Америка авиаматка зәрбидар әтрити җәнубий хитай деңизида һәрикәт башлиған

Америка ташқи ишлар министири антони блинкенниң 2-айда болидиған хитай зиярити һарписида американиң “нимитис” (Nimitz) авиаматка зәрбидар әтрити җәнубий хитай деңизида һәрикәт башлиған.

“америка авази” ниң 18-январ күни хәвәр беришичә, америка һинди-тинч окян қоманданлиқ штаби “нимитис” авиаматкаси зәрбидар әтритиниң 12-январ күнидин башлап җәнубий деңизда һәрикәт башлиғанлиқини билдүргән. Бу, мәзкур әтрәтниң 2023-йиллиқ пилан бойичә тунҗи қетим җәнубий хитай деңизида һәрикәт қилиши һесаблинидикән. Бу әтрәт җәнубий хитай деңизида дүшмәнгә зәрбә бериш, су асти кемисигә қайтурма зәрбә бериш, су йүзи вә бошлуқта бирләшмә җәң қилиш мәшиқлири елип баридикән. Бу мәшиқләр америка деңиз армийәсиниң һинди-тинч окян районида елип баридиған қәрәллик һәрикәтлириниң бир қисми икән.

Америка һинди-тинч окян қоманданлиқ штабиниң билдүрүшичә, бу авиаматка зәрбидар әтритигә йәнә башқурулидиған бомба елип йүрәләйдиған окян чарлаш парахоти билән үч данә қоғлиғучи парахот вә бир авиаматка учқучилар әтрити һәмраһ болидикән. Бу ғайәт зор һуҗумчи әтрәт асмандин деңизға вә деңизниң астиға қәдәр кәң даиридә һуҗум қозғаш вә һуҗумдин мудапиә көрүш иқтидариға игә икән. Бу әтрәтниң нөвәттики вәзиписи деңиздин қанунлуқ пайдилиниш, ечиветилгән вә әркин деңиз муһитини қоғдаш, американиң иттипақдашлири вә һәмкарлашқучилири билән бирликтә хәлқара тәртипни қоғдаш қатарлиқлар икән.