Атуш шәһәрлик җ х идариси йәнә 2 миңдин артуқ сақчи қобул қилиш елани чиқарған

Мухбиримиз қутлан
2017-08-14
Share

Атуш шәһәрлик һөкүмәт торидин мәлум болушичә, атуш шәһәрлик җамаәт хәвпсизлики идариси 10-авғуст күни мәхсус елан чиқирип, 1938 нәпәр ярдәмчи сақчи вә 300 нәпәр «террорлуққа қарши чарлаш хадими» қобул қилидиғанлиқини билдүргән.

Бу, бу йил киргәндин буян атуш шәһәрлик даириләрниң сақчи қобул қилиш тоғрилиқ чиқарған үчинчи қетимлиқ елани икән.

Мәзкур еланда илтимас қилғучиларниң 3 әвлад биваситә уруқ-туғқанлири ичидә «миллий бөлгүнчилик, қанунсиз диний паалийәт вә яки башқа сиясий җинайәт» садир қилған кишиләрниң болмаслиқи алдинқи шәрт қилинған.

Еланда дейилишичә, атуш шәһәрлик җ х идариси қобул қилидиған «террорлуққа қарши чарлаш хадимлири» ниң айлиқ иш һәққи 4900 сомдин 5400 сомғичә болидикән. ярдәмчи сақчиларниң иш һәққи 2600 сом болидикән.

Игилинишичә, атуш шәһириниң һазирқи нопуси 200 миңдин артуқ болуп, даириләрниң атушта әслидә бар болған қораллиқ сақчи, адәттики сақчи вә ярдәмчи сақчилардин сирт, бу йил киргәндин буян йәнә 3 қетим зор көләмдә сақчи қобул қилиши көзәткүчиләрниң диққитини қозғимақта. Көзәткүчиләрниң қаришичә, 200 миң нопусқа игә бир шәһәр үчүн бир қетимда 2238 нәпәр сақчи қобул қилиш интайин зор сан һесаблинидикән.

«Җәнубий хитай әтигәнлик почтиси» гезитиниң 12-авғусттики хәвиригә қариғанда, чен чүәнго уйғур елиға секретар болғандин буянқи 11 ай давамида, йәни 2016-йили сентәбирдин буян уйғур диярида 84 миңдин көпрәк аманлиқ хадими қобул қилиш һәққидә елан чиқарған икән. Бу уйғур диярида өткән 10 йилдин буян қобул қилинған аманлиқ хадимлириниң омумий санидин 50 пирсәнт көп икән.

Уйғур вәзийитигә йеқиндин диққәт қилип келиватқан көзәткүчиләр, бу әһвал уйғур аптоном райониниң «мукәммәл бир сақчи дөлити» гә айландурулғанлиқини көрситип бериду, дәп қаримақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт