш истератегийәси уйғур елиниң йәр асти байлиқлирини хоритип, районниң екологийәлик тәңпуңлуқини бузуп ташлиди. Хитай көчмәнлириниң түркүмләп көчүрүлиши райондики йәрлик уйғурларни асасий еқимдин чәтләштүрүп, уларниң әнәнивий миллий мәдәнийити вә турмуш усулиға хирис елип кәлди. Әмдиликтә йеза-кәнт саяһәтчилики дегән вивиска билән 40 милюн аталмиш «саяһәтчи» ни җәлп қилиши уйғур деһқанлириниң тарихтин буян давамлаштуруп кәлгән бостанлиқ мәдәнийитини сүний усулда ғайип қиливетиши мумкин, дегәнләрни илгири сүрмәктә.

Пикирләр (0)
Share
Толуқ бәт