Хитайниң б д т кишилик һоқуқ кеңшиниң бир комитетиға таллиниши кишилик һоқуқ тәшкилатлирида әндишә қозғиди

Мухбиримиз әркин
2020-04-06
Share

Хитайниң б д т кишилик һоқуқ кеңишиниң һалқилиқ бир комитетиға таллиниши кишилик һоқуқ тәшкилатлирида әндишә қозғиған. Шу мунасивәт билән мәркизи җәнвәдики "б д т ни көзитиш" тәшкилати баянат елан қилип, б д т ниң буниңға йол қоюшини "бимәнилик" вә "әхлақсизлиқ" дәп әйиблигән. Мәзкур тәшкилатниң иҗраийә директори һәлил нәйәр, "залим вә ғәйрий инсаний хитай һакимийитини сөз әркинлики, халиғанчә тутқун қилиш вә мәҗбурий ғайиб қиливетиш қилмишлирини тәкшүридиған хәлқара тәкшүргүчиләрни бекитишкә таллаш от қоюш кесили бар адәмни базарниң от өчүрүш башлиқи қилип тәйинләшкә охшайду" дегән.

Мәлум болушичә, омман өткән чаршәнбә күни асия гурупписиға вакалитән б д т кишилик һоқуқ кеңишигә мәктуп йоллап, хитайниң 5 кишилик б д т мәслиһәтчиләр комитетиға талланғанлиқини билдүргән. Хитай корона вируси юқумини йошуруп, униң дуняви юқумға айлинишини кәлтүрүп чиқириш шундақла 3 милйондәк уйғур вә башқа мусулманларни лагерларға қамап, уларға қарита "мәдәнийәт қирғинчилиқ" елип бериш билән әйиблиниватқан мәзгилдә униң бу орунға таллиниши диққәт қозғиди.

"б д т ни көзитиш" тәшкилатиниң иҗраийә директори нәйәрниң тәкитлишичә, "б д т ниң залим хитай һөкүмитиниң хәлқара кишилик һоқуқ өлчәмлирини шәкилләндүридиған, дунядики зораванлиқларни доклат қилидиған әмәлдарларни таллишиға йол қоюши бимәнилик вә әхлақсизлиқ" икән. У, "рен җичаңдәк өзиниң пуқралирини шундақла бир милйондин артуқ уйғурни ғайиб қиливәткән хитайниң б д т мәҗбурий ғайиб қиливетишкә қарши туруш хизмәт гурупписиниң келәр нөвәтлик әзалирини сайлишида рол ойнишиға йол қоюшниң әқилгә сиғмайдиғанлиқи" ни тәкитлигән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт