Amérika shirkiti tibet we Uyghur éligha insanlarni perqlendürüsh téxnikisini satmaydighanliqini élan qilghan

Washin'gtondin muxbirimiz uyghar teyyarlidi
2024.01.30

2024-Yili 1-ayning 12-küni amérikadiki “Töpilik (THE Hill)” gézitige chiqqan maqalide körsitilishiche, amérika bi'ologiyelik dawalash shirkiti hésablinidighan “Térmo fishér shirkiti (Thermo Fisher Scientific)” tibet we Uyghur éli da'irilirige insanlarni gén uchurliri arqiliq perqlendürüsh téxnikisini sétip bermeydighanliqini élan qilghan.

Kishilik hoquqni közitish teshkilatining doklatigha asaslan'ghanda, kishilerning yüzini tonush we awazini perqlendürüsh téxnikisi, chong sanliq melumat supisi qatarliq téxnikilar xitay saqchilirining Uyghur élidiki keng kölemlik közitish sistémisining bir qismi ikenliki ilgiri sürülgen.

Kishilik hoquqni közitish teshkilati yene xitay hökümitining bu téxnikilarni sheherlerdin eng yiraq chégra we yéza-qishlaqlarghiche bolghan jaylarni kontrol qilishta qollinip kelgenlikini otturigha qoyghan.

Kishilik hoquqni közitish teshkilati “Térmo fishér” ning tibet we Uyghur éligha insanlarni gén uchurliri(DNA) arqiliq perqlendürüsh téxnikisini sétip bermeslik qararini qarshi élip mundaq dégen: “Xitaydiki tibet we Uyghurlarning hoquqini qoghdashqa yardem bérish tolimu muhim. Térmo fishérning qarari nahayiti muhim we qarshi élinidu. Emma xitaydiki suyi'istémalning éghirliqini közde tutqanda térmo fishérning bu qarari yéterlik emes. Xitayning ichidiki keng kölemde közitish we insanlarni gén uchurliri arqiliq perqlendürüsh téxnikisi mesilisi bu ikki rayondin halqip ketken”.

Amérika hökümiti xitay hökümitining Uyghur élide yürgüzgen qattiq basturush siyasitini “Irqi qirghinchiliq” we “Insaniyetke qarshi jinayet” dep eyibligen we 2019-yili Uyghur élidiki insanlarni gén uchurliri arqiliq perqlendürüsh téxnikisining sétip bérilishini toxtitishni qarar qilghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.