Сабиқ гоминдаң парламент әзаси абдулла тимән вапат болған

Мухбиримиз җәвлан
2022.08.15
Share on WhatsApp
Share on WhatsApp

Узун йилдин бери тәйвәндә яшаватқан сабиқ гоминдаң парламент әзаси абдулла тимән бу йил 8-айниң 14-күни тәйвәндә 102 йешида вапат болған.

Мәлуматларға қариғанда, абдулла тимән 1919-йил 4-айда ғулҗида туғулған. Сабиқ шинҗаң институтиниң маарип факултетини пүттүрүп, шинҗаң қизлар институтида оқутқучилиқ қилған; “шинҗаң гезити” дә тәһрир, “тяншан нәшрияти” да баш тәһрир, “шинҗаң алтай нәшрияти” да муавин нәшрият башлиқи болған;  1948-йил җуңхуа минго қанун түзүш комитети (бу комитет кейин тәйвән парламенти болуп шәкилләнгән) ниң әзаси болған.

Абдулла тимән хитайдики ички уруш аяғлашқандин кейин тәйвәнгә көчүп берип, тәйвән сиясәт университети чегра сиясити факултетида профессор болған;  1957-йил гоминдаң мәркизий комитетиниң кандидат әзаси, 1969-йил гоминдаң мәркизий комитет әзаси болуп сайланған. 1992-Йил у хитай мәмликәтлик сиясий кеңәшниң тәклипи билән аяли вә қизини елип, уйғур райониға келип куйтунни зиярәт қилған.

Абдулла тимән тәйвәндә сиясәт билән шуғуллиниватқан мәзгилдә йәнә “дөләтни бирликкә кәлтүрүшни илгири сүрүш җәмийити” ниң кеңәш башлиқи, хитай-түркийә мәдәнийәт җәмийитиниң мудирийәт башлиқи, хитай-әрәб мәдәнийәт җәмийитиниң даимий кеңәш әзаси, тәйвән ислам җәмийитиниң даимий һәйәт әзаси қатарлиқ вәзипиләрни өтигән.

Абдулла тимән һаятида сиясәт биләнла әмәс, шеир йезиш биләнму шуғулланған болуп, “ақ-қара”, “сәрхушлуқ”, “мени ялғуз демәң һәргиз” қатарлиқ нурғун шеирларни язған. Униң қизи юлтуз абдулла әдәбият вә филологийә пәнлири доктори болуп, малайшияда хитайчә әсәр йезип тонулған даңлиқ язғучи вә натиқ икән.     

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.