Ақсарай әмәлдари президент байденниң ши җинпиңни “йол қаидисигә әмәл қилиш” қа үндәйдиғанлиқини ейтқан

Мухбиримиз әркин
2021.11.15
Share on WhatsApp
Share on WhatsApp

Ақсарайниң юқури дәриҗилик бир әмәлдари америка президенти җов байденниң 15-ноябир хитай рәһбири ши җинпиң билән икранда көрүшкәндә, хитайни “йол қаидисигә әмәл қилиш” қа чақиридиғанлиқини билдүргән.

15-Ноябир кәчтә президент байден тунҗи қетим кишилик һоқуқ тәшкилатлири тәрипидин уйғурларға қаритилған “ирқий қирғинчилиқ” ниң баш җавабкари, дәп әйиблинип кәлгән хитай рәһбири ши җинпиң билән икранда йүз туранә көрүшиду. Ақсарай һазирға қәдәр бу қетимлиқ көрүшүшниң конкирет музакирә темилирини елан қилмиди.

Ақсарайниң баянатчиси җен саки буниң алдида елан қилған баянатида, президент байденниң көрүшүштә “американиң муддиаси вә алдинқи муһим нуқтилирини ениқ ейтидиғанлиқи, хитай хәлқ җумһурийитигә болған әндишилирини ениқ һәм сәмимий йосунда оттуриға қоюдиғанлиқи” ни билдүргән. Бирақ җен саки американиң бу әндишилириниң уйғурлар мәсилисиниму өз ичигә алидиған яки алмайдиғанлиқини ейтмиған. Ройтерс агентлиқиниң хәвәр қилишичә, ақсарайниң юқури дәриҗилик бир әмәлдари президент байденниң ши җинпиң билән көрүшкәндә, уни хитайниң бир “мәсулийәтчан” вә “чоң дөләт” тәк “йол қаидисигә әмәл қилиш” қа чақиридиғанлиқини ейтқан.

Ақсарайниң бу әмәлдари йәнә сөһбәтниң бир қанчә саәт давамлишидиғанлиқи, униң америка-хитай риқабәт қаидисини бекитишни мәқсәт қилидиғанлиқини билдүргән. У йәнә байденниң бу қаидиләрни “америка вә униң иттипақдашлири һәм шериклириниң мәнпәәти вә қиммәт қаришиға пайдилиқ болған асаста” бәлгиләшкә әһмийәт беридиғанлиқини, лекин америка тәрәпниң бу йиғиндин чоң нәтиҗә күтмәйдиғанлиқини ейтқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт