Шинҗаң ишләпчиқириш-қурулуш биңтуәни канадалиқ хитай яш-өсмүрни уйғур районида зиярәткә тәшкиллигән

Вашингтондин мухбиримиз әркин тәйярлиди
2023.12.05

Уйғурларни бастурушта ойниған роли сәвәблик канада һөкүмити тәрипидин ембарго йүргүзүлгән шинҗаң ишләпчиқириш-қурулуш биңтуәни бу йил язда 20 дәк канадалиқ хитай яш-өсмүрни тәшкилләп, уйғур районида зиярәткә орунлаштурған. Хәвәрләрдә, биңтуән даирилириниң бу яш-өсмүрләрни биңтуәнниң уйғур районидики сүт фермиси, етизлиқ вә “боз йәр өзләштүрүш музейи” қатарлиқ җайлирида зиярәткә орунлаштурғанлиқи қәйт қилинмақта.

Канада “дөләтлик почта” гезитиниң 3-декабир күни бәргән хәвиридә қәйт қилишичә, “чәтәллик яш-өсмүрләрни нишан қилған бу зиярәт паалийити, бейҗиңниң дуняға өз тәсирини кеңәйтиш, шинҗаң уйғур аптоном райониға даир қарашларни өзгәртиш тиришчанлиқиниң һәйран қаларлиқ өрникигә вәкиллик қилидикән.”

Канада һөкүмити 2021-йили 3-айда америка, әнглийә, явропа иттипақи билән бир қатарда “шинҗаң ишләпчиқириш-қурулуш биңтуәни” гә ембарго йүргүзүп, хитайниң мәзкур йерим қораллиқ йерим ишләпчиқириш тәшкилатини уйғур районидики “еғир вә системилиқ кишилик һоқуқ дәпсәндичилики” дә актип рол ойнаш билән әйиблигән.

“дөләтлик почта” гезитиниң ашкарилишичә, бу йил 8-айниң оттурилирида елип берилған “йилтизини издәш саяһити” намлиқ бу зиярәткә канадалиқ хитай яш-өсмүрлиридин 20 бала қатнашқан. 10 Күнлүк бу паалийәтниң “шинҗаң ишләпчиқириш-қурулуш биңтуәни” билән хитай компартийәси бирликсәп бөлүминиң йәрлик бир органи тәрипидин уюштурулғанлиқи қәйт қилинмақта.

Хәвәрдә, бу зиярәт хитайниң шинҗаңдики уйғурларға тутқан муамилиси хәлқараниң әйиблишигә учраватқан бир вақитта орунлаштурулғанлиқи, мутәхәссисләрниң “бу паалийәт бирликсәп бөлүминиң тәрбийәләш характерлик орунлаштуруши” болуп, “йилтизини издәш паалийити арқилиқ хитай компартийәсини қоллайдиған кейинки әвладларни йетиштүрүш, уларни хитай компартийәсиниң сиясий пиланиға мувапиқлаштурушни мәқсәт қилған” дәп көрсәткәнлики тәкитләнгән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.