Шинҗаң ишләпчиқириш-қурулуш биңтуәниниң йеңи нөвәтлик партком даимий һәйәтлири бекитилгән

Мухбиримиз ирадә
2022.06.23
Share on WhatsApp
Share on WhatsApp

Хитайниң уйғур елида турушлуқ ғәйри-рәсмий қораллиқ армийәси болған шинҗаң ишләпчиқириш-қурулуш биңтуәни өзиниң йеңи нөвәтлик биңтуән парткоми даимий һәйәтлирини бекиткән.

“биңтуән хәвәрлири” ториниң хәвиридин мәлум болушичә, 6-айниң 19-күни хитай компартийиси шинҗаң ишләпчиқириш-қурулуш биңтуәни парткоминиң 8-қетимлиқ омумий йиғини ечилған. Омумий йиғинда ли йифей биңтуән парткоминиң секритарлиқиға; шө бин, лю җйәнмиң, ли җйәнго биңтуән парткоминиң муавин секритарлиқиға тәйинләнгән.

Хәвәрдин мәлум болушичә, шинҗаң ишләпчиқириш-қурулуш биңтуәни парткоминиң йеңи нөвәтлик даимий комитетиға әзалиққа бекитилгән ли йифей, шө бин қатарлиқ 14 әмәлдар ичидә мутәллип мәттохти исимлик пәқәт бир нәпәр уйғур әмәлдар йәр алған.

Хитай һөкүмити йеқинқи йиллардин буян биңтуәнни зор күч билән күчәйтип, уни уйғур райониниң муқимлиқини сақлаштики таянч күчкә айландуруш истратегийәсини йолға қоймақта. Йәни биңтуәнни уйғур елиниң җәнубиға қарап давамлиқ кеңәйтиш, биңтуән билән йәрликни бир гвдиләштүрүш, биңтуәнниң қораллиқ күчи болған “хәлқ әскәрлири” ни йәниму кеңийтиш вә биңтуән арқилиқ йәрликни контрол қилиш истратегийәсини қәдәмму-қәдәм әмәлийләштүрүп кәлмәктә.

Биңтуән парткоминиң секритари ли йифей омумий йиғиндики сөзидә биңтуән 8-қетимлиқ партийә қурултийини “шинҗаң хизмити йеңи бир дәвргә қәдәм қойған, биңтуәнниң йеңи дәврдики мәсулийити вә бурчини ада қилиш өткилигә һуҗум қилиш йеңи басқучида ечилған интайин муһим бир йиғин” дәп тәриплигән. У йәнә биңтуәнниң “йеңи дәврдики партийәниң шинҗаңни идарә қилиш тәдбирини толуқ вә дәл җайида изчиллаштуруш, муқимлиқни қоғдаш вә чегра районни муһапизәт қилиш мәсулийитини садиқлиқ билән ада қилиш” ни тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт