Chén chu'en'go “Xitay merkiziy yéza xizmiti rehberlik guruppisi” ning mu'awin guruppa bashliqliqigha teyinlen'gen

Xitay hökümiti bashqurishidiki shinxu'a agéntliqining 14-iyundiki xewiride éytilishiche, Uyghur aptonom rayonluq partkomning sabiq sékrétari chén chu'en'go xitay “Merkiziy yéza xizmiti rehberlik guruppisi” ning mu'awin guruppa bashliqi süpitide shu küni chaqirilghan mezkur guruppining söhbet yighinigha riyasetchilik qilghan hemde söz qilghan.

“Yéngi éra” gézitining bu heqtiki xewiride éytilishiche, chén chu'en'go bu yil 67 yashqa kirgen bolup, xitay “Merkiziy yéza xizmiti rehberlik guruppisi” ning birinchi qol bashliqi nöwette xitayning mu'awin bash minstiri boluwatqan xu chünxu'a iken. Chén chu'en'goning bu qétimqi wezipisi heqqide söz qilghan xitay ziyalisi xu ping: “Buningdin qarighanda, chén chu'en'go 2022-yilining axiri chaqirilidighan 22-qurultayda xitayning aliy rehberlik qatlimidin orun alalmasliqi mumkin,” dégen.

“Ikki qoli milyonlighan Uyghurning qéni bilen boyalghan jallat” dep qariliwatqan chén chu'en'go 2021-yili dékabirda béyjinggha élip kétilgendin kéyin, uning qaysi orun'gha wezipige teyinlen'genliki bir sir bolup kelgen idi. Shinxu'a agéntliqining bu xewiri ötken yilidin buyan ismi xitay taratquliridin öchken chén chüen'goning eng yéqinqi ehwalini ashkarilighan. Xitay kompartiyesining Uyghur aptonom rayonida élip barghan yoquri bésimliq dölet térorluqining ijrachisi bolghan chén chüen'goning xitay merkizige élip kétilip, “Merkiziy yéza xizmitige rehberlik qilish guruppisi” din ibaret yéza-igilikige da'ir bir orunning mu'awin bashliqi qilip qoyulushi, kishilerge eyni waqitta “Shinjang padishahi” dep atalghan jallat shéng shiseyning 1944-yili 9-ayda gomindang hökümiti teripidin chongchinggha élip kétilip, déhqanchiliq-ormanchiliq ministirliqining ministéri qilip qoyulghanliqini esletmekte.