Белгийә адриян зензниң пейигә чүшкән хитай җасуси гумандари үстидин җинайи тәкшүрүш башлиған

Вашингтондин мухбиримиз әркин тәйярлиди
2024.01.12

Белгийә даирилири хитай тәрипидин лагер тәтқиқатчиси адриян зензниң абруйини чүшүрүшкә вәзипиләндүрүлгән белгийәлик оң қанат сиясийон франк крейелман үстидин хитай ‍истихбарати үчүн җасуслуқ қилиш гумани билән җинайи тәкшүрүш башлиған.

Йеқинда “малийә вақти” гезити”, германийәниң “‍әйнәк”, фирансийәниң “ле монде” гезитлири бирликтә тәкшүрүш елип бериш арқилиқ белгийә “вламис белаң” радикал оң қанат партийәсиниң сабиқ әзаси франк крейелманниң үч йилдин артуқ вақит хитай үчүн җасуслуқ қилғанлиқини илгири сүргәниди.

“малийә вақти” гезитиниң 10-январ хәвәр қилишичә, белгийә даирилири буниңдин хәвәрдар болған болсиму, лекин һазирғичә крейелман вә башқа гумандарларниң һәрикити белгийәдә җасуслуқ қилмиши, дәп қаралмиғачқа уларни җавабкарлиққа тартмай кәлгәникән.

Лекин белгийә әдлийә министири паул фон тегчелт 10-январ чаршәнбә күни франк крейелманниң делоси белгийә федиратсийә сақчи идарисиниң черикликкә қарши туруш тармақлири тәрипидин федиратсийә тәптиш даирилиригә тапшурулғанлиқини ейтқан. “малийә вақти” гезитиниң билдүрүшичә, белгийә федиратсийә тәптиш мәһкимисиниң баянатчиси ерик фон дуйс, “федиратсийә тәптиш ишханисиниң рәсмий тәкшүрүш башлиғанлиқи” ни дәлиллигән. Әмма илгириләп учур билән тәминләшни рәт қилған.

Белгийә әдлийә министири фон тегчелт, франк крелейманниң делоси өткән йили 12-айда федиратсийә сақчи идариси черикликкә қарши туруш ‍ишханисиниң диққитини қозғап, униң делосиниң тәптиш даирилиригә йолланғалиқини ‍ейтқан. “малийә вақти”, “әйнәк” вә ле монде” гезитлири йеқинда елан қилған тәкшүрүш доклатида, крелейманниң хитай дөләт бихәтәрлик министирлиқи әмәлдаридин йолйоруқ алғанлиқи, униң америкадики “коммунизм қурбанлири хатирә фонди” ниң алий тәтқиқатчиси, лагер мутәхәссиси адриян зензниң абруйини чүшүрүшкә буйрулғанлиқиға аит һөҗҗәтләрни ашкарилиған.

Белгийә тәптиш даирилириниң франк крелейман үстидин дело турғузуши, белгийә баш министири александир де кру 11 вә 12-январ күнлири хитайда зиярәттә болған бир пәйткә тоғра кәлди. Де круниң хитай зиярити башланған 11-январ күни дуня уйғур қурултийи баянат елан қилип, белгийә баш министириниң хитайда уйғур ирқий қирғинчилиқ мәсилисини күнтәртипкә елип келишини тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.