Чен чүәнго уйғур елида турушлуқ хитай армийәси вә қораллиқ қисимлар билән көрүшкәндә "урушқа тәйярлиниш вә терорлуққа қарши туруш" ни тәкитлигән

Мухбиримиз ирадә
2021-02-11
Share

Уйғур аптоном районлуқ парткомниң секритари чен чүәнго уйғур елида турушлуқ хитай армийәси вә қораллиқ қисимлар билән көрүшкәндә "терорлуққа қарши туруш вә муқимлиққа капаләтлик қилиш" ни тәкитлигән.

Хитайниң "тәңритағ" ториниң хәвиридин мәлум болушичә, 8-феврал күни чүштин кейин уйғур аптоном районлуқ парткомниң секритари чен чүәнго қатарлиқлар хитайниң чаған байрими мунасивити билән уйғур елида турушлуқ хитай азадлиқ армийәси вә қораллиқ сақчи қисими вәкиллири билән көрүшкән. Чен чүәнго шу күндики сөзидә хитай армийәси вә қораллиқ сақчи қисимларниң узақ муддәтлик әминликини қоғдаш йолидики хизмәтлирини юқири баһалаш билән биргә бундин кейин йәниму күчәйтишини тәләп қилған.

"тәңритағ" ториниң хәвиридә мундақ дийилгән: "чен чүәнго шинҗаңда турушлуқ хәлқ азадлиқ армийәси вә қораллиқ сақчи қисим офитсер-әскәрлириниң партийә мәркизий комитети, мәркизий һәрбий комитет вә рәис ши җинпиңниң қоманданлиқиға қәтий бойсунуп, армийәни қудрәт тапқузушини тәләп қилди. У йәнә диққәтни әскәрләрни мәшиқләндүрүп урушқа тәйярлиқ қилиш, ғәлибә қилиш иқтидарини омумиййүзлүк өстүрүп, агаһ сигналини узаққичә яңритиш, террорлуққа қарши туруш, муқимлиқни қоғдаш еғир вәзиписини зиммисигә елишта чиң турушни тәләп қилди. . ."

Хитай һөкүмитиниң уйғур елида җаза лагерлирини қуруп, нәччә милйонлиған кишини әркинликидин мәһрум қиливатқанлиқи, юқири пән-техниканиң ярдими билән районда мутләқ назарәтни ишқа ашуруп, иррқий қирғинчилиқ қиливатқанлиқи хәлқарада күчлүк тәнқидкә учраватқан бир шараитта, уйғур елида йәнә қандақтур "урушқа тәйярлиқ қилиш вә терорлуқққа қарши туруш" ни тәләп қилиши, күчлүк наразилиқ пәйда қилди.

Чәт әлләрдики уйғур көзәткүчилири буни хитай һөкүмитиниң уйғур елидики сиясәтлиридин ваз кәчмәйдиғанлиқиниң ипадиси, дәп қаримақта вә хәлқара җамаәтниң хитайға қаратқан бесимлирини йәниму күчәйтиши керәкликини тәкитләшмәктә.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт