Xitay, teywen wekillirining trumpning prézidéntliq qesem murasimigha qatnishishigha qarshi chiqqan

Muxbirimiz irade
2017-01-19
Share

Amérika prézidéntliq saylimining ghalibi donald trump jüme küni qesem bérip prézidéntliq wezipisini resmiy tapshuruwalidu.

Paytext washin'gtonda ötküzülidighan murasim aldida xitay da'iriliri amérikidin teywenlik wekillerning bu murasimgha qatnashturulmasliqini telep qilghan. Xitay tashqi ishlar bayanatchisi xu'a chünying charshenbe künidiki bayanatida "Biz amérikini teywenning murasimgha wekil ewetishige ruxset qilmasliqqa chaqirimiz" dégen we bu telipini resmiy yollar arqiliq trumpning xizmet guruppisigha we hazirqi hökümet da'irilirige yollighanliqini bildürgen.

"Washin'gton pochtisi" gézitining xewer qilishiche, teywenning sabiq bash ministiri yü shikün bashchiliqidiki bir hey'et düshenbe küni amérikigha qarap yolgha chiqqan. Bu hey'et ichide hazirqi hökümet béshidiki partiye bolghan démokratiye tereqqiyat partiyisi we öktichi partiye wekillirimu bar bolup, ular murasimgha qatnashqandin sirt, bir qisim siyasetchiler, akadémikler we chet'ellerdiki xitay teshkilat wekilliri bilenmu uchrishish élip baridiken.

Biraq, xu'a chünying sözide eskertip: " Biz teywenning amérika - xitay munasiwetlirige xilap herqandaq shekildiki herikitige qet'iy qarshi turimiz" dégen. Firansiye agéntliqining éytishiche, ömek bashliqi yü shikün xitaygha jawab qayturup xitayning kichik dölet psixikisida ish qiliwatqanliqini bildürgen. U shundaqla xitay dölet re'isi shi jinpingni ima qilip turup " Hazirghiche xitayda bundaq kallisi addiy bir lidér chiqip baqmighan idi" dégen.

Donald trump saylamda ghelibe qilghandin kéyin teywen prézidénti sey yingwénning tebrik téléfonini qobul qilghan we shundaqla amérikining "Bir junggo siyasitige baghlinip qélish zörüriyiti yoq" dégen sözni qilish arqiliq xitayning chishigha tegken idi. Shundin béri ikki terep arisida teywen mesilisi dawamliq halda talash - tartish qilinip kelmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.