Чағанда хитайниң бейҗиң, тйәнҗин қатарлиқ шәһәрлиридә муһит булғиниши еғир болди

Хитай һөкүмәт таратқулириниң хәвәр қилишичә, бу йиллиқ чаған мәзгилидә хитайниң бейҗиң, тйәнҗин қатарлиқ шәһәрлиридә муһит булғиниш йәнила еғир болған.

Хитай муһит тәтқиқат мәркизи ториниң 31-январ сәйшәнбә күнидики хәвиридә, чаған мәзгилидә муһит булғинишиниң йәнила еғир болушидики сәвәбләр һәққидә тохтилип, чаған мәзгилидә хебий қатарлиқ өлкиләрдики бир түркүм муһитни булғайдиған чоң завутлар иштин тохтимиғанлиқи, аһалиләрниң иссиниш қурулмилиридин һаваға қоюп берилгән муһит булғайдиған ис-түтәкләр, чағанлиқ туғқан йоқлашқа маңғанлар чүшкән аптомобиллардин чиққан һавани булғайдиған керәксиз газларниң адәттикидин көп болуши қатарлиқ көп хил амиллар сәвәб болғанлиқи тилға елинған.

Хитайдики муһит булғиниш мәсилиси йеқинқи йиллардин буян хитай ичи вә хәлқараниң җиддий диққитини қозғиған мәсилиләрниң бири болуп, болупму қиш пәслидә шималий хитай районидики бейҗиң, тйәнҗин шәһири, хебий өлкисидики шиҗаҗуаң, бавдиң қатарлиқ шәһәрләр, ички моңғулниң көкхот шәһири вә ғәрбий шималдики үрүмчи, шихәнзә қатарлиқ шәһәрләрдики қоюқ туман кишиләрниң саламәтликигә еғир тәһдит елип келиватқанлиқи хәвәр темилири болмақта.